1 Muntu pakawoneka kalaguwa kuntundu muisi ilii Mtuwa Mlungu yakagenda kuwapanana, na mwenga mumumana ndiri ulii yakalagiti, 2 wazewi wetu pamuhera na watoza wenu hawawizi na kupima utali kulawa mtuguli gwa muntu ulii paguwera mpaka mji gwa pakwegera paguwera. 3 Shakapanu wazewi wa mji gulii yaguwera pakwegera na mtuguli gwa muntu ulii, womberi hawatoli mwana gwa ng'ombi yakakula nentu ndiri, ng'ombi ulii hakenitendi mahengu goseri galii. 4 Womberi hawamtoli kugenda nayu pahala pa lularanda palushemba lulii lyaluyuma ndiri, lularanda alu lulimuwa ndiri ama kuyaluwa shintu shoseri, kulii hawamminduli singu ng'ombi ulii. 5 Watambika walikabila lya Lawi hawagendi viraa kulii, toziya Mtuwa Mlungu gwenu, kawasyaguliti wamtenderi na kuwapetera mashi wantu kwa litawu lyakuyi na kwamuwa kila sitaka na ndewu zyazilawira. 6 Shakapanu wazewi kulawa mji ulii yauwera pakwegera na mtuguli gulii, hawanawi mawoku gawu pamwana gwa ng'ombi ulii yawamminduliti singu, 7 womberi hawatakuli, twenga tumlaga ndiri muntu ayu, viraa tumwona ndiri muntu yakamlagiti muntu ayu. 8 Mtuwa Mlungu guwalekeziyi vidoda wantu waku Israeli yauwakomboliti kulawa Misri. Naguwatulila wantu waku likosa lya muntu ulii yakatenditi shitwatira ashi sha ukondola kwa kulaga, kumbiti guwalekeziyi. 9 Kwa kutenda hangu, mwenga hamtendi shilii Mtuwa Mlungu shakafira, viraa mwenga hapeni muweri na ukondola kwa ulagaji wa muntu ulii.

10 Mwenga pamgenda kulikomanga na wangondu wenu na Mtuwa Mlungu pakawatanga kuwakanki womberi, na mwenga pamuwatola mateka, 11 handa yumu gwenu pakawona mdala mumateka walii kaherepa yakamfira, kafira kamuyugi, 12 su mpalu ayu hakafiruwi kamtoli mdala ulii kugenda nayu ukaya kwakuwi. Na mdala ulii hakamogi nvili zyakuwi na kuwembura ndoli zyakuwi, 13 kavuli nguwu zyakuwi za mateka na kuvala nguwu zingi za wantu wa Israeli. Mdala ulii hakalikali ukaya kwa mpalu ulii kwa shaka sha mwezi gumu kuwadayira shiwembu tati na mawu gwakuwi, shakapanu mpalu ulii hakawezi kumuyuga. 14 Shakapanu pagufiriziwa ndiri na mdala ulii, hagumleki kagendi zyakuwi. Nagumshuwuza ama kumtenda gambira mmanda, toziya gwenga gugonjiti nayu.

15 Payiwera mpalu kawera na wadala wawili, yomberi kamfira nentu mdala yumu kuliku mdala yumonga. Wadala woseri wawili wamlelera wana wapalu, kumbiti mwana mpalu shipanta njira kawera gwa mdala ulii yakamfira ndiri. 16 Mpalu ulii pakafira kugenda kubagula uhala wakuwi kwa wana wakuwi, yomberi kafiruwa ndiri kumpendereya mwana gwa mdala ulii yakamfira nentu kumpanana haki yakuwi ya uhala wa shipanta njira. 17 Mpalu ulii hakayambuli haki ya mwana shipanta njira, mwana gwa mdala ulii yakamfira ndiri kwa kumpanana mwana ulii mala mbili ya uhala wakuwi. Mwana mpalu ulii hakaweri lilangaliru lya kwanja lya makakala ga tati gwakuwi.

18 Handa muntu yoseri pakawera na muntemba mbinta na mtundu, yakamjimira ndiri tati gwakuwi ama mawu gwakuwi pawamberiziya, 19 su tati gwakuwi na mawu gwakuwi hawamjegi kwa wazewi kuligomi likulu lya mji. 20 Shakapanu womberi hawawagambiri wazewi wa mji, mwana gwenu kawera mbinta na mtundu na kalema kutujimira twenga, kawera na lwaliya na kulanda ng'anji ujimbi. 21 Su wantu wa mji ulii hawamgumangi mabuwi mwana ulii mpaka kahowi. Kwa kutenda hangu hamumalili ukondola wa ntambu ayi pakati penu. Kila muntu mu Israeli hakashipikaniri shitwatira ashi na kutira.

22 Handa muntu pakatenda vidoda vya kumtenda kalaguwi na kalaguwa kwa kumumindula singu pamtera, 23 mtuguru gakuyi nagulekuwa pamtera pashiru poseri, kumbiti hamugusiri lishaka lilaa lilii. Toziya kila muntu yakaminduluwa singu pamtera, su kapangiluwa kulongolu kwa Mlungu. Kwa njira ayi, mwenga hapeni muituli uhumba isi yenu yampananituwiti na Mtuwa Mlungu gwenu.