1 Wakulu wa walongu mulukolu lwa Gileadi, mwana gwa Makili, mwana gwa Manase, mwana gwa Yusufu, wagenditi kuyowera na Musa na wakulu wamonga wa lukolu lwa Wantu wa Israeli. 2 Walonga, "Mtuwa gwetu, Mtuwa Mlungu kakulagaliriti kuwabagulira wantu wa Israeli isi kwa kugalambula simbi, kuwera uhala wawu, kakulagaliriti guwapanani viraa wahinga wa Selufihadi yakaweriti mlongu gwetu uhala wa tati gwawu. 3 Kumbiti womberi pawayugwa na wantu wa Israeli wa makabila gamonga, uhala wawu wa alizi haulawi kwa twenga na kugenda kulikabila lyawayugwa, hangu uhala wa twenga hauweri mdidini. 4 Mumsambu gwa kuholera gwa vinja malongu muhanu, vintu vyawashuziti viwuziwa kwa weni, hangu alizi ya wahinga wa Selufihadi hayigendi kulikabila lyawayugituwi hangu likabila lyetu hapeni lipati uhala awu kayi."

5 Su Musa kawalagalira Waisraeli ntambu ayi kulawa kwa Mtuwa Mlungu, kawagambira, "wantu wa lukolu lwa likabila lya Yusufu, watakula nakaka, 6 Na hangu ndo ntambu yakalagaliriti Mtuwa Mlungu kuusu wahinga wa Selufihadi, walekeziwa kuyugwa na muntu yoseri yawamfira, kumbiti wayugwi mukabila lyawu hera. 7 Su uhala wa wantu wa Israeli nawuhamiziwa kulikabila limonga, kila Mwisraeli hakasigalwi na uhala wa lukolu lwakuyi. 8 Mdala yoseri yakawera na uhala wa alizi mulikabila limu lya Israeli ndo mpaka kayugwi na muntu gwa lukolu lwakuyi, su kila Muntu gwa Israeli katoli uhala wa wambuyi wakuyi. 9 Hangu hapeni paweri na uhala woseri wawuhamiziwa kulawa likabila limu mpaka limonga. Kila likabila lya Waisraeli halikoleri uhala wakuyi." 10 Wahinga wa Selufihadi watenditi gambira Mtuwa Mlungu ntambu yakamlagaliriti Musa. 11 Woseri. Mala na Tirizi na Hogila na Milika na Noa wayugwa na wana wapalu wa tati wawu wakulu ama watati wawu wapusu. 12 Wayugitwi muwalongu wa lukolu lwa Manasi mwana gwa Yusufu na uhala wawu usigali mulikabila lya tati gwawu. 13 Aga ndo malagiru na malagizu galii Mtuwa Mlungu kawapananiti wantu wa Israeli kupitira Musa kulalanda za Mowabu, kumwambu kulushemba Yoridani pakwegera na lushemba lwa Yeriku.