1 Mtuwa kamgambiriti Musa, kamgambira, 2 "Guwawuziliri Wamidiani vitwatira vyawawatendiriti Waisraeli, shakapanu gwenga haguhowi." 3 Su, Musa kayowera na wantu kawagambira, "Muwatandi wantu kwa ngondu wagendi kuwakomanga Wamidiani kuwawuzilira Waisraeli kwajili ya Mlungu. 4 Kulawa kila likabila lya Israeli, hamjegi wantu elufu yimu kung'ondu." 5 Su, wantu elufu yimu yawalaviyitwi kulawa kila likabila muwamu mwa maelufu ga wantu wa Waisraeli, Wapalu woseri lilongu na wawili elufu waweri kala kwajili ya nkondu. 6 Musa kawajegiti wantu kunkondu pasi pa ulonguziya wa Finehasi mwana gwa mtambika Eliiazari. Pakawera na vyombu vya pahala pananagala na talumbeta za lirangaliru. 7 Wawakomangi wantu wa isi ya Midiani, handa Mtuwa Mlungu ntambu yakamlagaliriti Musa, wawalanga wantu woseri. 8 Muwamu mwa wantu wawalagitwi, kuweriti wafalumi wamhanu wa Midiani. Evi na Rekemu na Suri na Huri na Reba. Viraa wamlagiti Balamu mwana gwa Beori.

9 Waisraeli wawabatiti kwa makakala wantu wa Midiyani wadala pamuhera na wana wauwu na kutola wang'ombi na wakondolu pamuhera na lunda zawu zoseri. 10 Womberi wayilunguziyiti motu miji yawu na numba zawu na kambi zawu zoseri. 11 Watoliti vintu vyoseri vyavitolitwi kwa makakala munkondu, wantu pamuhera na wankanyama, 12 wamjegeriti Musa na Eleazari na shipinga shoseri yawaweriti mukambi muisi ya lulalanda lwa Mowabu, kumwambu kwa Yoridani pakwegera na Yeriku.

13 Musa na mtambika Eleazari pamuhera na wakulu wa shipinga sha wantu wa Israeli walawiti mukambi, womberi wagenditi kuwawanka wamashonta. 14 Musa kakalaziwitwi na wakulu wa nkondu na wakulu wa mashonta yawalonguziyiti vipinga vya wamashonta elufu yimu na wakulu wa mashonta mamiya ga wamashonta yawalonguziyitwi kulawa munkondu. 15 Musa kakosiya, "Iwera hashi muwaleka wadala awa woseri pawawera wakomu?" 16 "Muliholi kuwera wadala awa ndo yawafatiti visoweru vya Balaamu, wawatenditi Waisraeli wamlemi Mtuwa Mlungu kuli Peori ata malweli madoda gawizira wantu wakuyi Mtuwa Mlungu. 17 Su muwalagi wana woseri wapalu na kila mdala yakagonjiti na mpalu. 18 Kumbiti namuwalaga wahinga woseri, hawenigonji na wapalu, muwaleki walikali kwajili yamwenga. 19 Woseri walii yawawera pakati penu, walii yawalagiti muntu ama kushinkula mitugulu, su wafiruwa walikali kukambi kwa mashaka saba. Mulipungi mulishaka lya saba, mwenga pamuhera wantu yawabatitwi kwa makakala. 20 Viraa mpungi kila nguwu na kila shintu sashinyawitwi kwa lukuli na kwa mibayila ya wakondolu ama vintu vyavinyawitwi kwa mitera."

21 Mtambika Eleazari kawagambiriti wapalu yawawuyiti kulawa munkondu, "Ali ndo lilagaliru Mtuwa Mlungu lyakamlagaliriti Musa. 22 Zahabu na madini ga feza na madini ga shaba na madini ga shuma na madini ga bati na madini ga lisasi, 23 vintu vyoseri vyavivumiliya motu, havitakasiwi kwa kupitiziwa mumotu. Ata hangu, ndo mpaka vitakasiwi kwa mashi ga kutakasiya. Vintu vimonga vyoseri viweza ndiri kuvumiliya motu havitakasiwi kwa mashi ga kutakasiya. 24 Lishaka lya saba ndo mpaka mziputi nguwu zyenu, ndo pamuhera mherepa na kujimiruwa kwingira kukambi."

