1 Yona pakaweriti mumtima mwa somba, su kamluwiti Mtuwa Mlungu, Mlungu ulii yakamguwiriti, 2 pakalonga,

"Mtuwa Mlungu, paweriti muntabiku nkulu panu, nukuluwiti gwenga,

gwenga gumpikaniriti panukuluwiti.

Paweriti mumtima gwa kuhowa,

nukuliliiriti guntangi, gwenga gupikaniriti kulila kwaneni.

3 Gwenga gunasiriti neni pasi nentu mubahali,

mashi gavuwa gangubikiti,

mankapala pamuhera na mashi gavuwa gapititi pampindi paneni.

4 Nuliholiti kuwera ntuluwa gweka,

nawera kulongolu kwaku

nawona kayi Numba nkulu yaku nanagala.

5 Mashi ganzyengekiti na kumbabanika wega zyoseri,

bahali ingubikiti nakamu,

mahamba ga mubahali gangubikiti pamtuwi.

6 Nseleriti mpaka payanjira migongu,

*muisi magomi gakuwi gatatuwa mashaka goseri.

Kumbiti gwenga Mtuwa Mlungu, Mlungu gwangu,

gunkweneziya namkomu kulawa mulirindi amu.

7 Paweriti nankuhowa,

nukuholiti gwee Mtuwa Mlungu,

maluwa gangu gasokiti kwaku

Mnumba nkulu yaku nanagala.

8 Wantu woseri yawaviguwira vinyagu vya milungu ya upayira,

wasira kutali uaminika wawu kwaku.

9 Kumbiti hanukwimbiri gwenga lwimbu kulonga mayagashii,

hanukulaviliri tambiku.

Hantendi shilii shandagiliti kutenda.

Mtuwa Mlungu, gwenga ndo ulii yaguweza kutulopoziya."

10 Su Mtuwa Mlungu kamlagalira somba ulii kamtapiki Yona muisi iyuma.