1 Mtuwa Mlungu kamgambira Musa, 2 Guwagambiri wana wa Israeli malagaliru aga. Payiwera mpalu ama mdala pakafira kutula nazili, lagiru ya kulityeka kwajili ya Mtuwa Mlungu, 3 yomberi nakalanda divayi ama ujimbi, nakalanda isheshema ya divayi ama isheshema ya ntambu yamonga. Viraa nakalanda togwa yailawirana na zabibu ama kuliya zabibu zyaziwuliti ama zyaziyumiti. 4 Shaka shoseri pakawera mlagila, yomberi nakaliya shintu shoseri shashilawirana na mzabibu, kwanjira mbeyu ama mibaku yakuyi.

5 Mashaka goseri ga nazili yakuyi kwa kujitula gweka, hapeni kamogi mvili mumtuwi mwakuyi. Yomberi kafiruwa kaweri mnanagala kwa kulityeka kulongolu kwa Mtuwa Mlungu mpaka shaka shakuwi pashipera, hakazileki mvili zakuwi ziweri ntali. 6 Shaka shoseri shakulityeka kwajili ya Mtuwa Mlungu, yomberi nakasegelera mitugulu. 7 Ata paiwera mtugulu gwa tati ama mawu gwakuyi ama kaka ama dada gwakuyi, yomberi nakiza kulitula uhakata kulongolu kwa Mlungu toziya kalityekiti kwajili ya Mtuwa Mlungu kwa lapilu. 8 Shaka shoseri pakawera mnazili, su hakaweri mtyeka kwajili ya Mtuwa Mlungu.

9 Handa muntu yoseri pakahowa vumu kulongolu kwakuyi mnazili, mvili zakuyi pazituluwa uhakata kulongolu kwa Mlungu, muntu yakatula nazili ulii hakamogi mvili zakuyi lishaka lya kupungiwa kwakuyi mulishaka lya saba. 10 Mulishaka lya nani yomberi hakajegi wankunda wawili ama wateteli wawili kwa mtambika kulongolu kwa ligomi lya kwingirira Muliringu Linanagala. 11 Mtambika hakamlaviyi mpongu yumu kuwera tambiku ya kuwusiya vidoda na wamonga kuwera tambiku ya kulunguziwa nakamu, su hakamkolaniziyi mawoku toziya yomberi katenditi vidoda kwajili ya mitugulu. Lishaka lilaa lilii yomberi hakaweri mnanagala hakagutyeki kayi mtuwi gwakuyi. 12 Yomberi hakalityeki mweni kwajili ya Mtuwa Mlungu mushaka shakuwi sha kulitula gweka na hakamjegi mwana gwa kondolu gwa shipalu gwa shinja shimu kuwera tambiku ya likosa. Mashaka aga ga kwanja hapeni gawalanguwi toziya mvili zakuyi zyazityekituwi, zitulituwi uhakata kulongolu kwa Mlungu.

13 Aga ndo malagaliru kwa mlagilu mushaka sha kulitula gweka kwakuyi pashipera. Yomberi hakajeguwi kulongolu kwa lugomi lya kwingilira Muliringu Linanagala. 14 Palii paligomi yomberi hakamlaviliri Mtuwa Mlungu mafupu gakuyi, mwana gwa kondolu gwa shipalu yumu gwa shinja shimu yakawera ndiri na dosari kuwera tambiku ya kulunguziwa nakamu na mwana kondolu gwashidala yumu yakawera ndiri na dosari kuwera tambiku ya kuwusiya vidoda na mwana gwa kondolu gwa shipalu yumu kwajili ya tambiku ya ponga. 15 Viraa hakalaviyi lijamanda lya mabumunda yagalekeluwa ndiri simika na maandazi ga ubumu unama na lipaki na mabumunda mababani yagasyaguwa lipaki pamuhera na tambiku za viboga na tambiku za virandiru.

16 Mtambika kamlaviliri Mtuwa Mlungu vintu vyoseri virii pamuhera na tambiku yakuyi ya kuwusiya vidoda na tambiku yakuyi ya kulunguziya nakamu. 17 Yomberi hakamlaviliri Mtuwa Mlungu, lijamanda lilii lya mabumunda galii gagalekeluwa ndiri simika, hakamlaviliri tambiku ya kondolu ulii kuwera tambiku ya ponga, hakamlaviri pamuhera na tambiku za viboga na tambiku za vilandiru.

18 Paligomi palii pakwingilira Muliringu Linanagala, mlagilu ulii hakamogi mvili zyakazityekiti. Su hakazitoli mvili zilii na kuzipambira pa motu pasi pa tambiku ya ponga.

19 Shakapanu mtambika hakatoli liwoku lya mwana gwa kondolu gwashipalu lyalipwasiwituwi pamuhera na andazi limu lyalilekerituwi ndiri simika kulawa mulijamanda lya mabumunda mababani gagalekeluwa ndiri simika na kumpanana mnazili mumawoku pakamalila kala kumoga mvili zakuyi zyakaweriti nazi shaka sha kutyekuwa kwakuyi. 20 Mtambika hakavinyasuli vintu virii kuwera tambiku kulongolu kwa Mtuwa Mlungu, vintu virii haviweri vinanagala kwa mtambika, pamuhera na shidari shakashinyasuliti pamuhera na lihondu lyaliraviwituwi kuwera tambiku. Pa aga, muntu yakatula nazili hakawezi kulanda divayi.

21 Ali ndo lilagaliru kwa muntu yakalaviya nazili yakagaliripiriti malaviwu gakuyi kulongolu kwa Mtuwa Mlungu, pamonga mekawezi kulaviya shoseri, yomberi hakatendi kulinganira na nazili yakalituliti kulawirana na lilagaliru lya kulityeka kwakuyi.

22 Mtuwa Mlungu kamgambiriti Musa, 23 Gumgambiri Aruni na wana wakuyi, hamuwatekeleri wana wa Israeli ntambu ayi.

24 Mtuwa Mlungu kawatekeleri

na kuwalolera.

25 Mtuwa Mlungu kawaloli kwa uheri

na kakutenderi maheri,

26 Mtuwa Mlungu kawapendereyi

na kawapanani ponga.

27 Hangu ndo watambika hawawatekeleri wantu wa Israeli na neni hanuwatekeleri.