1 Mtuwa Mlungu kamgambiriti Musa, 2 guwagambiri Waisraeli kuwera pamsoka muisi yang'enda kuwapanana mulikali, 3 pamundavilira neni Mtuwa Mlungu tambiku kulawa mumifugu yenu, ama tambiku ya kulunguziwa nakamu ama tambiku, su muntu kalaviyi shilii shakalagiliti ama kulaviya tambiku ya ntambu yakafira mweni ama tambiku ya shaka sha msambu gwenu gwagutulitwi na kutenda ununkira uherepa wa kunherepeziya neni Mtuwa Mlungu, 4 su ulii yakalaviya tambiku yakuyi hakamjegeri viraa Mtuwa Mlungu tambiku ya viboga ya kilu yimu ya ubumu unama yawaukabangiti na kuhanganywa na lita yimu ya lipaki, 5 pamuhera na divayi ya tambiku ya shirandu lita yimu, vintu avi havilaviwi pamuhera na kila nkanyama gwa tambiku ya kulunguziwa nakamu. Kondolu ama mbuzi. 6 Shaka sha kulaviya tambiku ya kondolu gwa shipalu na kilu yimu ya ubumu yawaukabangitwi na lita yimu na nusu ya lipaki, vyoseri havilaviwi kuwera tambiku ya shiboga. 7 Viraa tambiku ya shirandu sha lita yimu na nusu ya divayi na kutenda ununkira uherepa gwa tambiku ya kumuherepeziya Mtuwa Mlungu. 8 Pamumlavilira Mtuwa Mlungu, ng'ombi gwashipalu kwajili ya tambiku ya kulunguziwa ama tambiku ya kulaviya shilii shagulagiliti ama kwajili ya tambiku za ponga, 9 muntu hakamlaviyi kuwera tambiku pamuhera na tambiku ya viboga vya ubumu wa kilu tatu uherepa na lita mbili za lipaki. 10 Viraa pamuhera na tambiku ya shirandu lita mbili za divayi na kutenda ununkira uherepa wa tambiku ya kumuherepeziya Mtuwa Mlungu.

11 Kila mala muntu kalaviyi ng'ombi gwashipalu na kondolu gwashipalu na mwana gwa kondolu na mbuzi. 12 Walanga ya vintu avi haiyongerewi kulawirana na walanga ya wankanyama yawagenda kulaviwa. 13 Kila muntu yakawera mwenikaya gwa Israeli, kafiliziwa katendi vintu avi kwanjira ayi yomberi pakalaviya tambiku ya kulunguziwa nakamu, ununkira uherepa haumuherepeziyi Mtuwa Mlungu. 14 Handa kwana muhenga yakalikala pamuhera na mwenga kwa shaka shoseri, pakafira kulaviya tambiku yakuyi ya kulunguziwa su iweri ununkira wa kumuherepeziya Mtuwa Mlungu, su muntu ayu katendi ntambu yamtenda mwenga. 15 Muviyiwuku vyoseri vyaviza, amuli zilaa zilii zyamuzitenda mwenga, yomberi hakazitendi muhenga yoseri yakalikala pamuhera na mwenga, kulongolu kwa Mtuwa Mlungu hamuweri teratera. 16 Mwenga pamuhera na yomberi hamuweri pasi pa mulilagaliru lilaa lilii limu na malagizu galaa galii.

17 Mtuwa Mlungu kamgambiriti Musa, 18 guwagambiri Waisraeli kuwera shaka pawawingira muisi yanuwajegani 19 kila pamuliya viboga vya isi ilii, hamtuli shyasi na kumpanana neni Mtuwa Mlungu. 20 Pambanika mabumunda, libumunda lya kwanja lya shiboga shenu sha kwanja, halilaviwi kuwera tambiku kulawa pahala pa kukomera viboga. 21 Hamundaviliri neni Mtuwa Mlungu tambiku ayi ya gweka muviyiwuku vyenu vyoseri vyaviza.

