1 Shakapanu Miriamu pamuhera na Aruni wanjiti kumlonga vidoda Musa toziya ya mdala muntu gwa Kushi yakamuyugiti. 2 Womberi walongiti, "Hashi, iwera hashi Mtuwa Mlungu kankuyowera na Musa gweka yakuyi? Iwera hashi kayowera ndiri natwenga?" Mtuwa Mlungu kavipikiniriti visoweru avi. 3 Musa kaweriti muntu kananagala kuliku wantu wamonga woseri yawaweriti pasipanu.

4 Palaa palii Mtuwa Mlungu kawagambiriti Musa na Aruni na Miriamu, "Mwizi Muliringu Linanagala, mwenga watatu." Su woseri watatu wagenditi Kuliringu Linanagala. 5 Shakapanu Mtuwa Mlungu kasulukiti mumpanda ya liwundi, kagolokiti paligomi lya kwingilira Muliringu Linanagala, su kawashemiti Aruni pamuhera na Miriamu. Woseri wawili wasegeleriti kulongolu. 6 Su Mtuwa Mlungu kawagambiriti, "Mpikaniri visoweru vyaneni.

Handa kwana mbuyi gwa Mlungu pakati penu,

hanuligubutuli namweni kwayomberi mumawonu,

hantakuli na yomberi mundotu.

7 Kumbiti kwa ntumintumi gwangu Musa,

yomberi kawera mwaminika mugoseri na numupanana lihengu lya kuwalolera wantu waneni woseri.

8 Neni nyowera nayu sheni kwa sheni,

ntakula nayu paweru pota na kufifa.

Yomberi kamona neni ntambu yawera.

Su iwera hashi mtira ndiri kumtakulila madoda ntumintumi gwangu Musa?"

9 Panu Mtuwa Mlungu su kawera na maya na womberi, kawuka na kagenda zakuwi. 10 Liwundi paliwukiti kumpindi kuliringu lya kuliwona, Miriamu kawoneka kana ulweri wa likuli, mfufu mbuu handa lifukafuka. Aruni pakagalambukiti na kumlola Miriamu, kalikangasha kuwona handa kana ungumbula. 11 Panu, Aruni kamgambira Musa, "Gwee mtuwa gwangu, nagututenda toziya tutenda vitwatira vya unkali mahala na kutenda vidoda. 12 Nagumtenda Miriamu kaweri gambira mwana yakiwukiti mukahowa, mweni nusu ya nshimba yakuyi iwola."

13 Musa kamlilira Mtuwa Mlungu pakalonga, "Nukuhiga gwee Mlungu, gumponiziyi."

14 Kumbiti Mtuwa Mlungu kamgambiriti Musa, "Handa tati gwakuyi mekamtemeri mata kusheni su kumberiziya, hashi mekaweri ndiri na soni kwa mashaka saba? Su gumlaviyi kunja kukambi kalikali aku kwa mashaka saba, shakapanu guweza kumlekeziya kawuyi mukambi." 15 Su Miriamu kawingituwiti kagendi kunja kukambi kwa mashaka saba. Wantu wanjiti ndiri mwanja mpaka Miriamu pawamuwuziyiti kayi Mukambi.

16 Pa aga, wantu wanjiti mwanja kulawa Haseroti, womberi wabawaliti malingu gawu mushiwala sha Parani.