1 Mtuwa Mlungu kendereyiti kuwagambira Musa na Aruni, 2 "Aga ndo malagizu ga Malagaliru galii neni Mtuwa Mlungu nugalaviya. Guwagambiri Waisraeli wawajegeri ng'ombi gwashidala msheri yakahera dosari na hakenitendi mahengu ga kulima. 3 Mwenga hamumpanani mtambika Eleazari ng'ombi ayu. Hakalaviwi kunja ya kambi na kulikituluwa kulongolu kwa mtambika ayu. 4 Shakapanu mtambika Eleazari hakatoli shyasi sha mwazi na kugumishira kwa shyala shakuwi mala saba, kugendera uwega wa kulungolu kwa Liringu Linanagala. 5 Ng'ombi yoseri ayu hakalunguziwi nakamu kwa motu kulongolu kwa mtambika. Kila shintu hashilunguziwi nakamu, lukuli na vinofu na mwazi na utumbu wakuyi. 6 Shakapanu mtambika hakatoli lubiki lwa mwelezi na shimeru sha hisopu na ubunta msheri na kuvilekera mumotu agu. 7 Pa aga, mtambika hakazigululi nguwu zakuwi na kwoga mashi, shakapanu kaweza kwingira kukambi. Yomberi hakaweri muhumba mpaka pamihi. 8 Muntu yakamlunguziya ng'ombi ulii viraa hakazigululi nguwu zakuyi na kwoga mashi, kumbiti nayomberi hakaweri muhumba mpaka pamihi. 9 Muntu yakawera muherepa hakagajoli livu lya ng'ombi ulii na kugajega pahala paherepa kunja kukambi. Livu lilii halituluwi weri na kutendwa na wantu woseri wa Israeli kuhanganyiya mumashi gaweri mashi ga kuwusiya uhumba, su gawusiyi vidoda. 10 Muntu yakagenda kujola livu lya ng'ombi ulii, yomberi hakazigululi nguwu zakuyi, kumbiti hakaweri muhumba mpaka pamihi. Lilagaliru ali haliweri lya mashaka goseri na haliweri lya Waisraeli na wantu wamonga yawagenda kulikala pamuhera nawu.

11 Muntu pakashinkula mtugulu gwa muntu yoseri, hakaweri muhumba kwa mashaka saba. 12 Lishaka lya tatu na lya saba muntu ayu hakaligululi kwa mashi galii ga kupunga, su hakaweri muherepa. Kumbiti pakaleka kulipunga mulishaka lya tatu na lya saba, muntu ayu hakasigali kuwera muhumba. 13 Muntu yakashinkula mitugulu, pakalipunga ndiri, yomberi hakalituli uhumba Liringu Linanagala lya Mtuwa Mlungu, su yomberi hakatulwi gweka kulawa kwa wantu wa Israeli. Muntu ayu hakasigali muhumba toziya kamishiritwi ndiri mashi galii ga kupunga.

14 Na lilagaliru ali haliweri handa muntu pakahowa muliringu lyakuyi. Kila muntu yakingira muliringu ali ama ulii yakawera Muliringu ali, hakaweri muhumba kwa mashaka saba. 15 Kila shombu shashigubikitwi ndiri shahera shifiku pampindi pakuwi hashiweri shihumba. 16 Muntu yoseri yakashinkula mtuguli gwa muntu yakalaguwa ama yakahowiti gambira wantu wamonga kunja kwa numba ama pakashinkula shifupa sha muntu ama pakashinkula lipumba, yomberi hakaweri muhumba kwa mashaka saba.

17 Kwajili ya walii yawalituliti uhumba, hawatoli livu lya tambiku ya kuwusiya vidoda yayilunguziwitwi nakamu, livu ali halihanganyiwitwi mushiwiga pamuhera na mashi yagatekitwi kulushemba. 18 Muntu yakawera muherepa hakatoli mtera gwa hisopo, hakagushiwiki mumashi galii, shakapanu hakalimishiri Liringu pamuhera na kila shintu shashiweramu na wantu yawaweriti mlaa. Viraa hakamumishiri muntu yakashinkuliti shifupa sha muntu yakahowiti ama mtugulu gwa muntu yakalaguwa ama muntu yakahowiti gambira wantu wamonga ntambu yawahowa ama muntu yakashinkula lipumba. 19 Mulishaka lya tatu na lya saba, muntu yakawera muherepa hakamumishiri muntu yakawera muhumba mashi galii. Ayi hayiweri lishaka lya saba, yomberi hakazigululi nguwu zakuyi na kwoga mashi na pamihi hakaweri muherepa.

20 Kumbiti muntu pakawera muhumba pakalipunga ndiri, muntu ayu hakatuluwi gweka kulawa kwa wantu wakuyi, toziya kankulitula uhumba Liringu Linanagala lya Mtuwa Mlungu. Toziya yomberi kamishilitwi ndiri mashi galii gakupunga, su kawera muhumba. 21 Wantu hawalijimiri lilagaliru ali mashaka goseri. Muntu yakamishira mashi ga kupunga, hakagululi nguwu zakuyi na ulii yakashinkula mashi galii ga muhumba, yomberi hakaweri muhumba mpaka pamihi. 22 Shoseri shakashinkula muntu muhumba, shintu ashi hashiweri shihumba, na yoseri ulii yakakishinkula shintu shilii, yomberi hakaweri muhumba mpaka pamihi."