22 Kumbiti pamleka kuzitenda amuli zoseri zilii neni Mtuwa Mlungu yaniwapananiti kupitira Musa, 23 handa mashaka gagiza wantu wafata ndiri goseri galii neni Mtuwa Mlungu numlagaliriti Musa, 24 su payiwera likosa ali litendeka pota kuvimana, shipinga sha wantu wavimaniti ndiri, shipinga shoseri hashilaviyi ng'ombi gwashipalu yumu yakakamala nentu ndiri kuwera tambiku ya kulunguziwa, ununkira uherepa wa kumuherepeziya Mtuwa Mlungu, pamuhera na tambiku yakuyi ya viboga na tambiku ya divayi kulawirana na malagizu yakuyi. 25 Mtambika hakawakolaniziyi mawoku kwajili ya wantu woseri wa Isreli, womberi hawalegeziwi toziya wavimaniti ndiri kuwera watenditi likosa, na womberi wajegiti tambiku ya kulunguziwa nakamu kulongolu kwa Mtuwa Mlungu kuwera tambiku ya kuwusiya vidoda kwajili ya likosa lyawu. 26 Waisraeli woseri pamuhera na wahenga yawalikala pakati pawu, hawalegeziwi toziya watenditi likosa ali.

27 Muntu yumu pakatenda vidoda pota kuvimana, yomberi hakamlaviyi mbuzi gwashidala gwa shinja shimu kuwera tambiku ya kuwusiya vidoda. 28 Mtambika hakamkolaniziyi mawoku kulongolu kwa Mtuwa Mlungu, toziya ya muntu ulii yakatenditi vidoda pota kuvimana, su hakalekeziwi. 29 Hamfati malagizu aga kwa kila muntu yakatenda vidoda pota kuvimana, kwa muntu Mwisraeli ama muhenga yakalikala pamuhera namwenga.

30 Kumbiti muntu yoseri yakatenda vidoda kwa kuvimana, kwa muntu mwenikaya ama muhenga, yomberi hakaweri kankumtendera lijonga Mtuwa Mlungu, su mpaka kalemuwi kulawa kwa wantu wakuyi. 31 Toziya kagalema galii Mtuwa Mlungu gakatakuliti na kulema limu lya amuli zyakwi. Muntu ayu hakalemuwi nakamu na kuhowa hakuweri kwakuyi mweni.

32 Lishaka limu, Waisraeli pawaweriti kushiwala, wamwoniti muntu yumu pakasola mbawu Lishaka lya Kwoyera. 33 Su muntu ulii kajeguwa kulongolu kwa Musa na Aruni na wantu woseri. 34 Womberi wamtatiriti toziya iweriti wankali hawenitakuli ntambu yakumtenda muntu gwa ntambu ayi. 35 Su Mtuwa Mlungu kamgambiriti Musa, "Muntu ayu mpaka kalaguwi, wantu woseri hawamgumangi mabuwi kunja kwa kambi." 36 Su wantu wamlaviyiti kunja kukambi, wamgumangiti mabuwi mpaka kahowa, gambira Mtuwa Mlungu ntambu yakamlagaliriti Musa.

37 Shapakanu Mtuwa Mlungu kamgambiriti Musa. 38 "Guwagambiri wantu wa Israeli guwalagaliri walitenderi vifundu mulwiniku lya nguwu zawu, watuli wuzi wa buluu pashifundu. Guwagambiri watendi hangu muvileri vyawu vyoseri vyaviza. 39 Vifundu avi haviweri maholu kwa mwenga. Kila pamuviwona hamuziholi amuli zyangu zoseri na kuzijimira su namwiza kufata galii gamfiruwa na galii gamugawona kwa masu genu maweni. 40 Vifundu avi haviwaholuziyi amuli zyangu zoseri na hamuzifati na mwenga hamuweri wananagala wangu. 41 Neni ndo Mtuwa Mlungu, Mlungu gwenu yaniwalaviyiti kulawa muisi ya Misri su mwenga muweri wantu wangu. Neni ndo Mtuwa Mlungu gwenu."