1 Shakapanu Kola mwana gwa Ishali, gwa lukolu lwa Kohati lyaulawiti mulikabila lya Walawi, wawatola wantu pamuhera na wantu watatu wa lukolu lwa Rubeni, womberi waweriti Datani na Abiramu wana wa Eliabu na Oni mwana gwa Peleti. 2 Woseri wajimilitwi na wakulu wamanikana miya mbili na malongu muhanu yawasyagulitwi na wantu woseri Waisraeli, womberi wamlemiti Musa. 3 Wajojonikiti kulongolu kwa Musa na Haruni wawagambira, "Mwenga mpita kuliku! Shipinga shoseri ndo shinanagala na kila muntu mushipinga ashi mnanagala, na Mtuwa Mlungu ka panu na twawoseri twenga. Iwera hashi vinu mwenga mulitenda mwawatuwa wa wantu woseri wa Mtuwa Mlungu?"

4 Musa pakapikiniriti aga kaliyasa pasi makukama. 5 Shakapanu kamgambira Kola na wantu yajimirana na yomberi, "Shilawu mandawira, Mtuwa Mlungu hakalanguziyi gaa ndo gwakuyi na gaa yakawera mnanagala, na yomberi hakamsyaguli hakamtendi kasegeleri pakutambikira. 6 Su mtendi hangu mandawira, gwenga pamuhera na wantu waku, hamtoli vyetezu vyakutumiziya ubani, 7 Mtuli makala ga motu mngati na kulekera ubani kumpindi kwakuyi, shakapanu hamvijegi kulongolu kwa Mtuwa Mlungu na hatuwoni gaa kasyagulitwi na Mtuwa Mlungu na mwenga Walawi mpita kuliku!" 8 Musa kendereya kumgambira Kola, "mpikinirani, mwenga wantu wa Walawi! 9 Hashi, mwona ndo shisoweru shididini kwa mwenga handa Mlungu gwa Israeli kawasyagula mwenga muwamu mwa shipinga sha Waisraeli, su muwezi kumsegelera, mtenderi muliliringu lya Mtuwa Mlungu na kuyitendera na kushitumikira shipinga shoseri? 10 Kawapanana ligoya lya kuwera pakwegera na yomberi, mwenga pamuhera na Walawi wayenu woseri. Vinu mfira kunyasula hata utambika? 11 Hangu mwenga na shikundi shaku mwankumkomanga Mtuwa Mlungu, mwenga mwangumlalamikira Aruni, kumbiti nanaka muwera mwankulalama kuusu Mlungu."

12 Musa katumiti ujumbi kwa Datani na Abiramu wana wa Eliabu su washemuwi, kumbiti womberi walonga, "Hapeni twizi! 13 Hashi, ndo shisoweru shididini handa gutulaviya Misri, isi ya kuliyiziya mifugu na kulima, su gwizi kutulaga amu kushiwala? Kayi, gulitenda gwa mkulu gwetu! 14 Nentu ya aga, gutujega ndiri muisi yaifaa kuliyiziya mifugu na kulima, pota kutupanana uhala wa malambu na malambu ga mizabibu, gulihola haguwatendi wantu awa kuwera wanalwisi? Hapeni twizi!"

15 Musa kakalaliti nentu, kamgambira Mtuwa Mlungu "Naguzijimira tambiku za wantu awa. Neni hanenitoli punda gwa muntu yoseri, pota hanimtendi muntu!"

16 Musa kamgambiriti Kola, "Shirawu naguleka kwiza pamuhera na wandundami waku kulongolu kwa Mtuwa Mlungu. Aruni viraa hakaweri. 17 Kila yumu gwenu katola shetezu shakuwi, na kulekera ubani, shakapanu hakashijegi kulongolu kwa Mtuwa Mlungu, kwa jumla haviweri vyetezu miya mbili na malongu muhanu, kwa vyoseri haviweri miya mbili malongu mhanu, gwenga viraa na Aruni, kila yumu hakaweri na shetezu shakuwi."

18 Su, kila yumu gwawu katola shetezu shakuwi, kalekera makala ga motu na ubani, shakapanu wagenda na kugoloka paligomi lya liringu lya kuliwona, pamuhera na Musa na Aruni. 19 Na Kola kawajojonira wantu woseri pamuhera, wagoloka kulongolu kwa Musa na Aruni weni waweriti paligomi lya liringu lya kuliwona. Ndo ukwisa wa Mtuwa Mlungu uwalawira wantu woseri! 20 Panu Mtuwa Mlungu kamgambiriti Musa na Aruni, 21 "Mlituli gweka na wantu awa, nuwalagi vinu hera."

22 Kumbiti Musa na Aruni waliyasa pasi makukama na kulonga "Gwee Mtuwa Mlungu yaguwera shyanjiru sha ukomu kwa viumbi vyoseri. Hashi, muntu yumu pakakoseya, hagushikalaliri shipinga shoseri?"

23 Mtuwa Mlungu kamgambiriti Musa, 24 "Guwagambiri wantu wawuki pakwegera na pawalikala kuliringu lya Kola, Datani na Abiramu." 25 Su, Musa kagenda kwa Datani na Abiramu, pawamfata wazewi wa Israeli. 26 Pakasokiti, kawagambira wantu, "Shondi muwuki mumaringu ga wantu awa wakondola namshinkula shintu shoseri, namwiza kulaguwa pamuhera nawomberi toziya ya vidoda vyawu vyoseri." 27 Su wantu wawukiti mumalingu ga Kora na Datani na Abiramu.

