1 Avi ndo visoweru Musa vyakawagambiriti Waisraeli woseri pawaweriti kuntundu kwakulawa mshenji mwa lushemba Yoridani. Womberi wanyawiti malingu gawu mulularanda lwa Yoridani pakwegera na sufu, pakati pa mji gwa Parani uwega gumu na mji gwa Tofeli na Labani na Hazeroti na Dizahabu uwega gumonga. 2 Kutyanga kulawa lugongu Sinayi kugenda Kadeshibaneya, wantu waweza kugenda mwanja kwa mashaka lilongu na yimu, kwa kupitira njira ya lugongu Seiri. 3 Mulishaka lya kwanja muwezi gwa lilongu na yimu, mushinja sha malongu na msheshi pa kulawa Misri, Musa kawagambiriti Waisraeli kila shintu shilii Mtuwa Mlungu shakamlagaliriti kawagambiri womberi. 4 Musa katenditi hangu pakamkomiti kala na kumkanka Sihoni mfalumi gwa Waamori, ulii yakaweriti kankulikala mumji gwa Heshiboni pamuhera na Ogu mfalumi gwa Bashani, ulii yakaweriti kankulikala mji gwa Ashitaroti na mji gwa Edireyi. 5 Waisraeli pawaweriti wankali muisi ya Wamowabu uwega wa kwagulawa mshenji mwa lushemba Yoridani, Musa kanjiti kugatakulira malagaliru pamuhera na mafundu ga Mlungu.

Yomberi kawagambiriti, 6 twenga patuweriti kulugongu Sinayi, Mtuwa Mlungu gwenu katugambiriti, mwenga mulikala mulugongu alu kwa shaka shitangara. 7 Su vinu mwenga mtupuli malingu genu na mwendereyi na mwanja. Mgendi muisi yawalikala Waamori na mumikowa yoseri ya pakwegera, mulularanda lwa Yoridani muisi ya vigongu muluseleru lwa vigongu kwaguzyeta mshenji, aku Negebu mulularanda lwa kumpwani. Mgendi muisi yawalikala Wakanaani na isi ya Lebanoni mpaka kulushemba lukulu lwa Eufrati. 8 Mloli, neni niwapanani mwenga isi ayi. Neni Mtuwa Mlungu, nuwalagiliti kuwapanana wambuyi wenu Abrahamu na Isaka na Yakubu pamuhera na shiyuwuku shawu. Su vinu mgendi mwakaitoli kwa makakala na muikali isi ilii.

9 Musa kawagambiriti wantu, twenga patuweriti twankali kulugongu Sinayi, neni niwagambiriti, lihengu lya kuwalongoziya mwenga liwera likulu ng'anji kwa neni. Hapeni ntendi gweka yangu. 10 Mtuwa Mlungu gwenu, kawatenda mwenga muweri wavuwa gambira ntondu za kulyela. 11 Mtuwa Mlungu gwa wambuyi wetu, kawatendi mwenga kuwera wavuwa mala elufu kuliku ntambu yamuwera vinu na kawatekeleri ntambu yakalagiliti. 12 Kumbiti neni gweka yangu hawezi hashi lihengu ali likulu lya kuwakolaniziya mwenga mwawoseri? 13 Mwenga msyaguli wapalu yawawera na luhala na umana na yakagoheleluwa kulawa mukila likabila su waweri wakulu wenu. 14 Mwenga munankuliti, shitwatila shagutakula ndo shiherepa kwa twenga kushitenda. 15 Su nuwashemiti pamuhera wapalu yawaweriti na luhala na umana na yawagoheleluwa, walii yawasyagulituwiti kulawa mumakabila genu, nuwatuliti kuwera wakulu wenu. Wamu wawu waweriti wakulu wa wantu elufu na wamonga wakulu kwa miya na wamonga wakulu kwa wantu malongu muhanu na wamonga waweriti wakulu kwa wantu lilongu.

16 Shaka shilaa shilii, niwagambiriti wakulu wenu, mpikaniri masitaka ga wantu wenu pamuhera na masitaka ga wahenga yawalikala pakati penu. Mtozi teratera, 17 mwenga namumpendereya muntu yoseri muutoza wenu. Mpikaniri masitaka ga walii yawawera wahushu ntambu yampikanira masitaka ga walunda. Namumtira muntu yoseri pakakalala, toziya utoza yamtoza ilawa kwa Mlungu. Sitaka lyoseri palikamala kwa mwenga, su mulijegi kulongolu kwaneni hantozi. 18 Shaka shilaa shilii, nuwalagaliriti vitwatira vyoseri vyamfiruwa kutenda.

19 Shakapanu twenga tutenditi gambira Mtuwa Mlungu tambu yakatulagaliriti. Twanjiti mwanja kuwuka mulugongu Sinayi na tugenditi mwanja kupitira mushiwala shikulu na sha kutiriziya shamushiwoniti, kugendera njira yaigenda muisi ya vigongu vya Waamori. Patusokiti Kadeshibarineya, 20 neni niwagambiriti, vinu mwenga msoka muisi ya vigongu vya Waamori, isi ilii Mtuwa Mlungu gwenu katupanana. 21 Mloli, Mtuwa Mlungu gwenu katupanana twenga isi ayi. Su mgendi na kuitola kwa makakala gambira Mtuwa Mlungu gwa wambuyi wetu ntambu yakawalagiliti kutupanana. Namtira! Namshashatika.

