1 Musa kawagambiriti Waisraeli, Twenga tugalambukiti kugenda kushana mumji gwa Bashani, mfalumi Ogu kiziti pamuhera na wanjagira wakuwi kulikomanga ngondu na twenga aku mumji gwa Edireyi. 2 Kumbiti Mtuwa Mlungu kang'ambiriti, nagumtira toziya hanulutendi shonta lyaku kumkanka yomberi pamuhera na shonta lyakuyi lyoseri na kuitola kwa makakala miji yawu. Mwenga hamumtendi mfalumi ayu ntambu yamumtenditi Sihoni mfalumi gwa Waamori yakalikaliti kulii Heshiboni.

3 Su Mtuwa Mlungu gwenu katutenditi twenga tumkanki mfalumi Ogu pamuhera na shonta lyakuyi lyoseri, tuwalagiti woseri, tumlekiti ndiri muntu yoseri kalikali. 4 Mushaka shilii twenga tuitoliti miji yakuwi yoseri, kuweriti ndiri ata mji gumu yatugulekiti kuutola kwa makakala. Miji yoseri yatuitoliti kwa makakala iweriti malongu sita, enewu lyoseri lya Arigobu, mji gulii yagukolituwitimlima na mfalumi Ogu gwa Bashani. 5 Miji yoseri ayi iweriti na vibambaza vitalipa kugenda kumpindi na guweriti na magomi na vitatiru. Viraa kuweriti na vijiji vivuwa vyavizengekiwituwiti ndiri na vibambaza. 6 Twenga twagamiziyiti nakamu kila shintu ntambu yatwagamiziyiti muisi ilii mfalumi Sihoni yakakolitimlima. Tuwalagiti wapalu woseri na wadala woseri pamuhera na wana woseri. 7 Kumbiti mifugu pamuhera na vintu vyaviweriti mumiji ilii tuvitoliti.

8 Su mushaka shilii tuitoliti isi ilii ya walii wafalumi wawili wa Waamori yawalikaliti kumwambu kwa lushemba Yoridani, pakati pa lushemba Arinoni na lugongu Herimoni. 9 Wasidoni lugongu alu Herimoni walushemiti Siriyoni, Waamori walushema lugongu alu Seniri. 10 Tuitoliti kwa makakala miji yoseri yaiweriti kulularanda na Gileyadi na Bashani mpaka miji ya Saleki na Edireyi, mji gwa mfalumi Ogu aku Bashani.

11 Mfalumi Ogu gwa aku Bashani ndo shikambaku yakasigaliti gweka yakuwi pakati pa Warefai. Jeneza lyakuyi linyawituwiti kwa shuma, liweriti na utali wa meta msheshi na upana wa meta mbili. Jeneza lyakuyi liwera aku mpaka leru mumji gwa Waamoni aku Laba.

12 Patuitoliti kwa makakala isi ayi, nuwapananiti makabila ga Rubeni na Gadi enewu lya kwanjira kushana mwa mji gwa Aroeri pakwegera na Arinoni na nusu ya vigongu vya Gileyadi pamuhera na miji yakuwi. 13 "Shakapanu nilipananiti nusu ya likabila lya Manasi enewu lyalisigaliti lya Gileyadi pamuhera na Bashani yoseri yaikolituwitimlima na mfalumi Ogu, enewu lyoseri lya Arigogu. Isi yoseri ya Bashani imanikana kuwera isi ya Warefayi." 14 Yairi yakaweriti mkulu gwa likabila lya Manasi, yomberi katoliti enewu lyoseri lya isi ya Arigogu, ndo Bashani, mpaka mumbaka wa Geshuri na Maaka. Vijiji vyoseri kavipananiti litawu lyakuyi, su mpaka leru vimanika handa vijiji vya Yairi.

