1 Mtuwa Mlungu kamgambiriti Musa, 2 "Gumgambiri Aruni kuwera shaka pakagenda kuvitula vikoluboyi saba, yomberi kazituli su zilangali uwega wa kulongolu kwa shintambi ashi."

3 Aruni katenditi ntambu ilii, kavituliti vikoluboyi vilangalili uwega kulongolu kwa shintambi, gambira Mtuwa Mlungu ntambu yakamlagaliriti Musa. 4 Kulawa kumpindi mpaka pasi pa shintambi ashi sha shikoluboyi, shinyawituwi kwa zahabu yaipondituwi kulawirana na mfanu Mtuwa Mlungu yakamlanguziyiti Musa.

5 Mtuwa Mlungu kamgambiriti kayi Musa, 6 "Guwatuli gweka wantu wa Lawi kulawa kwa wantu wa Israeli, su guwapungi. 7 Hagutendi ntambu ayi kuwapunga, gwenga guwamishiri mashi, shakapanu walimogi nshimba yawu yoseri na wagululi nguwu zawu na walipungi wawu weni. 8 Shakapanu hawamtoli ng'ombi gwa shipalu yumu yakakamala nentu ndiri pamuhera na tambiku ya viboga ya ubumu unama yauhanganyikituwi na lipaki, su gwenga hagumtoli ng'ombi yumu yakakamala nentu ndiri yumonga kwajili ya tambiku ya kuwusiya vidoda. 9 Su hagushijojoniri shipinga shoseri sha wantu wa Israeli na kuwajega wantu wa likabila lya Lawi kulongolu kwa Liringu Linanagala. 10 Paguwajega wantu wa likabila lya Lawi kulongolu kwaneni, wantu wa Israeli hawawatulili mawoku womberi. 11 Su Aruni hakawatuli womberi kulongolu kwaneni handa tambiku ya kunyasulwa kulawa kwa wantu wa Israeli, su womberi hawaweri kala kuntendera lihengu.

12 Pa wantu wa likabila lya Lawi kuwatula mawoku pampindi pa pongu awa, gwenga gumtoli pongu yumu mwana gwa ng'ombi kuwera tambiku ya kuwusiya vidoda na yumonga hagumlaviyi kuwera tambiku ya kulunguziwa nakamu su kuwakolaniziya mawoku wantu wa likabila lya Lawi. 13 Shakapanu haguwagolusiyi wantu wa Lawi kulongolu kwa Aruni pamuhera na wana wakuyi kuwera gambira tambiku ya kunyasuluwa kulongolu kwa Mtuwa. 14 Kwanjira ayi gwenga haguwatuli gweka wantu wa likabila lya Lawi kulawa kwa wana wa Israeli na wantu wa likabila lya Lawi hawaweri waneni.

15 Paguwapunga kala wantu wa Lawi na kuwalaviya gambira tambiku ya kunyasuluwa, womberi hawingiri kutenda mahengu gawu Kuliringu Linanagala. 16 Womberi walaviluwa waweri waneni badala ya vipanta njira wa wantu wa Israeli. 17 Kila shipanta njira mwana mpalu mwa wantu wa Israeli, muntu ama nkanyama su kaweriti gwa neni. Shaka panuwagamiziyiti vipanta njira muisi ya Misri, neni nuwatuliti gweka womberi kwajili ya neni namweni. 18 Kumbiti vinu nuwatola wantu wa likabia lya Lawi badala ya vipanta njira wa wana wapalu wa Israeli. 19 Neni nimpanana Aruni pamuhera na wana wakuyi, wantu woseri wa Israeli kuwera mafupu ga kutendera mahengu Kuliringu Linanagala kwajili ya wantu wa Israeli na kuwakolaniziya mawoku wantu wa Israeli nawiza kuhowa pawasegelera Pahala Pananagala."

20 Su Musa na Aruni na shipinga shoseri sha wantu wa Israeli, wawatyekiti wantu wa likabila lya Lawi gambira Mtuwa Mlungu ntambu yakamlagaliriti Musa. 21 Wantu wa likabila lya Lawi walipungiti weni na wagululiti nguwu zawu. Shakapanu Aruni kawalaviriti gambira tambiku ya kunyasuluwa kulongolu kwa Mtuwa Mlungu na kuwapunga su kawakolaniziyiti mawoku. 22 Pa aga, wantu wa likabila lya Lawi wagenditi Kuliringu Linanagala kutenda mahengu gawu pasi pa ugolokera wa Aruni pamuhera na wana wapalu wakuyi. Womberi watenditi gambira Mtuwa Mlungu ntambu yakamlagaliriti Musa.

23 Mtuwa Mlungu kamgambiriti Musa, 24 "Kila muntu gwa likabila lya Lawi yakawera na vinja malongu mawili na muhanu na kwendeleya, yomberi hakatendi mahengu Kuliringu Linanagala, 25 yomberi hakaleki kutenda mahengu Kuliringu Linanagala pakawera na vinja malongu muhanu. 26 Yomberi pakuleka kutenda mahengu, su mekawezi kuwatanga wantu wa likabila lya Lawi wayaguwi pawatenda mahengu Kuliringu Linanagala, kumbiti kalekeziwa ndiri kutenda mahengu Kuliringu mulii. Ayi ndo ntambu yaguwapanana wantu wa likabila lya Lawi mahengu kutenda."