22 Kumbiti mwawoseri mwenga mwiziti kwaneni na kulonga, pamberi pakugenda, tuwatumi wapalu wamu kulii wakaloliloli kwa bada isi ilii, su womberi pawawuya hawatugambiri njira iherepa kwa twenga kugenda kulii na miji ya kulii ilifana ntambu gaa.

23 Shitwatira ashi shiwonekiti kuwera shiherepa kwaneni, su nuwasyaguliti wantu lilongu na mbili, muntu yumu kulawa mukila likabila. 24 Womberi wagenditi muisi iliii ya vigongu, wasokiti kululalanda lwa Eshikoli na waluloliti loliti kwa bada. 25 Pawawuyiti womberi watujegeriti mabwajubwaju gamu ga isi ilii na watugambiriti kuwera isi ilii Mtuwa Mlungu wetu upanana, iherepa nentu.

26 Kumbiti mwenga mjimira ndiri lilagaliru lya Mtuwa Mlungu gwenu kugenda muisi ilii. 27 Muhinginikiti mumalingu genu pamlonga, Mtuwa Mlungu katukalalira, su katulaviyiti Misri, kavilekeziyiti vipinga vya Waamori vitwagamiziyi. 28 Iwera hashi twenga tugendi kulii? Twenga tutira. Wapalu yatuwatumiti kulii watugambiriti kuwera wantu yawalikala kulii wawera makakala na watalipa nentu kuliku twenga, viraa walikala mumiji yaiwera na vibambaza vitalipa mpaka kulyera. Kayi walongiti kuwera wawoniti mikambaku shiyuwuku sha Anaki.

29 Shakapanu nenu niwagambiriti mwenga, namshashatika, namuwatira wantu walii. 30 Mtuwa Mlungu gwenu yakawalongolera, Mlungu mweni hakaweri uwega wetu kuwakomanga wankondu wenu ntambu yakatenditi kulongolu kwenu kulii Misri 31 na kushiwala kulii. Mwenga mwoniti Mtuwa Mlungu gwenu ntambu yakawalongoleriti mwenga, gambira tati ntambu yakamlolera weri mwana gwakuwi, munjira yoseri yamgenditi mpaka mwenga msokiti pahala panu. 32 Kumbiti ata panongiti goseri aga, mwenga mumjimiriti ndiri Mtuwa Mlungu gwenu, 33 ulii yakawalongoleriti, pashiru kawalongoleriti kwa motu kuwalunguziya njira yamuigendera na paluwala kawalongoleriti kwa lihundu lilii su kuwasakulila pahala paherepa pa kunyawa malingu genu.

34 Mtuwa Mlungu pakapikaniriti shilii shamlongiti, su kakalariti, kalirapiti pakalonga, 35 kwahera ata yumu gwenu mushiyuwuku ashi shikontola hakagendi kwingira muisi ilii iherepa yanuwalagiliti kuwapanana wambuyi wenu, 36 kumbiti Karebu mwana gwa Yefuni ndo hakingiri. Neni hanimpanani isi ayi yakayilolitiloliti kwa bada iweri yakuwi pamuhera na shiyuwuku shakuwi toziya kawera mwaminika nentu kulongolu kwa neni Mtuwa Mlungu. 37 Toziya ya mwenga, Mtuwa Mlungu kankalalariti na kalongiti, ata gwenga hapeni gwingiri muisi ilii. 38 Kumbiti mtanga gwaku Yoshuwa mwana gwa Nuni, ndo hakawalongoziyi Waisraeli kwingira muisi ilii. Su gumgangamaziyi toziya yomberi hakawalongoziyi Waisraeli kuyitola kwa makakala isi ilii.

39 Shakapanu Mtuwa Mlungu katugambira twawoseri twenga, mwenga mtakula kuwera wana wenu wadidi hawatolowi kwa makakala na wangondu wenu. Toziya womberi hawenikuli, wavimana ndiri vitwatira viherepa na virii vikondora. Kumbiti womberi ndo walii yang'enda kuwapanana isi ilii, hawingiri na kuhala. 40 Kumbiti mwenga, mgalambuki na kuwuya kushiwala kulola ku Bahari ya Shamu.

41 Shakapanu wambuyi wenu wanankuliti, twenga tutenda vidoda, tumjimira ndiri Mtuwa Mlungu. Twenga hatugendi muisi ilii na kulikomanga ngondu gambira Mtuwa Mlungu ntambu yakatulagaliriti. Kila mpalu pakati pawu katoliti silaha yakuwi, waliholiti kuwera hayiweri rahisi kuitola kwa makakala isi ilii ya vigongu.

42 Kumbiti Mtuwa Mlungu kang'ambiriti, guwaberiziyi nawakwena kugenda kulikomanga muisi ilii, toziya neni hapeni weri pamuhera na womberi, wangondu wawu hawawagamiziyi kwa kuwakomanga. 43 Su neni niwagambiriti aga, kumbiti womberi walemiti shilii Mtuwa Mlungu shakatugambiriti, womberi wingiriti pota kulishera muisi ilii ya vigongu. 44 Shakapanu Waamori yawalikaliti muisi ya vigongu virii wasulukiti na kuwawinga gambira wanjuki. Wawawingiti na kuwakomanga kulawa aku Seiri mpaka Horima.

45 Su wambuyi wetu wawuyiti na kumlilila Mtuwa Mlungu, kumbiti yomberi kawapikaniriti ndiri ama kuwashera. 46 Su tusigaliti kulikala aku Kadeshibarineya kwa shaka shitangala.