João 21

Yesu kankuwalawira wantumini saba

1 Pa aga, Yesu kawalawiriti kayi wafundwa wakuwi kumbwega ku litanda lya Tiberiya. Ilawiriti hangu. 2 Simoni Peteru, Tomasi yawamshema wamawira na Nataniyeri mwenikaya gwa kana mu Galilaya wana wawili wa Zebedayu na wafundwa wakuwi wamonga wawili, waweriti woseri pamuhera. 3 Simoni Peteru kawagambira wamonga, "Nankugenda kulowa wasomba."

Womberi wamgambira, "Hatugendi na gwenga." Su wawuka na wakweniti uwatu, kumbiti pashiru poseri wapatiti ndiri shintu. 4 Payanjiti kushiya, Yesu kagolokiti pampeku pa litanda, kumbiti wafundwa wavimaniti ndiri kuwera yomberi ndo Yesu. 5 Su, Yesu kawakosiya, "Wantemba, mlowa ndiri shintu shoseri?" Womberi wamwankula, "Tupata ndiri shintu." 6 Yesu kawagambira, "Mwasi zinyavu zyenu uwega wa kumliwu mwa uwatu, hamlowi wasomba." Su waziyasa zinyavu na waweziti ndiri kuzinika, toziya zinyavu ziweriti na wasomba yawamemiti nduu.

7 Mfundwa yakafiritwi na Yesu kamgambiriti Peteru, "Ayu Mtuwa" Simoni Peteru pakapikaniriti kuwera ayu ndo Mtuwa, kavala weri nguwu yakuwi toziya kaweriti kavala upati, su kingiriti mumashi. 8 Su wafundwa wamonga wiziti kumbwega ku litanda pawawera muuwatu, wanikiti zinyavu zyaziweriti zimema wasomba. Waweriti ndiri patali na kuisi, iweriti handa utali wa mita malongu lilongu kulawa kumpeku. 9 Pawasokiti muisi wawoniti motu gwa makala gukoziwa na kuweriti na somba pamuhera na libumunda. 10 Shakapanu Yesu kawagambira, "Mjegi panu wasomba wamu wamuwalowiti."

11 Simoni Peteru kakwena muuwatu, kazinika zinyavu zilii kuisi zaziweriti zimema wasomba wakulu miya na malongu muhanu na tatu, tembera wasomba waweriti wavuwa zinyavu zidegeka ndiri.