1 Mtuwa Mlungu kamgambiriti Musa, 2 "Gunyawi mbalapi mbili kwa madini ga feza. Gwenga haguzigombi mpalapi azi paguwashema wantu na shaka sha kutupula Liringu Linanagala. 3 Mbalapi zoseri mbili pazigombwa pamuhera, shipinga shoseri hashijojoniki kulongolu kwaku paligomi lya kwingilira ku Liringu Linanagala. 4 Kumbiti mbalapi yimu hera paigombwa, su wakulu hera wa makabila ga Israeli hawajojoniki kulongolu kwaku. 5 Handa mbalapi palilaviya liziwu lya lilangaliru lya kuwuka, makabila gagabawiriti malingu gawu uwega wa kwagulawira mshenji hawanji kugenda mwanja. 6 Mbalapi paligombwa mara ya pili makabila gagabawiriti malingu gawu uwega wa kusika hawanji kuwuka. Mlilu haguweri lilangaliru lya kugenda mwanja. 7 Gwenga pagufira kuwajojonira hera wantu pamuhera, gugombi mbalapi kumbiti hapeni zilaviyi lilangaliru lya wantu kugenda."

8 Wana wa Aruni yawawera watambika, womberi ndo hawazigombi mbalapi azi.

"Malagizu aga hagaweri kwa viyiwuku vyoseri vyaviza. 9 Gwenga pagulikomanga na wangondu yawingira kwa makakala muisi yaku, guwagambiri watambika kugomba mbalapi kwa liziwu lilii lya kuwukira. Neni Mtuwa Mlungu gwaku, hampikaniri na hanuwalopoziyi mwenga kulawa kwa wangondu wenu. 10 Viraa guwagambiri watambika kugomba mbalapi shaka wantu pawanemelera, na pawawera musambu gwa kila shinja na wantu pawavina msambu gwa lyezi lya syayi mukila mwezi. Guwagambiri womberi kuzigomba mbalapi wantu pawalaviya tambiku za kulunguziwa nakamu na palii pawalaviya tambiku za ponga. Handa pawatenda hangu, neni hanuwaholeri mwenga. Neni ndo Mtuwa Mlungu, Mlungu gwenu."

11 Mulishaka lya malongu mawili mumwezi gwa pili, shinja sha pili kwanjila wantu wa Israeli pawawukiti kulawa Misri, liwundi lyaliweriti panani pa Liringu Linanagala linyasulituwi. 12 Shakapanu wanjiti mwanja kuwuka kulawa kushiwala sha Sinayi na wagenditi kulola kushana mpaka liwundi paligolokiti shiwala sha Parani. 13 Kwa mala ya kwanja Waisraeli wanjiti mwanja agu pawagajimira malilagaliru ga Mtuwa Mlungu ntambu yakamlagaliriti Musa.

14 Walii yawaweriti pasi pa bendera ya shipinga sha likabila lya Yuda walongoleriti, shipinga shimu pa shipinga shamonga. Mkulu gwawu kaweriti Nashoni mwana gwa Aminadabu. 15 Natihaneli mwana gwa Suari kaweriti mkulu gwa shipinga sha likabila lya Isakari. 16 Viraa Eliyabu mwana gwa Heloni kaweriti mkulu gwa shipinga sha likabila lya Zebuluni.

17 Shakapanu Liringu Linanagala litupulitwi, su wantu wa shiyiwuku sha Gerishoni pamuhera na shiyiwuku sha Merari, walii yawalipapiti, wanjiti mwanja.

18 Shipinga shashiweriti pasi pa bendera ya likabila lya Rubeni, shifatiti kugenda mwanja shipinga pa shipinga. Mkulu gwawu kaweriti Elizuri mwana gwa Shedeuri. 19 Shelumieli mwana gwa Surishadayi kashilonguziyiti shipinga sha likabira lya Simiyoni. 20 Na Eliasafu mwana gwa Deuweli, kashilonguziyiti shipinga sha likabira lya Gadi. 21 Shakapanu wafatiti wantu wa kolu lwa Kohatihi, womberi wapapiti vyombu vinanagala vya Liringu Linanagala. Liringu Linanagala libaliluwa pamberi pa kuwuka mwanja.

22 Shipinga shashiweriti pasi pa bendera ya likabila lya Efraimu, shifatiti kugenda mwanja shipinga pa shipinga. Mkulu gwa shipinga ashi kaweriti Elishama mwana gwa Amiudi. 23 Gamalieli mwana gwa Pedasuri, kalilonguziyiti likabila lya Manasi. 24 Na Abiya mwana gwa Gidiyoni kalonguziyiti likabila lya Benjamini.

25 Upeleru walii yawaweriti pasi pa bendera ya shipinga shashilonguziwitwi na likabira lya Dani, yawaweriti gambira walolera kumbeli kwa vipinga vyoseri, wagenditi mwanja shipinga pa shipinga. Womberi walonguziwituwiti na Ahiezeri mwana gwa Amishidayi. 26 Pagieli mwana gwa Okurani kalilonguziyiti likabila lya Asheri. 27 Na Ahira mwana gwa Enani, yomberi kalilonguziyiti likabila lya Nafutali. 28 Agu ndo mlongoleru yawagufatiti wantu wa Israeli kulawirana na vipinga vyawu pawawuka kugenda mwanja.

29 Musa kamgambiriti Hobabu mwana gwa Reuweli shemeji gwakuyi, Reuweli muntu gwa Midiyani, mganafu gwa Musa, "Twenga twamwanja kugenda pahala Mtuwa Mlungu kalongiti, haniwapanani mwenga pahala panu’. Su gwizi tugendi pamuhera, twenga hatukutenderi manemu toziya Mtuwa Mlungu kalagalira kutupanana vintu viherepa twenga Waisraeli."

30 Kumbiti Hobabu kawankuliti, "Neni hapeni ng'endi pamuhera na mwenga, kumbiti hambuyi muisi yangu kulikala na wantu wangu."

31 Su Musa kamgambiriti, "Shondi nagutuleka toziya gwenga gupamana pahala patuweza kubawila malingu kushiwala, viraa guweza kutulanguziya. 32 Kayi pagugenda pamuhera na twenga, shoseri shiheri shakagenda kututendera Mtuwa Mlungu, ashi hagutenderuwi na gwenga viraa."

33 Su wantu wagenditi mwanja kulawa Sinayi, Lugongu lwa Mtuwa Mlungu, womberi wagenditi mwanja kwa mashaka matatu. Lisandiku lya Lipatanu lya Mtuwa Mlungu liwalonguleriti mwanja gwa mashaka galii matatu su kuwasakulira pahala pa kunyawa kambi. 34 Kila pawagenditi mwanja kulawa pahala pamu kugenda pahala pingi, liwundi lya Mtuwa Mlungu liweriti kumpindi kwawu paluwala.

35 Kila shaka lisandiku paligenditi mwanja kulongolu, Musa kalongiti, "Gugoloki gwee Mtuwa Mlungu, guwapalasiyi wangondu waku na walii yawakukalalira guwatendi watugi kulawa kulongolu kwaku.!" 36 Na shaka paligolokiti, Musa kalongiti, "Guwawuyiri, gwee Mtuwa Mlungu, awa maelufu kwa maelufu ga Waisraeli."