1 Mwenga mfiruwa kuwera waminika kugajimila malagaliru goseri ganuwapanana leru. Shakapanu mwenga hamulikali na kwongereka na hamwingiri na kuitola kwa makakala isi ilii Mtuwa Mlungu yakawalagiliti kuwapanana wambuyi wetu. 2 Namulyaluwa ntambu Mtuwa Mlungu gwenu yakawalongoziyiti mwenga kushiwala kwa mivinja malongu msheshi, kawatenditi mwenga muweri na ntabiku toziya kafiliti mwenga namulitumba maweni kumbiti mumtumbiri yomberi na mfundiki. Viraa kafiliti kuwajera mwenga su kavimani shamulihola kutenda, handa mwenga memjimiri malagaliru gakuyi ama ndala. 3 Kawalekiti mwenga mtabiki, katenditi muweri na njala, shakapanu kawapananiti shiboga kulawa kumpindi shashishemuwa mana mwenga mliyi. Shiboga ashi mwenga mushimaniti ndiri ama wambuyi wetu hawenishimani. Mlungu katenditi hangu su kawafundi kuwera muntu hapeni kalikali kwa libumunda hera, kumbiti hakalikali kwa kila shakatakula Mtuwa Mlungu. 4 Mushaka ashi sha mivinja malongu msheshi, nguwu zyetu zisakaliti ndiri, viraa magulu genu gakwepuka ndiri. 5 Muliholi kuwera Mtuwa Mlungu gwenu kankuwazibu gambira tati ntambu yakawakanya wana wakuwi. 6 Su mwenga mugajimiri malagaliru ga Mtuwa Mlungu gwenu, mulikali makaliru ga kumgohelera na kumjimira mweni. 7 Mtuwa Mlungu gwenu kawajega mwenga muisi iherepa yaiwera na mbotu, isi ilii yaiwera na lushemba zivuwa na mbwiru na mashi yagabwituka kulawa kulularanda na kumigongu, 8 isi yaiwera na nganu na shayiri na mizyabibu na tini na mikomamanga na mizyetuni na luwashi. 9 Aku mwenga hampati shiboga shivuwa na hapeni mpungukiwi shintu. Matalawu gakuyi gawera na madini ga shuma na migongu yakuwi muweza kubawa madini ga shaba. 10 Hamliyi na kwikuta, hamlongi mayagashi Mtuwa Mlungu gwenu, kwa isi iherepa yakawapananiti.

11 Musa kendereyiti kuwagambira Waisraeli, muliloli weri namumlyaluwa kwa kuleka kugajimira malagaliru gakuyi na malagizu gakuyi na mashariti gakuyi ganuwapanana leru. 12 Mwenga pamuliya na kwikuta, pamnyawa numba ziherepa na kulikala amu, 13 viraa wang'ombi wenu na wakondolu wenu na zahabu na mdini ga feza na kila shintu pashyongereka, 14 mwenga namuwera na ubinta na kumlyaluwa Mtuwa Mlungu gwenu, Mlungu yakawalaviyiti kulawa muisi ya Misri, kulii mwenga muweriti wamanda. 15 Mtuwa Mlungu ndo yakawalongoziyiti mwenga kushiwala shilii shikulu na kutiriziya, shiwala shashiweriti na wanjoka yawawera na usungu na vipinini, isi ilii yaiweriti ndiri na mashi, mweni kawalaviriti mashi kulawa mulitalawu liganga shuma. 16 Kayi mweni ndo yakawaliyiziyiti shiboga sha mana kushiwala, shiboga shilii wambuyi wetu washimaniti ndiri. Kagatenditi aga goseri mwenga mpati tabu na kuwajera su kawapanani maherepa. 17 Su mwenga muliloli weri namwiza kulitakulila mumyoyu mwenu, kulawirana na makakala na uwezu wetu twenga twaweni tuwera walunda. 18 Muliholi kuwera Mtuwa Mlungu gwenu, ndo ulii yakawapanana uwezu wa kuwera walunda. Kankutenda hangu toziya kawera mwaminika kwa lipatanu lilii lyakalilapiriti kwa wambuyi wetu kuwera mekalitendi. 19 Mwenga namumlyaluwa Mtuwa Mlungu gwenu na kuifata wamilungu wamonga su kuyitendera na kuyiguwira. Nankuwaberiziya mwenga leru pamuiguwira nakaka hamwagamiri. 20 Pamumjimira ndiri Mtuwa Mlungu, mwenga hamwagamiziwi gambira isi zilii Mlungu zakazyagamiziya mwenga pamulikomangiti ngondu nawu.