1 Mtuwa Mlungu kawagambiriti Musa na Aruni, 2 wana wa Israeli hawabawili malingu gawu kuzyengeta Liringu Linanagala, kila yumu hakalikali pahala papawera na bendera, papalanguziya kaya yakuyi.

3 Walii yawagenda kulikala uwega wa kwagulawira mshenji kulola kwaguzyeta mshenji, womberi hawaweri shipinga sha wantu yawawera pasi pa bendera ya Yuda na mkulu gwawu hakaweri Nashoni mwana gwa Aminadabu. 4 Shipinga shakuwi hashiweri sha wapalu elufu malongu saba na msheshi na miya sita. 5 Likabila lya Isakari hawabawili malingu gawu pa wantu wa Yuda. Mkulu gwa wantu wa Isakari hakaweri Natanieli mwana gwa Suari. 6 Shipinga shakuwi hashiweri na wapalu elufu muhanu na msheshi na miya msheshi. 7 Shakapanu likabila lya Zebuluni, mkulu gwawu kaweriti Eliyabu mwana gwa Heloni, 8 shipinga shakuwi hashiweri na wapalu elufu muhanu na saba na miya msheshi. 9 Wantu woseri yawagenda kuwera mushipinga sha Yuda kulawirana na vipinga vyawu hawaweri wantu laki yimu na elufu nani na sita na miya msheshi. Womberi hawalongoleri kugenda mwanja.

10 Uwega wa kusika, walii yawawera pasi pa bendera ya shipinga sha Rubeni kulawirana na vipinga vyawu, mkulu gwawu hakaweri Elisuri mwana gwa Shedeuri. 11 Shipinga shakuwi kulawirana na walanga hashiweri na wapalu elufu malongu msheshi na sita na miya muhanu. 12 Shipinga sha Simiyoni hashibawili malingu gawu pa shipinga sha Rubeni, mkulu gwawu hakaweri Shelumieli mwana gwa Surishadai. 13 Shipinga shakuwi hashiweri na wapalu elufu muhanu na tisa na miya tatu. 14 Upeleru likabila lya Gadi, mkulu gwawu hakaweri Eliasafu mwana gwa Deueli. 15 Shipinga shakuwi hashiweri na wapalu elufu malongu msheshi na muhanu na miya sita na malongu muhanu. 16 Wapalu woseri yawawera mushipinga sha Rubeni kulawiranan na vipinga vyawu wawera wantu laki yimu na elufu malongu muhanu na yimu na miya msheshi na malongu muhanu. Womberi hawagendi mumsafara gwa pili.

17 Shakapanu shipinga sha likabila lya wantu wa Lawi paliwera pakati pa vipinga vyoseri, pawapapa Liringu Linanagala lilii, womberi hawauki kugenda mwanja, kila shipinga hashigendi mwanja kwa kugolokela pasi pa bendera yawu.

18 Uwega wa kwaguzyeta mshenji, walii yawawera pasi pa bendera ya shipinga sha Efraimu, hawabawili malingu gawu kulawirana na vipinga vyawu, mkulu gwawu hakaweri Elishama mwana gwa Amihudi. 19 Shipinga shakuwi kulawirana na walanga hashiweri na wapalu elufu malongu msheshi na miya muhanu. 20 Shipinga sha Efraimu pashigenditi kala, su shiziti shipinga sha Manasi. Mkulu gwawu kaweriti Gamalieli mwana gwa Pedasuri. 21 Shipinga shakuyi hashiweri na wantu elufu malongu matatu na mbili na miya mbili. 22 Likabila lya Benjamini, mkulu gwakuyi kaweriti Abidani mwana gwa Gidioni. 23 Shipinga shakuwi shiweriti na wantu elufu malongu matatu na muhanu na miya msheshi. 24 Walanga yoseri ya wantu yawagenda kuwera mushipinga sha Efraimu kulawirana na vipinga vyawu wawera wantu laki yimu na nani na miya yimu. Shipinga ashi sha Efraimu hashiweri mumsafara gwa tatu.

25 Uwega wa kushana, hakuweri na shipinga shashiwera pasi pa bendera ya Dani, mkulu gwawu hakaweri Ahiezeri mana gwa Amishadai. 26 Shipinga shakuwi hashiweri na wantu elufu malongu sita na mbili na miya saba. 27 Shakapanu walii yawabawila malingu paweni, hawaweri wantu wa likabila lya Asheri, mkulu gwawu kawera Pagieni mwana gwa Okurani. 28 Shipinga shakuwi hashiweri na wantu elufu malongu msheshi na yimu na miya muhanu.

29 Likabila lya Nafutali nalu hawafati kugonjera mwanja. Mkulu gwa wantu wa Nafutali kawera Ahira mwana gwa Enani. 30 Shipinga shakuwi hashiweri na wantu elufu malongu muhanu na ntatu na miya msheshi. 31 Wapalu woseri yawalembituwi mushipinga sha Dani waweriti laki yimu na elufu malongu muhanu na saba na miya sita. Shipinga hashi hashiweri sha upeleru kugonjera mwanja kulawirana na bendera zawu.

32 Awa ndo wantu wa Israeli yawalangitwi kulawirana na kaya zawu. Woseri walii yawawera mumalingu na muvipinga vyawu waweriti laki sita na elufu tatu na miya muhanu na malongu muhanu. 33 Kumbiti wantu wa Lawi wawalangituwi ndiri pakati pa wana wa Israeli gambira Mtuwa Mlungu ntambu yakamlagaliriti Musa.

34 Su wantu wa Israeli watenditi kila shintu gambira Mtuwa Mlungu ntambu yakamlagaliriti Musa. Wabawiliti malingu gawu kulawirana na bendera zawu na wagenditi mwanja kila yumu pakagenda na kaya yakuyi na lukolu lwakuyi.