1 Shipinga shoseri sha Waisraeli wasokiti kushiwala sha Sini mumwezi gwa kwanja, wabawiriti malingu gawu aku Kadeshi. Pawawera aku, Miriamu kahowiti na kafindirwa.

2 Pahala palii pawabawiriti malingu gawu paweriti ndiri na mashi. Su wantu woseri wawawiziriti Musa na Aruni pota kushemuwa. 3 Womberi wawahinginikiti woseri pawalonga, "Mbaka metuhowi pamuhera na walongu wetu kulongolu kwa Liringu Linanagala lya Mtuwa Mlungu. 4 Iwera hashi mutujegiti sisi wantu wa Mtuwa Mlungu kushiwala uganu? Hashi mtujegiti su tuhowi pamuhera na mifugu yetu? 5 Iwera hashi mutulaviyiti Misri na kutujega pahala panu papafaa ndiri? Panu kwahera viboga ama tini ama zyabibu ama makomamanga. Ata mashi ga kulanda kwahera!" 6 Palii Musa na Aruni wawukiti pakati pa lipinga lya wantu, wagenditi kugoloka paligomi lya Liringu Linanagala, wasuntamiti makukama. Su uweru wa Mtuwa Mlungu guwalawiriti, 7 Mtuwa Mlungu kamgambiriti Musa, 8 "Gutoli luhonga lwaku lwalutulwa kulongolu kwa Lisanduku lya Lipatanu, shakapanu gwenga pamuhera na Aruni mlongu gwaku, mushijojoniri shipinga shoseri sha wantu. Shakapanu pawalola guwagambiri litalawu lyaliwera kulongolu kwawu gulaviyi mashi. Gwenga hagulutendi litalawu lilaviyi mashi, su shipinga shoseri sha wantu pamuhera na mifugu yawu wawezi kulanda mashi." 9 Musa kagenditi kulutola luhonga lulii kulongolu kwa Mtuwa Mlungu ntambu yakalagaliritwi.

10 Shakapanu Musa na Aruni kalijojoniriti lipinga lyoseri lya wantu kulongolu kwa litalawu, Musa kawagambiriti, "Mpikaniri vinu mwenga yamumlema Mlungu. Hashi twenga tuwalaviliri mashi kulawa mulitalawu ali?" 11 Sahakapanu Musa kanyasuliti liwoku lyakuyi, kalukomiti litalawu mala mbili kwa luhonga lwakuyi. Mashi gavuwa gabwituliti nentu, wantu walanditi weni pamuhera na mifugu yawu.

12 Kumbiti Mtuwa Mlungu kawagambiriti Musa na Aruni, "Toziya mwenga munjimira ndiri neni, ama kunshera neni kulongolu kwa masu ga Waisraeli, kwa toziya ayi hapeni mushiyingiziyi shipinga ashi sha wantu muisi ilii yaniwalagiliti." 13 Pa aga pahala palii pashemuwiti Meriba, litawu ali liwera na mana Mahinginiku, toziya palii Waisraeli wamuhinginikiti Mtuwa Mlungu, na palii Mlungu kalanguziyiti makakala gakuyi kwa womberi kwa kuwapanana mashi.

14 Musa kawatumiti wajumbi kulawa Kadeshi kwawabawiriti malingu gawu kugenda kwa mfalumi gwa Edomu pawawera na ujumbi, "Mlongu gwaku Israeli kalonga hangu, kamgambira, mlongu gwaku, Israeli kalonga, Israeli kalonga hangu gwenga gukumana ntabika kwa twenga zatupatiti. 15 Wambuyi wetu yawagenditi Misri, kweni tulikaliti kwa shaka shivuwa na Wamisri ntambu yawawatabisiyiti wambuyi wetu, watutabisiya na twenga. 16 Na tumliliriti Mtuwa Mlungu, na yomberi kakupikinira kulira kwa twenga, katujegera ntumintumi gwakuyi yakatuwusiyiti Misri. Vinu twapanu Kadeshi, mji gwagupakana na isi yaku. 17 Shondi gutululeziyi tupiti muisi yaku, hapeni tutimbangi malambu genu, pota galii ga mizyabibu, pota hapeni tulandi mashi ga manegu gunu, hatufati njira nkulu ya mfalumi na kugenda moja kwa moja pota kugalambuka kumliwu ama kumshigi, mpaka patulawa Muisi yaku."

18 Kumbiti mfalumi gwa Edomu kamwankula, "Ndala hapeni gupiti muisi ya neni, handa pagupita handawi na kukukomanga ngondu."

19 Waisraeli wamgambira, "Twenga hatufati njira nkulu, handa twenga pauhera na mifugu yetu patulanda mashi genu hatulipi. Shatuluwa shondi gutulekiziyi hera, tupiti muisi yaku. Twenga tufira ndiri shisoweru shamonga." 20 Kumbiti mfalumi gwa Edomu kongeriti kulonga, "Hapeni tuwalekeziyi mpiti muisi yetu." Kamkamu Waedomu yawawera na makakala walawiti kulikomanga nawu. 21 Toziya mfalumi gwa Edomu kawajimiriti ndiri Waisraeli kupita muisi yakuyi, su Waisraeli wagenditi mwanja kupita njira yingi.

22 Waisraeli woseri wagenditi mwanja kulawa Kadeshi, wasokiti Kulugongu Hori. 23 Su Mtuwa Mlungu kamgambiriti Musa na Aruni aku Kulugongu Hori, mumbaka mwa isi ya Edomu, 24 "Aruni hakahowi, hapeni kingiri muisi ilii yamuwalagiliti kuwapanana Waisraeli toziya mwenga wawili mgalemiti malagaliru gangu kuusu mashi ga Meriba. 25 Vinu gumtoli Aruni pamuhera na Eleazari mwana mpalu gwakuyi kugenda Kulugongu Hori. 26 Shakapanu gumvuli Aruni mahabiti gakuyi na gumvalisiyi Eleazari mwana gwakuyi. Aruni hakahowi pakawera aku kulugongu." 27 Musa katenditi gambira Mtuwa Mlungu ntambu yakamlagaliriti. Woseri watatu wakweniti kugenda kulugongu uganu shipinga shoseri sha wantu pawawalola. 28 Shakapanu Musa kamvuliti Aruni mahabiti gakuyi ga utambika na kumvalisiya Eleazari mwana gwakuyi. Na Aruni kahowiti kulaa kulugongu. Shakapanu Musa pamuhera na Eleazari waseleriti kulawa kulugongu, 29 Shipinga shoseri sha wantu pashiyambuliti kuwera Aruni kahowiti, Waisraeli woseri wadayiti kwajili ya yomberi kwa mashaka matatu.