1 Mtuwa Mlungu kananguziya malola gamonga, Moniti shikapu shashimemiti mabwajubwaju gawula. 2 Mtuwa Mlungu kankosiya. "Amosi guwona shishi? Naneni nimwakula, nishiwona shikapu sha mabwajubaju gawula. Shakapanu Mtuwa Mlungu kang'ambira, upeleru wa wantu waneni wa Israeli usoka. Hapeni hepeleri ukontola wawu. 3 Lishaka ali nyimbu zya Numba ya Mlungu nanagala hazigalambulwi kuwera madaya. Hakuweri na mauti gavuwa na geni hagaswi kila pahala na kila muntu hakanyamali jii."

4 Mpikanili mwenga yamuwayonera wanyongi na yamuwatendera vidoda wahushu muisi. 5 Mlitakulira maweni, msambu gwa mwezi kulawa hagupeli ndii su twanji kushuwuza viboga vyetu? Lishaka lya Kwoyela haliperi ndii su tushuwuzi nganu yetu? Hatupunguli vipimu na kukweniziya beyi, hatuzyangi wantu kwa mizani yayilinganirandiri, 6 matimba ga nganu na patuwahemela wahushu kwa mpiya na yawahera shintu kwa vilwatu.

7 Mtuwa Mlungu kalonga, "Tembera mwenga mwankulitumba kuwera wiwuka wa Yakobo, nakaka, hapeni nilyaluwi matendu ganu makontola." 8 Toziya ayi pasipanu hapalendemeli na kila muntu muisi hakadayi. Isi yoseri hayiwegukiweguki, hayikweni na kusuluka gambira mashi ga lushemba Naili! 9 "Mtuwa Mlungu kalonga, lishaka ali hanigutendi mshenji guzyeti saa sita na isi hayiweri luwindu paluwala." 10 Mtuwa Mlungu kalonga hangalambuli misambu yenu kuwera kudaya na kwimba kwenu kuweri kulira. Haniwatendi woseri mwenga mvali nguwu zya maguniya na kumoga shikubuli mumituwi yenu, handa kudaya kwa kuhowa kwa mwana gwa gweka. Na lishaka lya upeleru haliweri lya utama mkulu.

11 Mtuwa Mlungu kalonga hangu, "Mashaka gakwiza geni hanjegi njala muisi. Kumbiti njalandiri ya kwahera shiboga ama kwimuluwa mashi, ila njala ya kupikanira shisoweru sha Mtuwa Mlungu." 12 Wantu hawatyangityangi kulawa bahali mpaka bahali, kulawa uwega wa kushana mpaka kwagulawa mshenji. Hawatugili aku na aku pawasakula shisoweru sha Mtuwa Mlungu, kumbiti hapeni wapati. 13 Mlishaka ali, wantemba na wahinga waherepa hawazimiyi kwa kwimuluwa mashi. 14 Walii yawalirapa kwa wamlungu wa mpayu wa Samariya na kulonga, "Kwa litawu lya mlungu gwa Dani ama kwa litawu lya mlungu gwa Beeri Sheba, woseri hawaguwi na hapeni wagoloki kayi."