1 Mpikanili shisoweru ashi, mwenga wadala yamuwera handa ng'ombi wa Bashani yamlikala kulugongu lwa Samariya, mwenga mwanguwawonera yawahera uwezu na wahushu na kwendeleya kuwagambira wapalu wenu, mutujegeri divai tulandi. 2 Neni Mtuwa Mlungu mnanagala nilirapa, "Nakaka mashaka gakwiza, wankondu wenu hawawakomangi gambira ndowani ntambu yazilopola wasomba. 3 Mwenga hamgendi mpaka pahala papabomolitwi mushibambaza na kukwegwera kunja na kuwajega Harimoni."

4 Mwenga Israeli, mgendi aku Beteli mwakatendi vidoda! Mgendi Giligali mwakongeri kutenda vidoda! Mlaviyi matambiku genu kila mandawira na lifungu lya kumi kila lishaka lya tatu. 5 "Moshiyi mkati lyalilekerwandiri simika handa kulonga mayagashii, Mlizyumi poseri handa mlaviya kwa kufira maweni, toziya mwenga ndo ntambu yamfira kutenda! Neni Mtuwa Mlungu ntakula.

6 Niwapananiti njala mu kira mji na kupunguluwa shiboga kila mji. Hangu mmbuyirandiri. Neni Mtuwa Mlungu ntakula." 7 Kayi niwimiti mvula, shaka vimeru vyenu pavifiriti mvula nentu. Nigutowiliti mvula mji gumu na mji gumonga nigutowerandiri. Lirambu limu lilipatiti mvula na limonga lipatitindiri liyumi. 8 "Wantu wa miji miwili ama mitatu watugira mji gumonga, su wapati mashi, kumbiti wapatandiri. Ata hangu mmbuyirandiri. Ntakula neni Mtuwa Mlungu.

9 Mara zivuwa nizikomangiti viwunga vyenu na malambu genu ga mizabibu na njegiti lyega lyanalivuki na kuyumiziya viboga vyenu. Wanjombi wamemeniti tini zyenu na mitera ya mizeyituni. Kumbiti mmbuyirandiri. Neni Mtuwa Mlungu ntakula.

10 Niwajegeriti ulweri ukalipa nentu handa ulii yaniwujegeriti Misri. Niwalaga wantemba wenu munkondu, niwatoliti farasi wenu wa nkondu. Mauti gamemiti mumalingu genu na kununka kwakuyi kumema mumpula zyenu. Kumbiti mmbuyirandiri. Neni Mtuwa Mlungu ntakula.

11 Wamonga wenu niwalagiti gambila wantu wa Sodoma na Gomora. Walii yawaponikiti muwamu mwenu, waweriti handa shizinga sha motu. Kumbiti mmbuyirandiri. Neni Mtuwa Mlungu ntakula.

12 Hangu, mwenga wantu wa Israeli haniwakomangi. Toziya hantendi mlandu agu, mweri kala kwa toza ya neni!"

13 Mlungu ndo yakanyawiti lugongu,

na kuwumba liyega,

ndo yakammaniziya muntu maholu gakuyi,

ndo yakagalambuliti paluwala kuwera pashiru,

na kutimbanga mpeleru zya pasipanu.

Mtuwa Mlungu yakana makakala ndo litawu lyakuyi!