1 Vinu Balaamu pakavimaniti kuwera Mtuwa Mlungu kafiliti kuwatekelera Waisraeli, su yomberi kagenditi ndiri kutunga kayi, kagalambukiti kulola kushiwala, 2 su pakaloliti kawawoniti Waisraelli wabawiriti malingu gawu, kila likabila pahali pakuyi. Shakapanu Rohu ya Mlungu imwiziriti. 3 Na Balaamu katakuliti ujumbi awu.

"Ujumbi waneni Balaamu mwana gwa Peori

visoweru vya muntu yakatumluwa masu.

4 Visoweri vya muntu yakapikaniriti visoweru vya Mlungu,

muntu yakawoniti mawonu ga Mlungu yakawera na makakala,

muntu yakasuntama makukama na agawu pakawona pota kufifa.

5 Gwee Yakobu Malingu gaku gaherepa kwa ntambu gaa mwenga wantu wa Yakobu,

yina, kambi za mwenga wantu wa Israeli!

6 Gawera gambira lilaranda lyalinyinyirisha mashi,

gambira shiwunga mumbwega mwa lushemba,

gambira mitera ya mishubiri yaiyalitwi na Mtuwa Mlungu,

gambira mitera ya mierezi mumbwega mwa mashi.

7 Womberi hawaweri na mvula zyazitosha,

mbeyu zawu hazipati mashi gavuwa,

mfalumi gwawu hakaweri mkulu kuliku Agagi,

na ufalumi wakuyi haupananwi ligoya nentu.

8 Mlungu kawatoliti kulawa Misri,

na yomberi kawakomeraga ngondu kwa makakala gakuyi makulu gambira mbogu.

Hakawagamiziyi wantu wa isi zimonga yawawera wangondu wawu,

hakamegimegi mifupa yawu,

hakawasomi kwa misali yakuyi.

9 Hakawanyatiri na kugonja pasi gambira simba,

gaa hakajeri kumwimusiya?

Katekelerwi muntu yoseri yakawatekelera mwenga Waisraeli,

viraa kapangilwi ulii yakawapangila Waisraeli."

10 Balaki kaweriti na maya kuusu Balaamu, kakoma shipopu mawoku gakuyi kwa maya na kumgambira, "Nukushemiti guwapangili wankondu wangu, kumbiti mala tatu zoseri azi gwenga guwatekelera! 11 Vinu gugendi zaku. Neni nukulagiliti kukupanana lifupu livuwa, kumbiti Mtuwa Mlungu kakwima!"

12 Balaki kamwankiti Balaki, "Hashi, niwagambiriti ndiri wantu yaguwatumiti kwaneni 13 kuwera ata megumpanani ikulu yaku paimema magini ga mpiya na zahabu, neni hapeni nuligalambuka lilagaliru lya Mtuwa Mlungu, kwa kutenda shitwatira shoseri shiheri ama shidoda kwa ntambu yanfira namweni? Ntakuliti kuwera shakatakuliti Mtuwa Mlungu, neni hanishitakuli."

14 "Vinu mbuya kwa wantu waneni, kumbiti pamberi pakuwuya, guleki nikugambiri vitwatira vyawagenda kuwatendera wantu waku mumashaka gagiza."

15 Su Balamu katakuliti ujumbi awu.

"Ujumbi wa neni Balaamu mwana gwa Beori,

visoweru vya muntu yakavugulitwi masu,"

16 "Ujumbi gwa muntu yakapikaniriti visoweru vya Mlungu,

muntu yakavimana marifa kulawa kwa Mlungu Mkulu,

muntu yakawoniti mawonu ga Mlungu yakawera na makakala,

muntu yakagonja makukama na agawu pakawona pota kufifa.

17 Nimwona, ulii yakafira kwiza kumbiti shakapanu,

nimwona kumbiti kapakwegera ndiri.

Ntondu hayirawiri kwa shiyiwuku sha Yakobu,

hakalawili mfalumi pakati pa Waisraeli.

Luhonga lwakuyi hakawasyatangi wakulu wa wantu wa Mowabu

hakawagamiziyi washiyiwuku shoseri sha Seti.

18 Edomu hakakoluwimlima na yomberi,

Seiri hayiweri yakuyi,

Israeli haipati ukanka mkulu.

19 Yumu gwa washiyiwuku sha Yakubu hakakolimlima

na yomberi hakawalagi yawaponikiti wa Ari."

20 Shakapanu Balaamu kawaloliti Waameleki, katakuliti ujumbi awu.

"Amaleki ndo isi ya wantu yawawera na makaka kuliku isi zyamonga,

kumbiti palupeleru hawagamiziwi nakamu."

21 Su Balaamu kawaloliti Wakeni, katakula ujumbi awu,

"Pahala pamulikala pawera ponera, mwenga Wakeni,

gambira shitukulu kumpindi nentu palitalawu.

22 Kumbiti hamlaguwi mwenga Wakeni.

Hamtoluwi kwa makakala na wantu wa Ashuru mpaka ndii?"

23 Kayi Balaamu katakuliti ujumbi awu,

"Ahaa! Hashi, gaa hakalikali, Mlungu pakagatenda aga?

24 Mitumbwi mikulu haisoki kulawa Kitimu,

hawaikomi Ashuru na Eberi

kumbiti na womberi viraa hawahowi mashaka goseri."

25 Su Balaamu kawukiti kuwuya ukaya, Balaki viraa kagenditi zakuyi.