1 "Shakapanu Musa kayoweriti na wakulu wa makabila ga Israeli, kawagambiriti, ashi do shisoweru shakalagalirituwiti na Mtuwa Mlungu.

2 Mumtu pakatula naziri yakuyi kwa Mtuwa Mlungu ama pakalagila kwa shirapu na kulitawa mweni kwa lagiru yakuyi, yomberi kafiruwa katendi shilii shakalagiliti na katendi goseri gakalagiliriti kwa visoweru vyakuyi.

3 Muhinga yakankali kankulikala ukaya kwa tati gwakuyi pakatula naziri yakuyi kwa Mtuwa Mlungu na kulitawa mweni kwa lagiru ali, 4 na tati gwakuyi papikanira lagiru lilii, nakamlewelera, su naziri zakuwi zakatuliti hazimbani na kila zakatuliti hazimbani na kila lagiru yakalaviyiti haimubani. 5 Kumbiti tati gwakuyi pakapikanira kuusu naziri ayi na lagira ayi pakamlewelera, su shilii shashilagilituwiti na muhinga ulii hapeni shilaviwi. Mtuwa Mlungu hakamlegiziyi toziya tati gwakuyi kashilewelera shitwatira shilii.

6 Paiwera muhinga pakayuguwa pa kutula naziri na lagiru ama kulagila pota ya kulihola kwanja, na yomberi kalitawa mweni, 7 shakapanu mpalu gwakuyi pakapikanira shitwatira shilii nakamlewelera, su yomberi hakalaviyi lagira zakuyi. 8 Kumbiti mpalu gwakuyi pakapikanira shitwatira shilii na kumlewelera, su mpalu gwakuyi hakaliwusiyi lilagilu lya mdala gwakuyi na shilii shakalagiliriti pota kulihola, su Mtuwa Mlungu hakamlegeziyi.

9 Kumbiti naziri na lagira ama shilii shashilagilituwiti na mawu mkenja ama mdala yakalekituwiti na mpalu gwaku, galii hagamtawi na kafiruwiti kalaviyi shakalagiliriti. 10 Mdala yakayugituwiti pakalaviya naziri na lagira yakuyi ama pakalagila kwa shirapu uganu pakawera ukaya kwa mpalu gwaku, 11 shakapanu mpalu gwakuyi pakashipikanira shitwatira ashi kumbiti katakuliti ndiri shintu shoseri na kumlewelera. Su virii vyakalagiliriti hakafiruwi kuvitenda. 12 Kumbiti handa mpalu gwakuyi pakapikanira visoweru vyakuyi, pakawusiya naziri na lagira lilii, Mtuwa Mlungu hakamlegeziyi yomberi kwa shilii shakalagiliriti. 13 Mpalu gwakuyi kaweza kujimira ama kubela shilii shashilagilituwiti na mdala ulii. 14 Kumbiti payiwera mpalu gwakuyi pakatakula ndiri shoseri kwanjira pakapikaniriti visoweru vya naziri na lagira ama vyavilagilituwiti na mdala gwakuyi, su yomberi hakaweri kalijimira lilagilu lilii lishaka ali pakapatiti visoweru vyakuyi toziya kalongiti ndiri shoseri. 15 Kumbiti pakaziwusiya shaka pa kupikanira visoweru vyakuyi, su mpalu ulii hakazibiwi kwa likosa lya mdala gwakuyi."

16 Aga ndo nazili na malagira zeni Mtuwa Mlungu kamlagaliriti Musa kuusu kulikolerana kwa mpalu na mdala gwakuyi, tati na muhinga gwakuyi pakawera kankali kakulikala mnumba mwakuyi.