15 Wantu wa lukolu lwa Makiri wa likabila lya Manasi, nuwapananiti mji gwa Gileyadi, 16 wantu wa makabila ga Rubeni pamuhera na Gadi nuwapananiti isi yoseri kulawa mji gwa Gileyadi mpaka lushemba Arinoni. Mbaka yawu uwega wa kusika, uweriti pakati pa lularanda lwa lushemba Arinoni na uwega wa kushana mbaka yawu iweriti lushemba Yaboki ndo yaiweriti mbaka na isi ya Waamori. 17 Uwega wa kwaguzyeta mshenji, isi yawu iyeneyiti mpaka lushemba Yoridani, kulawa litanda Galilaya uwega wa kushana, useleriti mpaka Bahari ya Araba, kugenda mpaka Bahari ya Munu, mpaka miseleru ya Pisiga uwega wa kwagulawa mshenji.

18 Shaka shilii nuwapananiti makabila matatu malagizu aga, Mtuwa Mlungu gwenu kawapananiti isi ayi uwega wa kwagulawa mshenji mwa lushemba Yoridani iweri yawu. Vinu shonta lyenu watoli silaha waloki lushemba Yoridani kuitola kwa makakala isi pawawalongolera walongu wenu Waisraeli. 19 Kumbiti wadala wenu na wana wenu na wankanyama wenu, nivimana kuwera muwera na mifugu ivuwa, hawasigali mumiji yaniwapananiti. 20 Muwatangi walongu wenu Waisraeli mpaka Mtuwa Mlungu pakawawezesha womberi kulikala kwa ponga pa womberi kuitola kala kwa makakala isi yoseri Mtuwa Mlungu gwenu yakawapanana womberi uwega wa kwaguzyeta mshenji mwa lushemba Yoridani ntambu yakatenditi kwa mwenga uwega wa kwagulawa mshenji mwa lushemba. Pa aga, mwenga woseri muweza kuwuya muisi ayi yaniwapananiti.

21 Shakapanu numlagaliriti Yoshuwa, gwenga guwona kwa masu gaku vitwatira vyoseri virii Mtuwa Mlungu gwenu, vyakawatendiriti wafalumi walii Sihoni na Ogu. Su Mtuwa Mlungu hakawatenderi ntambu iraa ayi wafalumi wa isi zoseri zyamwingira. 22 Namuwatira womberi toziya Mtuwa Mlungu gwenu ndo hakalikomangi ngondu badala yenu.

23 Mushaka shilii, numuhigiti Mtuwa Mlungu panonga, 24 gwee Mtuwa Mlungu, nivimana gwanja hera kuwonisiya neni ntumintumi gwaku ukulu waku na makakala gaku makulu gaguweza kutenda. Hashi kwana mlungu gaa aku kumpindi ama pasipanu yakaweza kutenda vitwatira vikulu na vya kulikangasha ntambu yaguvitenda gwenga? 25 Gundeki neni ndoki lushemba Yoridani, niwoni isi yaiwera na mbotu uwega wa kwagulawa mshenji, isi iherepa ya migongu pamuhera na migongu ya Lebanoni.

26 Kumbiti Mtuwa Mlungu kankalaliriti toziya ya mwenga, kalemiti kumpikanira. Badala yakuwi kang'ambiriti, itosha! Nagutakula kayi shitwatira ashi. 27 Gukweni kulupeleru lwa lugongu Pisiga, guloli uwega wa kwaguzyeta mshenji na kushana na kusika na kwagulawa mshenji na guiyoni isi ilii, kumbiti gwenga hapeni guloki lushemba lwa Yoridani. 28 Kumbiti gumlagaliri Yoshuwa shilii shakafiruwa kutenda na gumgangamaziyi, toziya yomberi ndo ulii hakawalongoziyi Waisraeli kuloka lushemba Yoridani kugenda kuitola kwa makakala isi yagugenda kuiwona.

29 Su tusigaliti kulikala mulularanda pakwegera na mji gwa Beti Peori.