1 Lishaka limu Mtuwa Mlungu kamgambiriti Yona mwana gwa Amitayi, 2 "Mona ukondora wa wantu mlushi lukulu lwa Ninawi. Su gugendi gwakawaberiziyi wantu toziya ya ukondora wawu unfikira neni." 3 Kumbiti Yona kamshapiriti Mtuwa Mlungu, yomberi kaliholiti kugenda Tarishishi. Kaseleriti kugenda lushi lwa Yopa, kawoniti uwatu mkulu yagugenda Tarishishi. Kulii Yona kalipiti mpiya kugenda mwanja kwa uwatu mkulu yauweriti wankugenda lushi lwa Tarishishii, su kashapiri kutenda shilii shakagambirituwi na Mtuwa Mlungu.

4 Shakapanu Mtuwa Mlungu kajegiti liyega mubahali, mankapala ga mashi ganjiti kuguvumisiya uwatu mkulu gulii sambira gupantiki. 5 Washima uwatu woseri waweriti na lyoga nentu na kila yumu kanjiti kumluwa kwa milungu yakuwi iwalopoli. Shakapanu womberi wasiliti visanka mubahali su uwatu gupunguli utopa wakuwi nagulidiba.

Kumbiti Yona kagenditi pahala pa kugonja, su yomberi kagonjiti mpota. 6 Mkulu gwa yawashima uwatu kaseleleriti kugenda kwakagonjiti mpota Yona. Yomberi kumkosiya, "Gwenga guweza hashi kugonja mpota? Gwimuki na gumluwi mlungu gwaku! Pamonga mekawezi kutuwonera lusungu natwagamira."

7 Shakapanu woseri walitakuziyiti weni, "Guleki tugalambuziyi simbi tuvimani gaa yakatenditi aga gatupati." Womberi wazigalambuziyiti simbi na zimguwiriti Yona. 8 Su womberi wamkosiyiti Yona, "Shondi shondi gutugambiri! Iwera hashi ntabiku ayi itupata? Gwenga gutenda lihengu gaa? Gwega gulawa koshi? Gwenga gulawa isi gaa? Likabila lyaku gaa?"

9 Yona kawawankura, "Neni Mwebraniya na numguwira Mtuwa Mlungu, Mlungu gwa kumpindi, ulii yakanyawiti bahali pamuhera na isi." 10 Shitwatira ashi shiwatenditi womberi waweri na lyoga nentu, su wamkosiyiti yomberi, "Gwenga gutenda shishi?" Womberi wavimaniti kuwera Yona kaweriti kankumshapira Mtuwa Mlungu toziya Yomberi kawagambiriti kala. 11 Shaka ashi liyega liweriti likulu na mankapala ga mashi gendereyiti kuwera makulu mubahali. Su womberi wamkosiyiti Yona, "Twenga tutendi hashi bahali iweri jii?"

12 Yona kawankuliti, "Muntoli neni munasili mubahali, su bahali haiweri jii. Nuvimana kuwera ntabiku ayi ilawira toziya ntenda ndiri shilii shakang'ambiriti Mtuwa Mlungu."

13 Kumbiti womberi wendereyiti kushima uwatu ulii wasoki muisi. Kumbiti womberi wasinditi toziya liyega lyendereyiti kuvuma ng'anji mubahali. 14 Shakapanu womberi wamluwiti Mtuwa Mlungu, kila yumu gwawu kaluwiti, "Gwee Mtuwa Mlungu, shondi shondi nagutwagamiziya toziya ya kumlaga muntu ayu. Gwee Mtuwa Mlungu, gwenga gutenda shilii shagufira kushitenda. Twenga tuvimana ndiri handa muntu ayu katenda vidoda. Handa yomberi katenda ndiri vidoda, nagututenda twenga tuweri na vidodda kwa kutenda muntu ayu kahowi!" 15 Shakapanu womberi wamtoliti Yona na kumwasa mumabahali, bahali iweriti jii. 16 Shitwatira ashi pashilawiriti, shiwatenditi washima uwatu waweri na lyoga likulu kwa Mtuwa Mlungu, su womberi wamlaviliriti tambiku Mtuwa Mlungu na waturiti shirapu kwakuwi. 17 Su Mtuwa Mlungu kamjegiti somba mkulu kammili Yona, Yona kalikaliti mumtima mwa somba ulii kwa mashaka matatu.