1 Mtuwa Mlungu kayoweriti na Musa kushiwala sha Sinayi mumwezi gwa kwanja gwa shinja sha pili pawalawiti kala muisi ya Misri. Su kamgambiriti, 2 "Guwagambiri wana wa Israeli kuwera womberi wafiruwa kuvina msambu gwa Pasaka ntambu yaitulituwi. 3 Mvini msambu agu mushaka shashitulitwi, mulishaka lya lilongu na msheshi mumwezi agu, shaka sha pamihi womberi hawatendi hangu kulawirana na amuli na malagizu gakuyi goseri."

4 Su Musa kawagambiriti wantu wa Israeli kuvina msambu gwa Pasaka, 5 womberi waviniti msambu gwa Pasaka pamihi kushiwala sha Sinayi mulishaka lya lilongu na msheshi lya mwezi gwa kwanja. Wantu wa Israeli watenditi goseri gambira Mtuwa Mlungu ntambu yakamlagaliriti Musa.

6 Kumbiti kuweriti na wantu wamu waweziti ndiri kuguvina msambu gwa Pasaka mulishaka lilii toziya womberi waweriti wahumba kwa kushinkula mitugulu. Su womberi wawagendiriti Musa pamuhera na Aruni, 7 "Wawagambiriti, twenga twawahakata kulongolu kwa Mlungu toziya tushinkula mitugulu, kumbiti iwera hashi tuleweleruwa kumlavilira Mtuwa Mlungu malaviwu pamuhera na wantu wa Israeli mushaka shashitulitwi?"

8 "Musa kawawankula, muheperi mpaka palii neni pampata malagizu kulawa kwa Mtuwa Mlungu kuusu mwenga."

9 Shakapanu Mtuwa Mlungu kamgambiriti Musa, 10 "Yumu gwenu ama yumu gwa shiyiwuku shamwenga pakawera kajimilika ndiri kulongolu kwa Mlungu toziya ya kushinkura mtugulu ama pakawera kutali mumwanja kumbiti pakafira kuliya msambu gwa Pasaka, 11 muntu ayu hakatendi Pasaka ayi mulishaka lya lilongu na msheshi lya mwezi gwagufata. Yomberi hakatendi msambu kwa kuliya mabumunda yagalekuluwa ndiri simika pamuhera na likolu likaripa. 12 Nawasigaziya shiboga shoseri mpaka mandalawira, kayi nawamega shifupa shoseri sha nkanyama gwa tambiku. Womberi pawatenda msambu gwa Pasaka, wafiruwa kufata malagizu goseri. 13 Kumbiti muntu yoseri kaherepa ama muntu yakawera ndiri mumwanja, yomberi hakatendi ndiri msambu gwa Pasaka, hakatuluwi gweka kulawa kwa wantu wakuyi toziya kandavilira ndiri tambiku mushaka shashitulitwiti. Muntu ayu hakatozwi toziya ya vidoda vyakuyi.

14 Muhenga yakalikala pakati penu pakafira kuntendera msambu gwa Pasaka, muntu ayu kafiruwa katendi kulawirana na amuli na malagizu ga msambu gwa Pasaka. Muntu muhenga ama mwenikaya, hakatendi malagizu galaa galii ga msambu gwa Pasaka."

15 Lishaka Liringu Linanagala paligolusiwa, liwundi lisulukiti kuligubika Liringu ali. Pashiru mpaka mandawira liwundi ali liwoneka gambira motu. 16 Su ayi ndo ntambu yaiweriti kila lishaka, liwundi liligubikiti Liringu Linanagala paluwala na pashiru liwoneka gambira motu. 17 Shaka shoseri liwundi paliwera pa Liringu Linanagala, wana wa Israeli walikaliti na liwundi ali palinyasulituwi, wantu wa Israeli wahukiti kwendeleya na mwanja. 18 Womberi wagenditi mwanja kwa amuli ya Mtuwa Mlungu na walikaliti kayi kwa amuli yakuyi. Shaka shoseri liwundi paliwera pa Liringu Linanagala, wantu walikaliti palii. 19 Ata liwundi ali palilikala pa Liringu Linanagala kwa mashaka ngoo, wantu wa Israeli wamjimiriti Mtuwa Mlungu, womberi wawukiti ndiri palii. 20 Shaka shamonga liwundi ali paliwera pa Liringu linanagala kwa shaka shididini hera, kwa lilagaliru lya Mtuwa Mlungu, womberi wawukiti kugenda mwanja ama walikaliti. 21 Paiwera liwundi ali lilikala kwanjira pashiru mpaka mandawira hera, palinyasulwa mandawira yaifata, womberi wawukiti kwendeleya na mwanja. Su liwundi palinyasulwa paluwala ama pamihi, womberi wagenditi mwanja. 22 Lihundi ali palilikala pa Liringu Linanagala kwa mashaka mawili ama mwezi ama shinja, wantu wa Israeli hawasigali mumalingu gawu, kumbiti palinyasulitwi womberi watupuliti malingu gawu kugenda mwanja. 23 Kwa amuli ya Mtuwa Mlungu, womberi walikaliti na kwa amuli ya Mtuwa Mlungu, womberi wendereyiti na mwanja. Su womberi wajimiriti malagizu ga Mtuwa Mlungu ntambu yakamlagaliriti Musa.