Datani na Abiramu walawiti mumalingu gawu na wagolokiti paligomi pawawera na wadala wawu na wana wawu woseri ata walii yawaweriti wakonga. 28 Panu Musa kawagambira wantu, "Hangu ndo ntambu yamfira kuvimana handa Mtuwa Mlungu yakantumiti kuvitenda vitwatira vyoseri avi, pota kwafira namweni ndiri. 29 Wantu awa pawahowiti ntambu yawahowa wantu wamonga, ama pawapata matatizu handa wamonga, su mumani Mtuwa Mlungu kantuma ndiri. 30 Kumbiti Mtuwa Mlungu katenda shitwatira sha syayi, alizi igubutuka na kuwamira wantu awa pamuhera na kila shintu shawu, wagenda kuzimu pawawera wakomu, su hamuvimani kuwera wantu awa wamlemiti Mtuwa Mlungu."

31 Katepu hera pakamaliliti kutakula visoweru vyoseri avi, alizi pasi pa Datani na Abiramu igubutuka 32 kuwamira wantu awa, walongu wau, pamuhera na wantundami woseri wa Kola na lunda zawu zoseri. 33 Su, womberi, pamuheri na vyoseri vyawaweriti navi, wasuluka kuzimu pawawera wakomu. Alizi iwagubikira woseri wagamilira. 34 Wantu woseri wamonga yawaweriti pakwegera pawapikiniriti kulila kwawu watira pawalonga, "Tutugi, alizi naiyiza kutumira na twenga viraa."

35 Shakapanu Mtuwa Mlungu kajega motu kawalunguziya wantu walii mia mbili na malongu mhanu yawagenditi kutumiziya ubani Kuliringu Linanagala.

36 Pa aga Mtuwa Mlungu kamgambira Musa, 37 "Gumgambiri Eliezari mwana gwa mtambika Aruni kavilaviyi vyetezu avi pamotu, kagupalasiya kutali motu gwa guweriti mngati, toziya vyetezu avi ndo vinanagala. 38 Viwera vinanagala toziya wantu awa wavijegiti pakutambikira pa Mtuwa Mlungu su guvitoli vyetezu vya wantu awa yawalagitwi toziya ya vidoda vyawu wavipondi viweri vibabani su shiweri shifiniku sha pakutambikira. Ali haliweri liberiziwu kwa Wantu wa Israeli woseri." 39 Su, Mtambika Eleazari kavitoliti vyetezu avi vya shaba vyeni wavijegiti kulongolu kwa Mtuwa Mlungu na wantu walii yawalaguwitwi waziponda kuwera shifiniku sha pakutambikira. 40 Ali liweriti likalipiru kwa Waisraeli kuwera muntu yoseri yakawera mtambika ndiri, yaani kaweriti gwa ukomu wa Aruni ndiri nakagenda pakutambika kumtumizilira Mtuwa Mlungu ubani. Hera hangu hakalagwi handa Kola na wantundami wakuyi. Goseri aga gatendekiti Mtuwa Mlungu ntambu yakawagambiriti Eleazari kwa kupitira Musa.

41 Shirawu yakuyi Waisraeli woseri wamlalamikira Musa na Aruni pawalonga, "Muwalaga wantu wa Mtuwa Mungu." 42 Pawajojonikiti palongolu pa Musa na Aruni su kulaviya malalamiku gawu, wagalambikiti kulola liringu lya kuliwona, wawona handa liwundi ligibikira Liringu Linanagala na uweru wa Mtuwa Mlungu uweriti ulawira panu. 43 Musa na Aruni wagenditi, kugoloka kulongolu Kuliringu Linanagala lya kuliwona. 44 Na Mtuwa Mlungu kamgambiriti Musa, 45 "Gulituli gweka na wantu awa, nuwalagi mala yimu!" Kumbiti womberi waliyasa pasi makukama. 46 Musa kamgambira Aruni, "Gutoli shetezu shaku, gushilekiri motu na kushitula pabwega pakutambikira, gushilekeri ubani shakapanu gugendi nashu kalongola kwa wantu na kuwatendera ukolaniziwu mawoku. Gutendi kalongola! Maya ga Mtuwa Mlungu gawafikira kala na likomangu lyanja kuwakomanga." 47 Su, Aruni katenda ntambu yakagambiritwi na Musa. Katoliti shetezu shakuwi na kutuga mpaka pakati pa wantu yawaweriti wajojonika pamuhera. Pakawoniti handa komangu lyakwanja kala, kalekera ubani mushetezu na kuwatendera wantu ukolaniziwu. 48 Pakatenditi hangu, likomangu lilii liyoya, na yomberi kasigala pakati pa yawahowiti na yawaweriti wakomu. 49 Wantu woseri yawahowiti kwa likomangu waweriti elufu lilongu na msheshi na miya saba, pota kuwalanga walii yawahowiti kulawirana na ukondola wa Kora. 50 Likomangu paliyoyiti, Aruni kawuyiti kwa Musa kuligomi lya Liringu Linanagala.