1 Lishaka limu wantu wanjiti kumlalamikira Mtuwa Mlungu kuusu ntabiku zawu. Mtuwa Mlungu pakawapikiniriti womberi vyawatakuliti, su kaweriti na maya kawajegiriti motu. Shakapanu motu kulawa kwa Mtuwa Mlungu guyakiti pakati pawu na kulunguziya uwega umu wa malingu. 2 Wantu wamliliriti Musa na Musa kamluwiti Mtuwa Mlungu na motu gulii gutenditi tiya. 3 Su pahala palii pawashemuwa Tabera, toziya palii motu gwa Mtuwa Mlungu guyakiti pakati pa wantu.

4 Pakati pa Waisraeli paweriti na muwamu mwa wantu wa Israeli kuweriti na shikundi shimu shashigenditi pamuhera sheni shiweriti na nfiru nkulu ya nyama. Ata Wantu wa Israeli na womberi wanjiti kulalama pawalonga. "Pamonga handa metuwezi kupata nyama ya kuliya! 5 Tulihola wasomba watuliyiti Misri pota shibena mgongu, mateteri na mateteri kulu, likolu vitunguwu na vitunguwu saumu! 6 Kumbiti vinu likakala litupera na kwahera shiboga shimonga ila mana hera!"

7 Mana iweriti handa mbeyu za mapemba, rangi yakuyi iweriti handa ya langi nfufu yaihanganyitwi na njanu. 8 Wantu watindira tindira na kuijojonira shakapanu wayisyaga kwa lwala ama wayitwangiti kwa matuli, wavuluga muviwiga na kunyawa maandazi. Kunoga kwakuyi kuweriti handa maandazi gawakalangiti kwa lipaki. 9 Mangami pagatulukiti pakambi shipindi sha pashiru mana ituluka viraa pamuhera na mangami. 10 Musa kapikiniriti wantu wankulira mkaya zawu zoseri, kila muntu pa ligomi lya liringu lyakuyi, su maya ya Mtuwa Mlungu kakalaliti nentu, na Musa wamkalaziiti. 11 Musa ndo pakamgambiriti Mtuwa Mlungu, "Iwera hashi gundendera vidoda neni ntumintumi gwaku? Mbona gufiriziwa ndiri na neni, ntambu gaa guntwika shisanga sha kuwatunza wantu woseri awa? Mana walira kulongolu kwa neni. 12 Hashi, ndo neni yanuwaleriti, ata gung'ambiliti nuwapapi pashifuwa shangu gambira yaya yakapapa mwana nonu na kuwajega kulii kuisi yaguwalagila kuwapanana wambuyi wetu? 13 Neni hampati koshi vinofu vya kuwaliziya wantu woseri awa? Toziya wankulila kulongolu kwaneni pawalonga, gutupanani vinofu tulii! 14 Hawezi ndiri kuwatunza wantu woseri awa gweka yangu, ashi ndo shitwatira shikulu nentu kwa neni. 15 Payiwera hangu ndo yaguntendera, mbaka gunagi kalongola! Handa pampata shibali kulongolu kwaku, nagundeka weri muntabiku yangu."

16 Su, Mtuwa Mlungu kamgambira Musa, "Muwajojoniri wazewi malongu saba wa Israeli weni gwenga guvimana wankumpanana ligoya na kujimiruwa na wantu kuwera walongoziya guwejegi kuliringu lya kuliwona wagoloki pakwegera na gwenga. 17 Hansuluki aku na kuyowera na gwenga, hantoli seemu ya rohu yanikupananiti, niwapanani wantu awa. Nawomberi hawatoli lihengu lya kuwalolera weri wantu awa pamuhera na gwenga, nagwiza kushipapa shisanka ashi gweka yaku. 18 Vinu guwagambiri wantu, kuwera mulipungi toziya ya shilawu, hamliyi vinofu. Mtuwa Mlungu kapikanira pamlira na kulonga kuwera kwahera gwa kuwapanani vinofu, viraa ntambu ya mwenga iweriti iherepa pamuweriti muisi ya Misri. Vinu Mtuwa Mlungu hakawapanani vinofu, mwenga muviliyi. 19 Hapeni mliyi vinofu kwa lishaka limu hera ama mashaka mawili ama mashaka muhanu ama mashaka malongu ama malongu mawili, 20 kumbiti hamliyi vinofu kwa mwezi goseri! Hamuliyi vinofu mpaka mvitoki. Goseri aga toziya mumlemiti Mtuwa Mlungu yakaweriti palaa panu pakati penu, na kulira kulongolu kwakuyi pamlonga, iwera hashi tulawiti muisi ya Misri?"

