1 Makabila ga Rubeni na Gadi gaweriti na mifugu ivuwa nentu. Womberi pawawoniti kuwera enewu lya Yazeri na Gadi lifaa kwa kuiliyiziya mifugu, 2 Wawagendiriti Musa, mtambika Eleazari na wakulu wa shipinga, wawagambira, 3 "Miji ya Ataroti na Diboni na Yazeri na Nimra na Heshiboni na Eleali na Sebamu na Nebu na Beoni. 4 Isi yeni Mtuwa Mlungu kawatangiti Waisraeli kukanka, ndo isi iherepa kwa kuyiliziya mifugu na twenga twanayu mifugu ivuwa nentu. 5 Handa pamutujimira tuwaluwa mtupananani isi ayi iweri uhala watwenga namtulosiya kumwambu kulushemba Yoridani kulikala aku."

6 Musa kawagambira Wantu wa makabila ga Reubeni na "Hashi, mfira kusigala panu aku walongu wenu Waisraeli wankugenda kungondu? 7 Iwera hashi muwawuziya kumbeli wantu wa Israeli nawagenda muisi yeni Mtuwa Mlungu kawapanana? 8 Hangu ndo ntambu yawatenditi watati wenu paniwatumiti kulawa Kadeshi barineya kuyilolalola isi ilii. 9 Walolalola weri awa wagenditi mpaka lushi lwa Eshikoli wayiwona isi kumbiti pawawuyiti wawawuziyiti kumbeli wantu wa Israeli su nawayingira muisi yakawapanananiti Mtuwa Mlungu. 10 Mtuwa Mlungu kaweriti na maya lishaka lilii, kalirapiriti pakalonga. 11 Toziya wanjimiriti ndiri kwa moyu gwawu goseri, nakaka kwahera muntu yoseri pakati pa wantu yawalawiti muisi ya Misri yakaweriti na vinja malongu mawili na kwendeleya, yakagenda kwingira muisi yanuwalagiliriti kuwapanana Abrahamu na Isaka na Yakobu. 12 Woseri hapeni wingiri muisi ayi, kumbiti Karebu mwana gwa Yefune wa lukolu lwa Kenizi na Yoshuwa mwana gwa Nuni, toziya womberi wanjimiriti kwa moyu gwawu goseri. 13 Mtuwa Mlungu kakalaliti kuusu wantu wa Israeli kawatenda wayeliyeli kushiwala kwa shaka sha vinja malongu msheshi, shiyiwuku shoseri shashiweriti shitenda ukondola kulongulu kwakuyi shihowiti. 14 Vinu mwenga shiyiwuku sha wantu yawawera na vidoda, mlawira pahala pa wazewi wenu kwongera kayi maya nkulu ya Mtuwa Mlungu kuusu Waisraeli. 15 Handa mwenga pamlema kumfata, yomberi hakawalekani kayi kushiwala, mwenga hamuwatendi wantu woseri awa wahowi."

16 Su wantu wa likabila lya Rubeni na Gadi wamgenderiti Musa, wamgambiriti, "Gutulekiziyi tuwanyawiri wakondolu wetu maboma na wana wetu miji panu. 17 Kumbiti twaweni twenga hatuweri kala kugenda munkondu pamuhera na walongu wetu Waisraeli, viraa hatuweri musitali gwa kulongolu munkondu mpaka tutendi wasoki pahala pawagenda kulikala. Shaka ashi wana wetu hawalikali mumiji yaiwera na boma, su kulilolera na wenikaya wa isi hii. 18 Hapeni tuwuyi ukaya mpaka Waisraeli wamonga woseri wahali pahala pawu pawabagulitwi. 19 Kumbiti hapeni tuhali shintu shoseri kumwambu kwa Yoridani toziya twenga tupata pahala petu panu kwagulawa mshenji kulushemba Yoridani."

