1 Mtuwa Mlungu kayowiriti na Musa mululalanda lwa Mowabu, kumwambu kulushemba lwa Yoridani, pakwegera na Yeriku. Kamgambira. 2 "Guwagambiri Waisraeli kuwera kulawirana na uhala yawafira kuukolamlima, wawapanani Walawi miji ya kulikala na semu za kuliyiziya mifugu mumbwega mwa miji ayi. 3 Miji ayi hayiweri ya Walawi na hawalikali amu na maliwuziwu gakuyi hagaweri kwanjili ya ng'ombi na mifugu yawu pamuhera na wakanyama wawu wamonga. 4 Maliwuziwu ga semu yamfira kuwapanana wantu wa Lawi mumbwega ya miji hayieneyi kila uwega utali wa mita miya msheshi na malongu mhanu kulawa mushibambaza sha miji ayi. 5 Hangu, enewu ali lya maliwuziwu haliweri lya mita miya tisa, na halieneyi kila uwega wa mji, mji gweni haguweri pakatikati. Enewu ali haliweri maliwuziwu gawu mbwega mwa miji yawu. 6 Hamuwapanani wantu wa Lawi miji sita ya matugiru yeni muntu pakamlaga myuguwi pota kufira hakajimiluwi kutugira pamuhera na aga, hamuwapanani miji imonga malongu msheshi na mbili. 7 Walanga yoseri ya miji yamfira kuwapanana Walawi hayiweri malongu msheshi na minani, hamwapanani miji ayi pamuhera na semu zakuwi za kuliyiziya. 8 Walanga yoseri ya miji yamfira kawapanani Wantu wa Lawi muuhala wa Waisraeli hayitumbili ukulu wa likabila, likabila likulu halilaviyi miji ivuwa na likabila lididini halilaviyi miji mididini. Kila likabila lya Waisraeli halilaviyi miji kwajili ya Walawi kulinganira na enewu lyalifira kuhala."

9 Mtuwa Mlungu kayowera na Musa, kamgambira. 10 Guwagambira "Waisraeli handa shipindi pawafira kuloka lushemba Yolidani na kwingira muisi Kanani, 11 hamsyaguli miji yaiwera miji ya kutugira handa muntu pakamlaga muyaguwi pota kufira hakawezi kutugira. 12 Miji ayi hayiweri pahala pa kutugira su ayu yakalaga nawamlaga na yakamwuzilira pamberi pa kutozwa na wantu. 13 Hamyituliri gweka miji sita kwajili ya kutugira. 14 Pakati pa miji sita ayi yamyitula gweka, mitatu iweri kwagulawa mshenji mwa Yoridani, na mitatu iweri muisi ya Kanani. 15 Miji ayi hayiweri ya kutugira kwajili ya Waisraeli na wahenga wa mashaka goseri ama shipindi shifupi yawalikala pamuhera na womberi. Muntu yoseri yakamlaga umonga pota kufira kaweza kutugira aku."

16 "Kumbiti muntu pakamkoma myaguwi kwa shintu sha shuma, kahowa, muntu ayu yakalaga ndo mpaka wamlagi. 17 Muntu yoseri pakamguma myaguwi libuwi, kahowa, muntu ayu yakalaga, ndo mpaka wamlagi. 18 Handa pakamkoma myaguwi kwa shintu shashinyawitwi na mtera shimtenda kahowi, muntu pakaliwona na ayu yakalaga, hakatendi toza ya kulaga. 19 Mlongu gwapakwegera na muntu yawamlagiti hawamuwuziliri. Ayu pakaliwona na mlaga ayu, hakatendi toza ya kulaga."

20 "Ntambu iraa, handa muntu pakamkalalira myaguwi shakapanu, kamsukuma ama kamyasira shintu kwa kumgwadira, 21 Ama kwa kumkoma ngumi kahowa, su muntu ayu yakamkomiti myaguwi mlaga na ndo wamlagi. Walongu wa pakwegera wa muntu ayu yawamlagiti hakawuziliri pawaliwona na yomberi."

22 "Kumbiti handa muntu pakamsukuma myaguwi vumu pota kuvimana ama kumyasira shintu pota kumgwadira. 23 Ama muntu pakamguma libuwi lyaliweza kumtenda kahowa, na kumlaga muntu pota kufira, tembera paweriti ndiri na unkondu pakati pawu su kafiliti ndiri kumlaga, 24 Su wantu wa Waisraeli hawaamuwi pakati pa muntu yakalaga na walongu wa muntu yawamlagiti yakafira kuwuzilira, kulinganira na lagaliru azi. 25 Wantu wa Waisraeli hawamlopoziyi muntu ayu yakalagiti mumawoku mwa walongu wa muntu yawamlagiti na kumwuziya kumji gwa kutugira mwakaweriti katugira. Hakalikali aku mpaka kuhowa kwa mtambika mkulu gwa shipindi ashi yawamsyaguliti kwa kuswagwa lipaki linanagala. 26 Kumbiti yakalagiti ayu pakalawa kunja kumji gwakatugiriti shipindi shoseri shilii. 27 Shakapanu walongu wa muntu yawamlagiti kampata kunja kumbaka ya mji agu gwa kutugira wamlaga ayu hapeni kaweri na likosa lya kulaga. 28 Toziya ayu yakalagiti kalikali mngati mwa mji gwa kutugira mpaka mtambika mkulu pakahowa, kumbiti pakahowiti kala mtambika kaweza kuwuya ukaya. 29 Lagaliru azi hazitenderuwi muviyiwuku vyenu nyoseri, pahala poseri pamlikala."

30 "Muntu yoseri yakalaga muntu, hawamtozi kuhowa kulawirana na ukapitawu wa wakapitawu wawili ama nentu, muntu yoseri kaweza ndiri kutozwa kuhowa kulawirana na ukapitawu wa muntu yumu. 31 Namwanka malipu goseri kugalopuziya makaliru ga yakalaga yakapatikaniti na likosa, hakatozwi kuhowa muntu ayu mpaka kalaguwi. 32 Namwenga pota kujimira malipu goseri kulawa kwa muntu yakatugiriti mji gwa kutugira su kumjimira kawuyi kulikala ukaya kwakuyi pamberi pakuhowa mtambika mkulu. 33 Pamtenda ntambu ayi hamuweri mjimilika ndiri kulongolu kwa neni mji gwamlikala. Gwitanga mwazi kuyilekera isi kujimilika ndiri na neni, na kwahera tambika yaiweza kutakasiya isi yaitenderitwi ulaga ila kwakumlaga ayu. 34 Kotu kuyitenda nayijimilika ndiri kwa neni isi yamlikala, isi yeni neni nilikala toziya neni Mtuwa Mlungu nilikala muwamu mwenu Waisraeli."