1 Payiwera mpalu kamyuga mdala na shakapanu kafiliziwa ndiri na yomberi toziya kawona kwakuwi shintu shifaa ndiri. Su mpalu ayu kamlembera malembu ga kumleka na kumpanana na kumuwusiya ukaya kwakuwi. 2 Mdala ulii pakawuka ukaya kwa mpalu ulii, yomberi hakaweri mlekeru kuyuguwa na mpalu gwingi. 3 Kumbiti mpalu ayu gwa pili yakamuyugiti pakamlembera malembu ga kumleka na kumpanana na kumuwusiya ukaya kwakuwi, ama mpalu ayu pakahowa, 4 su mpalu ulii yakamuyugiti kwanja, yomberi kalekeziwa ndiri kumuyuga kayi mdala ulii kuwera mdala gwakuwi, toziya yomberi kawera muhumba. Shitwatira ashi hashijegi ukondola muisi ilii Mtuwa Mlungu gwenu yakawapanani muhali.

5 Mpalu yakaweriti mundowa ya syayi, nakagenda mungondu, viraa nakapananuwa lihengu lyoseri. Yomberi kaweri mlekeru kwa shaka sha shinja shimu, su kalikali ukaya na kunemelera na mdala gwakuwi yakamuyugiti.

6 Gwenga pagumuwanda shintu shoseri mlongu muyagu Mwisraeli, nagutula libuwi kuwera poni pamabuwi galii mawili ga kusagila. Toziya kaya yaku wagatendera mabuwi galii kusagila viboga su wanyawi mabumunda ga kuliya.

7 Muntu yoseri pakamtola Mwisraeli muyaguwi kwa lazima kumtenda kaweri mmanda gwakuwi ama kumshuwuza kwa muntu gwingi kaweri mmanda, muntu ayu yakamtoliti muyaguwi kwa lazima hakalagwi. Kwa kutenda ntambu ayi mwenga hamumalili ukondola pakati penu.

8 Handa muntu pakawera na malweli madoda ga lukuli lwa nshimba, mwenga mfiruwa kulilora weri kutenda kila shintu shamlagalirituwiti na watambika wa shiyuwuku sha Walawi. Mtendi ntambu yanuwalagaliriti mwenga. 9 Namulyaluwa Mtuwa Mlungu gwenu ntambu yakamtenditi Miriyamu, mwenga pamuweriti mumwanja kulawa Misri.

10 Pagumpanana uwanda wa shintu shoseri wapakwegera gwaku, gwenga nagwingira ukaya kwakuwi kutola poni, 11 kumbiti gumuheperi kunja kwa numba yakuwi na gumleki ulaa mweni kakujegeri poni ayi. 12 Handa yomberi pakawera muhushu, gwenga nagulikala pashiru poseri na lishuka lyakatuliti poni, 13 gumwuziliri kila lishaka pamihi su pashiru kawezi kuligibikira na kukuluwira matekeleru kwa Mlungu. Kwa kutenda hangu, Mtuwa Mlungu hakaherepeziwi na gwenga.

14 Nagumzulumu shibaluwa muhushu na muhitaji, muntu ayu pakawera Mwisraeli ama muhenga yakalikala mumiji yenu. 15 Gwenga gumpanani shibenamgongu kila lishaka pamberi mshenji kuzyeta, toziya yomberi ka muhushu na kashitumbira shibenamgongu ashi. Pagumpanana ndiri, yomberi hakamlili Mtuwa Mlungu, su gwenga haguweri na likosa.

16 Walera nawalaguwa kwa vidoda vya wana wawu, viraa wana nawalaguwa toziya ya vidoda vya walera wawu. Kila muntu hakalagwi kulawirana na vidoda vyakuwi mweni.

17 Namuwayima wahenga na washiwa galii goseri gagafiruwa kuwapanana. Viraa namtola nguwu ya mkenja kuwera poni. 18 Namulyaluwa kuwera mwenga muweriti wamanda muisi ya Misri na Mtuwa Mlungu gwenu kawakomboliti mwenga kulawa aku. Ndo mana nankuwapanana mwenga malagaliru aga.

19 Mwenga pambenanga mabenu genu kulirambu na kugaleka gamonga mulirambu lilii, mwenga namuwuya kugatola, kumbiti muwalekeri wahenga na washiwa na wakenja. Kwa kutenda hangu Mtuwa Mlungu gwenu hakawatekeleri mumahengu genu goseri gamtenda. 20 Mwenga pamtikinyia mizeyituni yenu, namuwuya kayi kubenanga mabwajubwaju mumitambi yakuwi, kumbiti muwalekeri wahenga na washiwa na wakenja. 21 Pamwapa zyabibu, namwuya kusola zyabibu zyazisigaliti, kumbiti muwalekeri wahenga na washiwa na wakenja. 22 Namulyaluwa kuwera mwenga muweriti wamanda muisi ya Misri, ndo mana nankuwapanana malagaliru aga.