20 Musa kawagambiriti, "Handa nakaka hamtendi ntambu yamtakuliti, su palaa panu kulongolu kwa Mtuwa Mlungu, mtoli migoha yenu kugenda munkondu. 21 Kila mjangila gwenu hakaloki lushemba Yoridani uganu pamuhera pasi pa ulonguziya wa Mtuwa Mlungu, hamuwakomangi wangondu wenu, Mtuwa Mlungu kawatangi mpaka kawakanki, 22 na kuitola isi. Pamtenda aga, muwuyi toziya hamuweri mulitenda lihengu lyenu kulongolu kwa Mtuwa Mlungu na kwajili ya walongu wenu Waisraeli. Shakapanu Mtuwa Mlungu hakaijimiri isi ayi ya kwagulawa mshenji mwa Yoridani kuwera isi yenu. 23 Kumbiti niwaberiziya kuwera pamulaviya ndiri shilii shamulagiliti, mwenga hamumtendi vidoda kulongolu kwa Mtuwa Mlungu, viraa muvimani kuwera hamwazibiwi. 24 Muwanyawili wana wenu miji na wakondolu wenu maboma, kumbiti mtendi ntambu yamulagiliti."

25 Shakapanu, wantu wa Gadi na wa Rubeni wamgambira Musa, "Twenga wantumintumi waku hatutendi ntambu yagutulagalira. 26 Wadala wetu na wana wetu na wakondolu na wang'ombi, hawasigali panu mumiji ya Gileadi. 27 Kumbiti twenga wantumintumi waku tuwera kala kugenda kungondu pasi pa ulonguziya wa Mtuwa Mlungu. Hatuloki lushemba Yoridani na kulikomanga ngondu ntambu yagutakula."

28 Su Musa kalagalira ntambu ayi kwa mtambika Eleazari, na kwa Yoshua mwana wa Nuni kwa wakulu wa shikundi sha makabila ga Waisraeli. 29 "Paiwera wantu wa Gadi na wa Rubeni hawaloki lushemba Yoridani pamuhera na mwenga, kuwera kala kugenda munkondu pawalonguziwa na Mtuwa Mlungu, na myikanga na kuyitola isi ya Gileadi iweri isi yawu. 30 Kumbiti handa hapeni waloki lushemba Yoridani pamuhera na mwenga na kugenda kulikomanga ngondu, su hawatoli semu ya isi ya kanani pamuhera na mwenga yamuwera uwega wa kwaguzyeta mshenji." 31 Wantu wa Gadi na wa Rubeni wankula, "Mtuwa, twenga hatutendi handa Mtuwa Mlungu ntambu yakatugambiliti twenga wantumintumi waku. 32 Pasi pa ulongiziya wa Mtuwa Mlungu hatuloki kugenda kulikomanga ngondu mpaka muisi ya Kanaani, kumbiti uhala wetu hawuweri uwega awu kwagulawa mshenji mwa Yoridani hayiweri yatwenga."

33 Su Musa kawapanana wantu wa likabila lya Gadi na Rubeni na nusu ya likabila la Manase mwana gwa Yusufu, isi yoseri ya mfalumi Sihoni gwa Waamori na isi ya mfalumi Ogu gwa Bashani pamuhera na miji na isi zyazizyengikiti miji ayi. 34 Likabila lya Rubeni ndo linyawa kayi miji ya Diboni na Ataroti na Aroeli, 35 Atroti Shofani na Yazeri na Yogibeha. 36 Betinimra na Betiharani. Miji ayi iweriti na shibambaza na maboma ga wakondolu. 37 Likabila lya Rubeni linyawiti kayi miji ya Heshiboni na Eleale na Kiriataimu, 38 na Nebu na Baali Meoni na Sibima. Miji yawayinyawiti kayi wayipananiti matawu gamonga.

39 Wiwuka wa Makiri, mwana gwa Manasi, wayikomangiti isi ya Gileadi, wayitola isi ayi na kuwawinga Waamori yawaweriti walikala amu. 40 Hangu, Musa kawapanana wantu wa lukolu lwa Makili mwana gwa Manasi, Isi ya Gileadi na womberi walikala amu. 41 Lukolu lwa Yaili mwana gwa Manasi, wavikomiti vijiji vivuwa vya Gileadi na kuvitola kwa makakala na wavipananiti matawu vijiji vya Hawoti yaili. 42 Na lukolu lwa Noba ligenditi kugukomanga mji gwa Kenati pamuhera vya vijiji vyakuyi, su kagushemiti mji agu kwa litawu lyakuyi lya Noba.