21 Kumbiti Musa kamgambiriti "Mtuwa Mlungu, walanga ya wantu yawalonguziya panu ndo miya sita elufu wawagenda kwa magulu na gwenga gutakula hagumpanani vinofu vya kutosheya mwezi goseri! 22 Hashi, haweza kulikitula kondolu na ng'ombi wa kuwatosha? Hashi, wasomba woseri mubahari wawalowi kwajili ya womberi?"

23 Mtuwa Mlungu kamwankuliti Musa, "Hashi, uwezu waneni upungula?" "Haguwoni handa shisoweru shaneni hashiweri sha nakaka kwa gwenga ama ndala!"

24 Su Musa kagenda na kuwagambira wantu galii gakatakuliti Mtuwa Mlungu shakapanu kajojonili wazewi malongu saba kulawa muwamu mwa wazewi walongoziya na womberi wawatula kondolu kuizyengeta Lihema linanagala. 25 Su Mtuwa Mlungu kasulukiti muliwundi na kuyowera nayu. Shakapanu katola seemu ya rohu yakampananiti Musa, kawapananiti kila yumu gwa wazewi malongu saba. Pawayingirituwi na rohu ilii, wazewi walii wanjiti kutunga, kumbiti waweziti kutakula kwa likakala lya rohu ayi. 26 Wazewi wawili pakati pa walii malongu saba yawasyagulitwi Elidadi na Medadi, wasigaliti mukambi wayawu pawagenditi Kuliringu Linanagala. Rohu kawiziriti mlaa mlii mukambi, wanjiti kulonga shisoweru sha Mlungu palii pawaweriti. 27 Mndemba yumu kalawa mbiru na kumgambira Musa, "Elidadi na Medadi wankulaviya umbuyi kukambi."

28 Su Yoshuwa mwana gwa Nuni, ulii yakaweriti mtanga gwa Musa kwanjira untemba wakuyi, kamgambiriti Musa, "Mtuwa gwangu guwaleweleri!"

29 Kumbiti Musa kamwankula, "hashi, guwona weya kwajili ya neni? Mtuwa Mlungu mekawapanani wantu wakuyi woseri rohu gwakuyi na womberi waweri wambuyi wa Mlungu." 30 Shakapanu Musa kawuyiti na wazewi walii wa Waisraeli.

31 Palaa palii Mtuwa Mlungu kalijegiti vumu lyega, lyega lilii lijegiti wankwali kulawa kubahali na kuwatenda watulukiri mumbwega mwa kambi, waeneyiti kilu mita zivuwa kuizyengeta kambi, waweriti ngoo mpaka mushiwunu. 32 Su lishaka lyoseri ali paliwala na pashiru na lishaka lyalifatiti wantu watenditi lihengu lya kujojonira gwali, kwahera muntu yakajojoniriti pasi pa kilu elufu yimu wawabanika kila pahala kumbwega kukambi su wawayumisiyi. 33 Kumbiti paweriti kwankali kwana vinofu vivuwa na pamberi wantu hawenimaliliri kuliya, Mtuwa Mlungu kawakalaliliriti wantu, kawakomangiti wantu kwa malweli madoda nentu. 34 Su pahala palii pashemuwa litawu Kiburoti Hataava, mana yakuyi pawawasiliti wantu yawaweriti walwaliya. 35 Kulawa palii Kiburoti Haava, wantu wagenditi mwanja mpaka Heseroti, wanyawiti malingu gawu na kulikala aku.