1 Su Mtuwa Mlungu kamgambiriti Aruni, "Paiwera likosa litenduwa na muntu gwa likabila lya Lawi Kuliringu Linanagala, likosa ali haliweri kwaku gamweni na kwa wana waku na wantu wa likabila lyaku. Viraa virii makosa aga pagatendeka mumahengu ga utambika waku, gamweni pamuhera na wana waku hamtozuwi. 2 Gwenga na wana waku na walongu waku, hawatendi mahengu gambira watambika, walongu waku wamonga wa likabila lyaku hawatendi mahengu pamuhera na gwenga kulongolu kwa Liringu Linanagala. 3 Womberi hawatendi mahengu gwaguwapanana na kutenda utenderu wau Kuliringu Linanagala. Kumbiti wahera ulekeziwu wa kuvishinkura vyombu vya Liringu Linanagala, nawiza kuhowa na gwenga haguhowi viraa. 4 Womberi hawaweri pamuhera na gwenga mumahengu na kutenda utenderu wawu kuusu mahengu goseri ga Liringu Linanagala na kuwera na muntu gwingi nakakusegelera pagutenda lihengu lya utambika. 5 Mwenga hamtendi mahengu ga Liringu Linanagala pamuhera na pashitalawanda sha kutambikira, su maya gangu nagiza kuwalawila kayi Waisraeli. 6 Ndo neni yanuwasyaguliti walongu wenu wa likabila lya Lawi pakati pa Waisraeli kuwera laviwu kwa mwenga. Womberi watuluwa gweka kwajili yaneni Mtuwa Mlungu, su watendi mahengu Muliringu Linanagala. 7 Kumbiti gwenga gweka yaku na wana waku hamtendi mahengu goseri ga utambika kwajili ya shitalawanda sha kutambikira na vyoseri vyaviweramu Mupahala Pananagala Nentu. Aga ndo mahengu genu, toziya niwapanani lifupu lya utambika. Muntu yoseri yakawera ndiri mtambika, pakavisegelera vyombu vya Liringu Linanagala, hakalagwi."

8 Mtuwa Mlungu kamgambiriti Aruni, "Nankupanana malaviwu yampanitwi na Waisraeli, vintu vyoseri vinanagala vyawampanitwi neni. Vintu vyoseri vyavityekuwitwi na Waisraeli. Nankupanana vintu vyoseri gwenga na shileri shaku kuwera lifungu lyamwenga, ali hampananwi mwenga mashaka goseri. 9 Pakati pa vintu vinanagala nakamu, virii vyavigenda kulunguziwa nakamu mumotu, avi haviweri vyamwenga. Tambiku za viboga na tambiku za kuwusiya vidoda na tambiku za kuwakolaniziya mawoku. Kila shintu wantu shawagenda kundavilira kuwera tambiku nanagala hashiweri shagwenga na wana waku. 10 Hamuviliyi vintu avi gambira vintu vinanagala nentu Mupahala Pananagala na wapalu hera ndo yawaviliya, vintu avi ndo vinanagala kwa mwenga."

11 "Viraa vintu vyamonga vyoseri vyawagenda kundavilira Waisraeli kuwera tambiku za kunyasulwa, haviweri vyagwenga. Nikupanana gwenga na wana wapalu waku na wahinja waku kuwera lifungu lya mwenga mashaka goseri. Muntu yoseri muwalongu waku yakawera ndiri muhumba kaweza kuviliya vintu avi."

12 "Nikupanana vintu vyoseri viherepa vyavilawirana na viboga vya kwanja kukamala virii Waisraeli vyawandavilira, lipaki liherepa lya mizyetuni na divayi pamuhera na mbunji. 13 Viboga vyoseri vya kwanja vya mabwajubwaju yagakama mumalambu gawu, galii gawanjegera neni, hagaweri ga gwenga. Kila muntu yakawera ndiri muhumba muwalongu waku, su kawea kuliya."

14 "Kila shintu shashityekuwitwi muisi ya Israeli hashiweri shamwenga."

