1 Mtuwa Mlungu kamgambira Musa, 2 "Guwatumi wantu wagendi kuilolalola weri isi ya Kanaani yang'enda kuwapanana Waisraeli. Hagumtumi muntu yumu kulawa kila likabila na muntu ayu kaweri mkulu gwa likabila lyakuyi."

3 Su Musa katenditi shilii Mtuwa Mlungu ntambu yakamlagaliriti. Kawatumiti wantu walii kulawa kushiwala sha Parani. Wantu woseri yawatumituwi waweriti wakulu wa makabila gawu Waisraeli. 4 Aga ndo matawu ga wantu walii,

Kulawa likabila lya Rubeni kaweriti Shamuwa mwana gwa Zakuri.

5 Kulawa likabila lya Simiyoni, kaweriti Shafati mwana gwa Hori.

6 Kulawa likabila lya Yuda, kuweriti Karebu mwana gwa Yefuni.

7 Kulawa likabila lya Isakari, kuweriti Igali mwana gwa Yosefu.

8 Kulawa likabila lya Efraimu, kuweriti Hoshea mwana gwa Nuni.

9 Kulawa likakabila lya Benjamini, kuweriti Paliti mwana gwa Rafu.

10 Kulawa likabila lya Zebuluni, kuweriti Gadieli mwana gwa Sodi.

11 Kulawa likabila lya Manasi lilaa lilii lyaliweriti likabila lya Yusufu, kuweriti Gadi mwana gwa Susi.

12 Kulawa likabila lya Dani, kuweriti Amieli mwana gwa Gemali.

13 Kulawa likabila lya Asheri, kuweriti Seturi mwana gwa Mikaeli.

14 Kulawa likabila lya Nafutali, kuweriti Nabi mwana gwa Wofisi.

15 Kulawa likabila lya Gadi, kuweriti Geueli mwana gwa Maki.

16 Aga ndo matawu ga wantu Musa yakawatumiti kugenda kuilolalola weri isi ya Kanaani. Musa kampananiti Hoshea mwana gwa Nuni litawu lya syayi, su kamshemiti Yoshua.

17 Musa pakawatumiti wakulu walii kugenda kuilolalola weri isi ya Kanaani, su kawagambiriti, "Mkweni kugenda kulii kuisi ya uwega wa kusika wa Kanaani, mpaka muisi ya vigongu, 18 mwakailoliloli weri isi ilii. Mloliloli weri viraa handa wantu yawalikala mlii wawera na makakala ama walegilegi, wavuwa ama wavuwa ndiri. 19 Mloliloli weri handa isi ilii iherepa ama iherepa ndiri, miji yawalikala ya ntambu gaa, kwana numba ziherepa ama numba zyazizyengetiruwa na liboma? 20 Mloliloli weri viraa handa isi yeni iwera na ulunda ama ihushu, iwera na mitera ama yahera. Muweri na myoyu igangamala na pamuwuya mtoli mabwajubwaju gamu ga isi ilii." Shilii shiweriti shaka sha zyabibu zyakwanja kuwula.

21 Su wantu walii wagenditi na kuilolalola weri isi kulawa kushiwala sha Sini mpaka Rehobu, pakwegera na njira ya kwingilira Hamati. 22 Womberi wagenditi mpaka uwega wa kusika wa Kanaani, wapitiriti mpaka mji gwa Hebroni. Mumji agu wawawoniti Waahimani na Washeshai na Watalimai, wantu wa shiyiwuku Anaki. Mji gwa Hebroni gunyawituwiti vinja saba pamberi pa kusoka pa mji gwa Soani yaguwera muisi ya Misri. 23 Walolalola awa pawasokiti mulilaranda lya Eshikoli, walolalola walii wabenangiti mikunguwi ga mtera gwa zyabibu, mkunguwi yaguweriti na mabwajubwaju gavuwa, mkunguwi agu gupapawituwiti na wantu wawili mulibiki. Watoliti viraa mabwajubwaju gagashemuwa makomamanga pamuhera na tini. 24 Pahala palii pashemuwa lularanda lwa Eshikoli Shiyeburaniya mana yakuyi shikunguwi. Toziya shikunguwi ashi sha zyabibu wantu walii wa Israeli washibenangiti kulawa pahala palii.

25 Pawailolalola weri kala isi kwa mashaka malongu msheshi, womberi wawuyiti. 26 Womberi wawagendiriti Musa na Aruni pamuhera na shipinga sha Waisraeli aku Kadeshi, kushiwala sha Parani. Su watakuliti galii yawagawoniti na kuwalunguziya mabwajubwaju ga isi ilii. 27 Wamgambiriti Musa, "Tusokiti isi yagututumiti tuiloliloli weri, isi ilii ifaa kwa kuiliziya mifugu pamuhera na kulima, aga ndo mabwajubwaju gakuyi. 28 Kumbiti wantu yawalikala kulii wawera na makakala nentu na miji yawu mikulu nentu na igangamala. Viraa twenga tushiwoniti shiyiwuku sha Anaki wantu wakulu nentu. 29 Waamaleki wankulikala isi ya uwega wa kusika wa Kanaani, wantu wa shiyiwuku sha Hiti na Yebusi na Amori wankulikala pahala pa vigongu, wantu wa shiyiwuku sha Kanaani wankulikala pakwegera na bahari ya Mediteranea na pakwegera na lushemba lwa Yoridani."

30 Kumbiti Karebu kawanyamaziyiti wantu kulongolu kwa Musa pakalonga, "Tugendi kalongola twakaikolimlima isi ilii, toziya twana uwezu nentu wa kukanka."

31 Kumbiti wantu yawagenditi pamuhera na Karebu kuilolalola isi ilii walongiti, "Hapeni tuwezi kulikomanga ngondu na wantu walii, womberi wawera na makakala kuliku twenga." 32 Su womberi walongiti mpayu pakati pa Waisraeli kuusu isi yawailolitiloliti weri pawalonga, "Isi ilii yankuwalaga wantu wakuyi. Viraa wantu woseri yatuwawoniti kulii wakulu nentu. 33 Tuwawoniti makambaku kulii, wantu wa shiyiwuku sha Anaki. Twenga tuliholiti tuwera gambira vibatala kulongolu kwawu, ndo ntambu yawatuwoniti twenga."