1 Pashiru palii wantu wanjiti kulila kwa liziwu likulu na waliliti pashiru poseri. 2 Womberi wawalalamikiriti Musa na Aruni pawalonga, "Mbaka metuhowiti kulii Misri! Mbaka metuhowi palaa panu pashiwala! 3 Iwera jashi Mtuwa Mlungu kankutujega Muisi ayi? Hatulaguwi munkondu, wadala wetu pamuhera na wana wetu hawatoluwi kwa mamakala. Hashi iwera ndiri mbaka twenga kuwuya muisi ya Misri?" 4 Su wanja kuligambiziyana, "Su aya tuwasyaguli wakulu wamonga, tuwuyi muisi ya Misri!"

5 Palii Musa na Aruni wasuntamiti makukama kulongolu kwa shipinga shoseri sha Waisraeli. 6 Yoshua mwana gwa Nuni, Karebu mwana gwa Yefune, walii yawaweriti wamu wa walii yawagenditi kuilolalola weri isi ilii, su wazipapuliti nguwu zawu 7 na kushigambira shipinga shoseri sha Waisraeli, "Isi yatugenditi kuilolalola weri iherepa nentu. 8 Payiwera Mtuwa Mlungu kaherepeziwa na twenga, hakatujegi aku na kutupanana isi yaiwera na ulunda na utapaka wakuyi uwera na mbotu na isi iherepa na ifaa kwa mifugu na kulima. 9 Kumbiti hera namumlema Mtuwa Mlungu, ama kuwatira wenikaya wa isi ilii. Toziya twenga hatuwankaki kalongola. Shidiwiru shawu shiwusiwa kala kulongolu kwawu, Mtuwa Mlungu kapamuhera na twenga, su namuwatira!" 10 Kumbiti shipinga shoseri shitakuliti kuusu kuwagumanga mabuwi. Palaa palii ukwisa wa Mtuwa Mlungu gulawiriti pa Liringu Linanagala, kulongolu kwa Waisraeli woseri.

11 Shakapanu Mtuwa Mlungu kamgambiriti Musa, "Hashi wantu awa hawanzarawu mpaka ndii? Hashi mpaka ndii hawendereyi kujimira ndiri, ata pamuhera na mawuzawuza goseri ganuwatenderiti pakati pawu? 12 Hanuwakomangi kwa malweri madoda na kawagamiziya, kumbiti kulawirana na gwenga, hanikutendi gwenga Musa kuwera isi nkulu na yaiwera na makakala kuliku womberi."

13 Kumbiti Musa kamgambiriti Mtuwa Mlungu, "Gwenga guwalaviyiti wantu awa muisi ya Misri kwa likakala lyaku. Wantu wa Misri pawapinira handa guwatendera hangu wantu waku, 14 Wantu wa Misri hawawagambiri wantu wa shiyiwuku sha Kanaani toziya gwenga gwee Mtuwa Mlungu, guwera pamuhera na twenga, gwee Mtuwa Mlungu guwonekinikiti paweru liwundi lyaku paligoloka panani petu, viraa gwenga gutulongolera paliwala kwa mpanda ya liwundi na pashiru kwa mpanda ya motu. 15 Su vinu paguwalaga wantu waku woseri kwa mala yimu, wantu wa isi zimonga zyazipikaniriti kala ujumbi waku hawalongi, 16 Mtuwa Mlungu kawalagiti wantu wakuyi kushiwala toziya kasinditi kuwajega kuisi yakalagiliriti kuwapanana. 17 Su vinu nikuluwa, gwee Mtuwa Mlungu, gutulanguziyi uwezu waku kwa kutenda ntambu yagutulagiliriti pagulongiti, 18 neni Mtuwa Mlungu wera ndiri na maya ga kalongola, neni wera na uheri uvuwa, viraa negeziya makontola pamuhera na makosa. Kumbiti kwantambu yoseri ilii hapeni ndeki kuwatoza wana na wazukulu mpaka shileli sha tatu na shamsheshi kwa vidoda vya walera wawu. 19 Nikuluwa guwalegiziyi wantu awa vidoda vyawu, ntambu yagwendereyiti kuwalegeziya kwanjira walawi muisi ya Misri mpaka vinu."