15 "Kila shipanta njira ulii Waisraeli yawagenda kundavilira, pashiwera shipanta njira sha muntu ama nkanyama, hashiweri shaku. Kumbiti gufiruwa guwakomboli wapanta njira woseri wa wantu na kila shipanta njira sha nkanyama yakawera muhumba mpaka kakombolowi. 16 Wapanta njira hawakombolowi pawawera na umuli wa mwezi gumu kwa kulipiwa vipandi muhanu vya madini ga feza, kulawirana na vipimu vyavitulitwi Muliringu Linanagala. 17 Kumbiti wapanta njira wa wankanyama wa wang'ombi na kondolu ama wambuzi nawakombolewa. Awa ndo wananagala. Mwazi gwawu hagushimishiri shitalawanda sha kutambikira na lipaki lyawu hagulilunguziyi nakamu kuwera tambiku ya kulunguziwa nakamu kuwera na ununkira uherepa yaguherepeziya neni Mtuwa Mlungu. 18 Vinofu vyawu guweza kuviliya vyavilaviwa, handa vidari na ligulu lya kumbeli lya kumliwu vyavilaviwa kuwera tambiku ya kunyasuluwa."

19 "Nikupanana gwenga, wana waku wapalu na wahinja waku, vintu vyoseri virii wantu wa Israeli vyawagenda kundavilira, avi ndo lifungu lya mwenga mashaka goseri. Ali ndo lipatanu lya mashaka goseri kulongolu kwa neni, lilii liwera kwajili yaku na shileri shaku."

20 Mtuwa Mlungu kamgambiriti Aruni, "Gwenga hapeni guweri na uhala woseri muisi yawu, ama lifungu lyaku pakati pawu, neni ndo lifungu lyaku na hanikupanani shilii shagufira pakati pa Waisraeli."

21 "Niwapanani lifungu lya lilongu wantu wa likabila lya Lawi, lifungu lilii lyoseri Waisraeli yawagenda kundavilira kuwera uhala wawu. Aga hagaweri malipu gawu kwa mahengu gawatenda mukulolera weri Liringu Linanagala. 22 Kwanjira vinu, wantu wamonga wa Israeli nawasegelera Liringu Linanagala, nawiza kuwoneka watenda vidoda na kuhowa. 23 Kumbiti wantu wa likabila lya Lawi gweka yawu, weni hawatendi mahengu Muliringu Linanagala, na hawazibiwi handa shintu shoseri shidoda pashilawira Muliringu lilii. Ali liwera lagaliru lya mashaka goseri muvileri vyamwenga vyoseri. Wantu wa likabila lya Lawi hapeni waweri na ulunda wa kuhala muisi ya Israeli, 24 toziya lifungu lya lilongu lyawandavilira Waisraeli, niwapanani kuwera lyawu. Ndo mana ntakula kuwera womberi hapeni wahali pakati pa Waisraeli."

25 Shakapanu Mtuwa Mlungu kamgambiriti Musa, 26 Kayi haguwagambiri wantu wa likabila lya Lawi malagizu aga. "Shaka pamuliwanka lifungu lya lilongu lilii Mtuwa Mlungu lyakawapananiti kulawa kwa Waisraeli liweri lyamwenga, mwenga hamundaviliri neni Mtuwa Mlungu semu yimu ya lilongu lya lifungu ali. 27 Tambiku ayi yamwenga haijimiruwi kuwera handa malimbuku ga viboga ama handa zyabibu zyakandavilira mlimi. 28 Su hangu ndo vyamgenda kundavilira neni Mtuwa Mlungu tambiku za lifungu lya lilongu lyamgenda kuwanka kulawa kwa Waisraeli. Lifungu lya lilongu lyamgenda kundalivira neni Mtuwa Mlungu, hamumpanani mtambika Aruni. 29 Kulawirana na malaviwu goseri gamgenda kuwanka, mwenga hamundaviliri neni Mtuwa Mlungu lifungu lya lilongu lya semu iherepa nentu kuliku zoseri na nanagala. 30 Su gwenga haguwagambiri, pamundavilira kala semu iherepa nentu kuliku zoseri, semu yaisigala hayiweri ya mwenga, ntambu yaiwera kwa mlimi ulii yakatola shashisigaliti pa kulaviya tambiku zakuyi za mabenu ga kwanja kukamala ga viboga na zyabibu. 31 Na mwenga hamliyi shashilaviliwitwi pamuhera pahala poseri palii pamuhera na walongu wenu mana ashi shiwera shibenamgongu shenu toziya ya utenderu wenu Muliringu Linanagala. 32 Hapeni muweri na likosa lyoseri pamuliya vintu avi, payiwera mumlavilira Mtuwa Mlungu semu iherepa nentu kuliku zoseri, mwenga hapeni muvihigilangi vintu vinanagala vya Waisraeli na kuhowa."