1 Musa kendereyiti kuwagambira, Mpalu yoseri yakasaulitiwituwiti ama yakalikitulituwiti upalu wakuwi, yomberi nakajimiluwa kuguwira pamuhera na wantu wa Mtuwa Mlungu.

2 Na mwana yoseri yakayuwukiti kwa tati yakawera Mwisraeli na mawu yakawera ndiri Mwisraeli, mwana ayu ama shileri shakuwi mpaka shileri sha lilongu, nakalekeziwa kuguwira pamuhera na wantu wa Mtuwa Mlungu.

3 Muntu gwa Amoni ama muntu gwa Mowabu, vileri vyawu vyoseri mpaka vileri vya lilongu, womberi nawalekeziwa kuguwira pamuhera na wantu wa Mtuwa Mlungu. 4 Toziya womberi walemiti kuwapanana mwenga shiboga pamuhera na mashi ga kuranda pamuweriti mwanja kulawa Misri. Badala yakuwi wampananiti lihengu Baalamu mwana wa Beori kulawa aku Petihori kulii Misopotamiya, kawapangiri. 5 Kumbiti Mtuwa Mlungu gwenu, kampikaniriti ndiri Baalamu, pangiru ayi igalambukiti kuwera matekeleru kwa wambuyi wetu toziya Mtuwa Mlungu gwenu kawafiriti. 6 Su mwenga nakamu mumakaliru genu namtenda shintu shoseri shakuwatanga Waamoni na Wamowabu wafanikiwi.

7 Namuwakalalira Waedomu, womberi ndo walongu wenu. Viraa namuwakalalira Wamisri, toziya mwenga mulikaliti muisi yawu gambira wahenga. 8 Wazukulu wa wantu kulawa Edomu na Misri, walii yawalikala pakati penu, hawalekeziwi kuguwira pamuhera na wantu wa Mtuwa Mlungu.

9 Pamgenda kulikomanga ngondu na kubawila malingu genu, muliloli weri namtenda shintu shoseri shashiwatenda muweri wahumba. 10 Handa muwamu mwenu kwana muntu yoseri kawera muhumba toziya ya kulawa ulenji pashiru, muntu ayu hakalawi kunja kumalingu na hakalikali aku kwanjira mandawira mpaka pamihi, hapeni kalikali pakwegera na liringu. 11 Kumbiti payisoka pamihi hakogi mashi na mshenji paguzyeta hakawezi kuwuya kuliringu lyakuyi.

12 Wanjagira waweri na pahala pa vyoo kunja kwawabawiliti malingu, kulii mewawezi kulibawira. 13 Mwenga hamuweri na ligembi, ali haliweri lya kubawira malindi na kukulilira mifi genu. 14 Mumalingu genu gaweri mananagala, toziya Mtuwa Mlungu kankutyanga mumalingu genu su kawalopoziyi na kuwatenda mwenga muwakomangi wangondu wenu. Namleka shoseri shidoda pakati penu Mtuwa Mlungu kashiwoni, pamleka shidoda shoseri Mtuwa Mlungu hakawaleki.

15 Mmanda pakatugira kwa gwenga, nagumwuziya kwa mtuwa gwakuwi. 16 Gumlekiziyi yomberi kalikali pakati pa mwenga mumji yakagusyaguliti, su namumgaziya.

17 Mwisraeli yoseri, mpalu na mdala, nakalekeziwa nakamu kuwera mndiyandiya pahala pa kuguwira. 18 Mpiya yoseri yaipatikaniti kwa vitendu vya undiyandiya, nayijeguwa Mnumba ya kumguwira Mlungu gwenu ama kulipira usali kulongolu kwa Mtuwa Mlungu. Mtuwa Mlungu kawakalalira woseri walii yawawera wandiyandiya.

19 Pagumuwanda mpiya ama shiboga ama shintu shoseri shilii mlongu gwaku Mwisraeli, nagumtola liba pakawuziya uwanda yagumpananiti. 20 Guweza kutola liba pagumupanana uwanda muhenga, kumbiti mlongu gwaku Mwisraeli nagutola liba, su Mtuwa Mlungu gwenu hakakutekeleri mumahengu gaku goseri gagugenda kutenda muisi ilii yagugenda kuitola kwa makakala.

21 Pagutula usali kwa Mtuwa Mlungu gwenu, nagukawa kuwusiya, toziya Mtuwa Mlungu gwenu hakaushongi kwa gwenga, su gwenga paguleka kuwusiya, haguweri na vidoda. 22 Kumbiti paguleka kutula usali hapeni guweri na vidoda. 23 Guloli weri kuwusiya usali yaguutuliti, toziya ulaa mweni guutuliti kulongolu kwa Mtuwa Mlungu gwenu.

24 Pagwingira mulirambu lya mizyabibu lya wapakwegera gwaku, gwenga guweza kuliya mazyabibu shyasi shagufira, kumbiti nagwapa na kutola zyabibu zoseri zilii mulijamanda lyaku. 25 Pagwingira mulirambu lya wapakwegera gwaku lyaliwera na viboga, gwenga guweza kupanyula mikuguwi na kuliya, kumbiti nagutola hengu na kuhenga viboga vyakuwi.