1 Kumbiti shitwatira ashi shimtenditi Yona kakalali nentu toziya Mtuwa Mlungu kagamiziyiti ndiri Ninawi. 2 Su kamluwiti Mtuwa Mlungu pakalonga, "Gwee Mtuwa Mlungu, gutenda shilii shanushiholiti kuwera megushitendi, pamberi neni hanelawi ukaya. Ntambu ayi intenditi neni ntugili muisi ya Tarishishi, toziya nuvimaniti kuwera gwenga gwee Mlungu gwana ufiru na lusungu kwa wantu woseri. Gwenga gwahera maya ga kanongola kwa wantu yawatenda ukondola. Gwenga guwafira nentu wantu na guwera na lusungu, gugalambula maholu gaku ga kuwazibu wantu yawateda vidoda. 3 Su vinu gundagi, gwee Mtuwa Mlungu, iherepa neni kuhowa kuliku kulikala."

4 Kumbiti Mtuwa Mlungu kamwankuliti, "Hashi, iherepa gwenga kukalala?"

5 Yona kalawiti kunja kwa lushi lwa Ninawi na kalikaliti uwega kwagulawa mshenji. Kulii kalinyawiriti mweni shisasa na kalivagiti mushivinyiwu shakuwi, kaheperiti kuwona shilii shashigenda kulawila mlushi. 6 Shakapanu Mtuwa Mlungu kagumeriziyiti mzyabibu gukuli pakwegera na Yona na gumpanani shivinyilu kumpungulira ntabiku yakaweriti nayu. Yona kanemeleriti nentu kuwera na mzyabibu agu. 7 Kumbiti lishaka lya pili paushiyiti, Mlungu kamtenditi mengali kaguliyi mzyabibu gulii, mzyabibu gulii gunyaliti. 8 Shakapanu mshenji pagulawiti, Mlungu kajegiti lipuga lyaliwera na lifuki kulawa kwagulawa mshenji, mshenji gumulawaliti Yona mumtuwi gwakuwi su kaweriti legilegi. Yomberi kafiriti kuhowa, su kalongiti, "Iherepa kwa neni kuhowa kuliku kwendereya kulikala!" 9 Kumbiti Mtuwa Mlungu kamkosiyiti Yona, "Hashi, iherepa gwenga kulala kwa shashilawiriti mushimeru?" Yona kawankuliti, "Yina iherepa! Neni nkalala nfira kuhowa!" 10 Su Mtuwa Mlungu kamgambiriti, "Gwenga gushiwonera lusungu shimeru ashi yagushiyaliti ndiri ama kugutenda gukuli. Gweni gukuliti pashiru pamu na gunyaliti pashiru papafatiti. 11 Hashi, ifaa ndiri neni kuluwonera lusungu Ninawi, lushi lulii lukulu lwaluwera na wana wavuwa nentu ya miya yimu na malongu mawili elufu, yawamana ndiri maheri ama madoda, viraa wankanyama wavuwa?"