1 Shakapanu Mtuwa Mlungu kamgambiriti kayi Yona, 2 "Gugendi lushi lukulu lwa Ninawi, guwagambiri wantu ujumbi yanukupananiti pamberi."

3 Shaka ashi, Yona kamjimiriti Mtuwa Mlungu, su yomberi kagenditi Ninawi. Ninawi luweriti lushi lukulu nentu, muntu mekawezi kugenda kwa mashaka matatu su mekalumalili kutyanga kila wega. 4 Yona pakwingira kala mlushi, katyangiti mwanja gwa lishaka limu. Yomberi kaweriti kankuwabwerera wantu pakalonga, "Pamashaka malongu msheshi, Ninawi hayiyagamiziwi!"

5 Su wantu wa Ninawi waujimiriti ujumbi wa Mlungu. Womberi woseri wamuwiti kuwera kila muntu kafiruwiti koya kuliya shiboga. Wantu woseri walunda na wahushu, woyiti kuliya shiboga. Woseri wavaliti malobota kulanguziya waleka vidoda vyawatenditi.

6 Mfalumi gwa Ninawi pakapikaniriti shilii wantu wa Ninawi wankutenda, yomberi kavuliti nguwu zakuwi zya shifalumi, su kavaliti malobota. Kalekiti kulikala pahala pakuwi pa shifalumi na kalikaliti pasi papaweriti na livu. 7 Shakapanu mfalumi ulii kabweriti ujumbi kwa wantu wa Ninawi, "Neni mfalumi pamuhera na wakulu yawangu tulonga kuwera, muntu yoseri nakaliya shiboga ama kulanda shoseri. Namuwalekeziya wang'ombi ama wankanyama wakuloleruwa waliyi ama kulanda shintu shoseri. 8 Wantu woseri pamuhera na wankanyama wavali malobota. Kila muntu kamluwi nakaka Mlungu. Na kila muntu koyi kutenda vidoda pamuhera na kutenda ungondu kwa muyaguwi. 9 Gaa yakavimana? Pamonga Mlungu mekagalambuli nfiru yakuwi, hakaleki maya gakuwi kwatenga, su natwiza kwagamira!"

10 Su Mlungu pakawoniti nakaka kuwera waleka vidoda vyawatenditi, kawawoneriti lusungu na kalekiti maholu ga kuwagamiziya.