1 Balaamu kamgambiriti Balaki, "Gunyawiri vitalawanda vya kutambikira saba panu shakapanu gunjegeri wang'ombi washipalu saba na wakondolu washipali saba." 2 Balaki katenditi gambira Balaamu ntambu yakalongiti. Su walaviyiti pakila shitalawanda tambiku ya ng'ombi gwashipalu yumu na kondolu gwashipalu yumu. 3 Shakapanu Balaamu kamgambiriti Balaki, Balaki, "Gusigali panu pakwegera na tambiku yaku ya kulunguziya nakamu, neni ng'endi. Pamonga Mtuwa Mlungu hakaliwoni na neni. Shoseri shakagenda kunanguziya hanizi kukugambira." Su Balaamu kakweniti gweka yakuyi palugongu. 4 Mlungu kaliwoniti na yomberi. Na Balaamu kamgambiriti, "Ntandira vitalawanda vya kutambikira saba na ndaviya tambiku ya ng'ombi gwashipalu yumu na kondolu gwashipalu yumu pakila shitalawanda."

5 Mtuwa Mlungu kampanana "Balaamu visoweru vyakagenda kuyowera na kamgambiriti kawuyi kwa Balaki." 6 Balaamu kawuyiti, kamwoniti Balaki kagoloka pahala palaa palii pakwegera na tambiku yakuyi ya kulunguziwa nakamu, pamuhera na wakulu wakuyi wa Mowabu.

7 Balaamu kawagambiriti ujumbi awu pakalonga,

"Balaki kanjega panu kulawa Aramu,

yina, mfalumi gwa Mowabu kanjega kulawa kuvigongu vya kwakulawira shenji.

Gwizi guwapangili wantu wa Yakobu kwajili yaneni,

yina, gwizi guwagambiri Waisraeli kuwera hawapatwi na vintu vidoda!

8 Hanimpangili hashi muntu ulii Mlungu kampangiliti ndiri?

Hanuwatozi hashi walii Mtuwa Mlungu kawatoziti ndiri?

9 Kulawa mulupeleru palitalawu niwawoniti,

kulawa pavigongu niwasungulira.

Awa wantu yawalikala gweka yawu

yawalihola kuwera teratera na wantu wa isi zimonga.

10 Gaa yakaweza kuwawalanga uvuwa wa wantu wa Yakobu,

ama kuhola lipinga lya wantu wa Israeli?

Gundeki howi gambira wantu yawamuherepeziya Mlungu,

upeleru wa neni na uweri gambira wawu."

11 Palii Balaki kamgambiriti Balaamu, "Hashi, guntendera shishi? Nukujega panu guwapangili wangondu wangu, badala yakuyi guwatekelera!"

12 Balaamu kamwankuliti Balaki, "Hantakuli shilii Mtuwa Mlungu shakang'ambiriti kutakula."

13 Shakapanu Balaki kamgambiriti Balaamu, "Tugendi pahala pamonga, palii haguwezi kuwawona. Pamuhera na hangu haguwoni hera semu yawu, gwenga hapeni kuwawona woseri. Shakapanu guwapangili kulawa aku kwa niaba ya neni." 14 Su Balaki kamtoliti Balaamu kululalanda lwa Sofimu, palugongu lwa Pisiga. Palii yomberi kanyawiti vitalawanda saba vya kutambikira na pakila shitalawanda kalaviyiti tambiku ya ng'ombi gwashipalu yumu na kondolu gwashipalu yumu.

15 Balaamu kamgambiriti Balaki, "Gusigali panu pakwegera na tambiku yaku ya kulunguziwa nakamu, neni ng'endi kumwambu kuliwona na Mtuwa Mlungu."

16 "Mtuwa Mlungu kaliwoniti na Balaamu, kamgambiriti visoweru vyakagenda kuyowera, su kamgambiriti kawuyi kwa Balaki." 17 Su Balaki kawuyiti, kamwoniti Balaki kagoloka pakwegera na tambiku ya kulunguziwa nakamu pamuhera na wakulu woseri wa Mowabu. "Balaki kamkosiyiti Balaamu, hashi, Mtuwa Mlungu kakugambira shishi?" 18 Su Balaamu kamgambiriti Balaki ujumbi awu,

"Gugoloki Balaki gupikanili,

gumpikaniri gwenga mwana gwa Sipori.

19 Mlungu ndo muntu ndiri, kapayi,

viraa muntu ndiri kagalambuli nfiru yakuyi!

Hashi hakalagili shintu na hapeni katendi,

ama kalongi shintu hapeni shilawili?

20 Guloli, neni mpananwa amuli ya kutekelera,

na Mtuwa Mlungu katekelera, neni weza ndiri kupangila.

21 Mtuwa Mlungu kawona ndiri udoda kwa wantu wa Yakobu,

ama tabu kwa wantu awa wa Israeli.

Mtuwa Mlungu gwawu kapamuhera na womberi.

Mweni hukwisuwa kwa lusheka pakati pawu,

viraa hawabweri Mlungu kawera mfalumi gwawu.

22 Mlungu yakawawusiyiti kulawa Misri,

kankulikomanga ngondu kwajili yawu gambira mbogu. 23 Nakaka uhawi hapeni guwaleweleri wantu wa Yakobu,

ama uganga kwa wantu wa Israeli.

Vinu kwa Israeli, wantu hawalongi,

mloli makangashu yakagatenditi Mlungu!

24 Guloli Waisraeli wagoloka gambira simba gwashidala,

wankugoloka gambira simba washipalu.

Gambira simba yakagonja ndiri mpaka kamalili magomeziwu gakuyi,

na kulanda mwazi gwa magomeziwu."

25 Shakapanu Balaka kamgambiriti Balaamu, "Paguwapangila ndiri, su naguwatekelera nakamu!"

26 Kumbiti Balaamu kamwankula Balaki, "Hashi, nikugambiriti ndiri kuwera shakatakula Mtuwa Mlungu ndo shanfiruwa kutenda?"

27 Balaki kamgambiriti Balaamu, "Gwizi hanikujegi pahala pamonga. Pamonga Mlungu hakajimiri guwapangili wantu walii kulawa aku kwajili yaneni." 28 Su Balaki kamtoliti Balaamu mpaka palugongu lwa Peori, palii muntu pakagoloka hakawoni kushiwala.

29 Balaamu kamgambiriti Balaki, "Gunyawili vitalawanda vya kutambikira saba panu, guntandiri ng'ombi gwashipalu saba na wakondolu washipalu saba." 30 Balaki katenditi ntambu yakagambiritwi na Balaamu, shakapanu kalaviyiti pakila shitalawanda sha kutambikira, ng'ombi gwashipalu yumu na kondolu gwashipalu yumu.