20 Mtuwa Mlungu kamwankuliti, "Nuwalegeziya ntambu yaguluwiti. 21 Kumbiti nakaka weza ndiri kuhowa na ukwisa wangu ntambu yawendereya kumema pasipanu, 22 kwahera ata yumu gwawu ulii yakauwoniti ukwisa waneni pamuhera na mawuzawuza gangu nagutenditi Misri na kushiwala shakapanu kunjera mara zoseri azi pota kujimira liziwu lyangu. 23 Womberi hapeni kayiwoni isi ilii yanulagila kuwapanana wambuyi wawu, su ata walii yawanzarawu viraa hapeni waiwoni. 24 Kumbiti Karebu yakantendera neni weri kuliku na wamonga. Yomberi kanjimiriti neni nakamu. Su hanumjegi muisi ilii yakaiwoniti kala, shiyiwuku shakuwi hashihali isi ilii. 25 Toziya Waameleki na Wakanaani walikala mulilaranda lya isi ilii, shirawu mgalambuki kumbeli mgendi kushiwala kugenda bahari ya Shamu." 26 Shakapanu Mtuwa Mlungu kamgambiriti Musa na Aruni, 27 "Shipinga ashi sha wantu yawatenditi vidoda hawendreyi kuhinginika mpaka ndii? Neni ntoka na mahinginiku ga Waisraeli kuusu neni! 28 Vinu guwawankuli hangu, ntambu yanilikala, nonga neni Mtuwa Mlungu, su hanuwatenderi galaa galii yanigapikaniriti pamugatakuliti. 29 Hamuhowi na nshimba zenu haziyaswi mlaamu kushiwala, toziya muhinginikira neni, kwahera ata yumu gwenu yakawera na umuli gwa kwanjira umuli gwa malongu mawili na kwengdereya, 30 yakagenda kwingira muisi ilii neni yanilagiliti kuwapanana iweri ya mwenga, kumbiti Karebu mwana gwa Yefune na Yoshuwa mwana gwa Nuni ndo hawingiri. 31 Mwenga mtakuliti kuwera wana wenu hawatoluwi kwa makakala, kumbiti neni haniwafikiziyi wana wenu muisi yamuilemiti, su waimani na iweri isi yawu. 32 Kumbiti mwenga hamuhowi mlaamu mushiwala! 33 Wana wenu hawayeriyeri na kutabika kushiwala kwa vinja malongu msheshi kwa gwenu gwa upeleru pakahowa kushiwala. 34 Kulawirana na vidoda vyenu, hamtabiki kwa vinja malongu msheshi, teratera na mashaka galii gamlolitiloliti weri isi ilii, shinja shimu kwa kila lishaka limu, mwenga hamuvimani kuwera neni nkalala na avi. 35 Neni Mtuwa Mlungu ntakula, nakaka hanuwatenderi hangu mwenga mwawoseri wamjojonika panu na kunema. Woseri hawapeli mlaamu kushiwala na amu hamuhowi."

36 Wantu lilongu walii Musa yakawatumiti kugenda kuilolalola weri isi ilii wawuyiti na kuwatenda wantu wamuhinginikiri Mtuwa Mlungu kwa kujega visoweru vidoda vya isi ayi, 37 wantu walii yawalaviyiti visoweru vidoda kuusu isi ayi, wahowiti kwa likomangu kulongolu kwa Mtuwa Mlungu. 38 Kumbiti Yoshuwa mwana gwa Nuni na Karebu mwana gwa Yefune, wasigaliti wakomu pakati pa walii yawagenditi kuilolalola weri isi ilii.

39 Musa pakawagambiriti Waisraeli woseri na womberi waliriti kwa utama uvuwa. 40 Shirawu yakuyi, womberi wimukiti mandawira putiputi, wagenditi semu za muvigongu, pawalonga, "Vinu tuwera kala kugenda pahala palii Mtuwa Mlungu kwakatulagiliti. Twenga tulonga kuwera tutenditi vidoda."

41 Kumbiti Musa kalongiti, "Vinu iwera hashi mulilema lilagaliru lya Mtuwa Mlungu? Su hapeni mkanki! 42 Namgenda aku kuvigongu namwiza kukomanguwa na wangondu wenu, toziya Mtuwa Mlungu kawera ndiri pamuhera na mwenga. 43 Pamuwagendera Waameleki na Wakanaani, mwenga hamuhowi munkondu toziya mleka kumfata Mtuwa Mlungu, mweni hapeni kaweri pamuhera na mwenga."

44 Pamuhera na aga, womberi wasisitiziti kugenda kulugongu, tembera Lisandiku lya Lipatanu lya Mtuwa Mlungu, kumbiti Musa kawukiti ndiri kukambi. 45 Ndo Waameleki na Wakanaani, yawalikaliti muisi ayi vigongu, su wasulukiti wawakomangiti na kuwakanka, wawawingiti mpaka kumji gwa Horima.