25 Mtuwa Mlungu kayowera na Musa, kamgambira, 26 "Gwenga na mtambika Eleazari, pamuhera na wakulu wa wantu wa Waisraeli, muwalangi lopola ya vintu, wantu na wankanyama. 27 Mbagulirani lopola mafungu mawili, lifungi limu lya mashonta yawagenditi kungondu na fungu limonga kwajili ya wantu woseri. 28 Shakapanu kulawirana na lifungu lilii lya mashonta yawagenditi kunkondu, gutuligweka tambika kwajili ya Mtuwa Mlungu. Kila yumu kulawa kila vintu miya mhanu, iweri ndo wantu ama ng'ombi na punda na kondolu ama mbuzi, 29 Gumpananani vintu avi Eleazari kuwera lifupu kwa Mtuwa Mlungu. 30 Kulawa lifungu lilii lya wantu woseri, kila shikundi sha vintu malongu mhamu gutoli shimu, iweri ndo wantu, ngombi, punda, kondolu na mbuzi. Avi haguwapanani wantu wa Walawi weni wana lihengu lya utenderu Kuliringu Linanagala lya Mtuwa Mlungu." 31 Musa na mtambika Eleazari watenditi handa Mtuwa Mlungu ntambu yakamlagaliriti Musa.

32 Lopola zawapatiti mashonta ziweriti, Kondolu na Mbuzi waweriti laki sita na malongu saba na mhanu elufu, 33 Ngo'mbi malongu saba na mbili elufu, 34 Punda malongu sita na yimu elufu, 35 na wahinga yawaweriti wagonja ndiri na mpalu malongu matatu na mbili elufu. 36 Nusu yakuyi, semu yeni wawabaguliriti mashonta wawagenditi kunkondu, iweriti Kondolu na Mbuzi laki tatu malongu matatu na saba elufu na miya mhanu, 37 muawa miya sita malongu saba na mhanu yawalaviyiti kwa Mtuwa. 38 Ng'ombi wa mashonta waweriti malongu matatu na sita elufu, na muawa malongu saba na mbili wawalaviwiti tambika kwa Mtuwa Mlungu. 39 Punda wawu waweriti malongu elufu miya mhanu, na muawa malongu sita na yimu wawalaviwiti tambika kwa Mtuwa Mlungu. 40 Wahinga waweriti elufu lilongu na sita, na muawa semu ya Mtuwa Mlungu iweriti ndo wantu malongu matatu na mbili. 41 Su, Musa kampanana mtambika Eleazari tambika ayi yayilaviwitwi kwa Mtuwa Mlungu, handa Mtuwa Mlungu ntambu yakamlagaliriti Musa.

42 Lifungu lilii lyawapananitwi Waisraeli, ndo sawa na lifungu lya wantu yawagenditi kungondu, 43 iweriti Kondolu na Mbuzi miya tatu na malongu matatu na saba elufu na miya mhanu, 44 na ng'ombi malongu matatu na elufu sita, 45 punda malongu matatu elufu na miya mhanu, 46 na wantu lilongu na sita elufu. 47 Kulawa lifungu ali lyawapanananitwi Waisraeli, Musa katoliti yumu pakati pa kila lopola malongu mhanu wankanyama malongu muhanu, ntambu yakalagaliritwi na Mtuwa Mlungu, kawapanana wantu wa Lawi weni watenditi lihengu kuliringu lya Mtuwa Mlungu.

48 Shakapanu wakulu woseri wamashonta kwa pamuhera wamugenderiti Musa, 49 na wamgambira, "twenga wantumintumi waku tuwawalanga mashonta woseri yawawera pasi petu na tuwona handa kwahera hata yumu gwawu kawuya ndiri kulawa kunkondu. 50 Su, tujega vyombu vya zahabu, vikuku, bangili, peti za mhuli, vipuli na sanga zeni kila muntu kapatiti. Tulaviyiti avi kwajili ya kulonga mayagashii Mtuwa Mlungu kwajili ya makaliru getu." 51 Musa na mtambika Eleazari wayanga vintu vyoseri vyavilembitwi na zahabu. 52 Walanga ya zahabu yoseri yawamlaviliriti Mtuwa Mlungu iweriti handa kilu miya mbili, 53 kila shonta kalitoliriti vintu vyakalopoliti mweni. 54 Su, Musa na mtambika Eleazari wayiwankiti zahabu ilii kulawa kwa makamanda waijega Muliringu lya kuliwona, iweri liholuziwu kwa Waisraeli kulongolu kwa Mtuwa Mlungu handa kawalolera.