1 Mpindi ipikaniri visoweru vyaneni,

Gupikanili, gwee pasipanu, visoweru vyantakula.

2 Mafundu gangu na gatuluki handa mvula,

visoweru vyangu vituluki gambira mangami.

Handa manyeminyemi muvimeru vididika,

handa mvula ya folafola mumihamba miwisi.

3 Toziya hanilibweri litawu lya Mtuwa Mlungu,

na mwenga mlongi, Mlungu gwetu ndo mkulu.

4 Mtuwa Mlungu ndo litalawu lya uponeru,

mahengu gakuyi ndo makamilika,

njira zakuyi zoseri ndo za nakaka.

Yomberi ndo Mlungu mwaminika na kahera likosa,

yomberi katenda mirandu miheri na ya nakaka.

5 Kumbiti mwenga waminika ndiri kwa yomberi,

mwenga mwawana wakuyi ndiri kayi toziya ya ukontola,

mwenga mwashiyuku shikontola na shipotoka.

6 Muweza ashi kumlipa hangu Mtuwa Mlungu,

mwenga wantu wazigizigi na mwahera mahala?

Hashi, yomberi ndo tati gwenu ndiri yakawaumbiti,

Yakawatenditi na kuwagangamaziya?

7 Muliholi mashaka gapititi,

muliholi vinja vya viyiwuku wavuwa,

muwakosiyi watati wenu wawagambiri virii vyavilawiriti,

muwakosiyi wakulu wenu womberi hawawagambili.

8 Yakawera kumpindi nentu pakawapananiti maisi uhala wawu,

pakawabaguliti wantu woseri,

katuliti mbaka toziya ya maisi,

teratera na walanga ya wana wa Waisraeli 9 kumbiti Mlungu kalisyaguliriti wantu wa Yakobu kuwera uhala wakuyi.

10 Kawawoniti muisi ya shiwala,

ntundu hera zyaziwera na lipuga likulu.

Kawaloliti na kuwatula weri,

kawalolera handa shiloleru sha lisu lyakuyi.

11 Gambira kapungu ntambu yakawafunda wana wakuyi kuguluka

na kuyalika mpampantiru zakuyi su kuwakolera

na kuwapapa pampindi kwa mbapatiru zakuyi.

Ayi ndo ntambu Mtuwa kayitula Israeli kulawa kuguwa. 12 Mtuwa Mlungu mweni kawalongoziyiti wantu wakuyi

na paweriti ndiri na mlungu yumonga gwa kumtanga.

13 Kawapitiziyiti mupahala pampindi pa isi,

na womberi waliyiti viboga vya mumalambu.

Kawapananiti lwashi mumatalawu walawaliri

na lipaki kulawa litalawu likamala.

14 Kawapanananiti jibini na maweri ga wang'ombi na wambuzi,

waweriti na wakondolu na wambuzi wanenepa

vipinga vya mifugu ya Bashani na mbuzi.

Kawapananiti nganu iherepa nentu na divayi ya syayi walanditi.

15 Wantu wa Israeli wakuliti kuwera walunda, kumbiti waweriti mtiti,

wanenepiti, wawera na mitima mikulu,

shakapanu wamlekiti Mlungu yakawanyawiti

wamzalawu Litalawu lya ulopuziya wawu.

16 Wamtenditi Mlungu kaweri na weya na maya makulu kwa kuwaguwira wamlungu wamonga

na kumkwankanira kakalali kwa mirandu yawu ya kukalaziya

17 Wawatambikiriti washamshera yawaweriti ndiri Mlungu,

wawagenderiti wamlungu walii yawaimaniti ndiri nakamu,

wamlungu wa syayi yawalawiriti mashaka ga pakwegera,

wazewi wawu wayipananiti ndiri ligoya nakamu.

18 Walyaluyiti Litalawu yakawawumbiti,

wamlyaluwiti Mlungu yakawiwuliti.

19 Mtuwa Mlungu pakaguwoniti mlandu agu kawalekiti,

toziya wamkalaziya wana wakuyi, wapalu na wadala. 20 Mtuwa Mlungu kalongiti, hapeni niwatangi mwenga,

shakapanu moni upeleru wawu hawuweri hashi!

Toziya womberi ndo shiyiwuku shipotuwa,

wana yawahera waminika woseri ulii.

21 Pamuhera na vinyagu vyawu, womberi wantenda nkalali nentu,

neni weri na weya kwa shintu shawashishemiti wamlungu,

wamlungu walii yawawera ndiri wamlungu nakaka.

Su neni hanuwatendi wawoni weya kwa shashiwera ndiri wantu, haniwakalaziyi kwa kuyitendera isi ya wazigizigi.

22 Maya gangu gaka gambira motu,

galunguziya nakamu kila shintu pasipanu,

hayilunguziyi mpaka kulilindi litali,

hayilunguziyi miyanjiru ya migongu.

23 Hanjegi madoda gavuwa kwa womberi,

haniwagumi na misali yangu yoseri.

24 Hawondi kwa njala,

hawalaguwi kwa nshimba kupyupa kukulu.

Haniwajegi wankanyama yawawera na malinu gakalipa wawakangali

na njoka yawawera na usungu wawalumangi.

25 Nkondu ijega kuhowa kuvuwa

na mnumba lyoga likolamlima,

wantemba wapalu na wadala hawalaguwi

ata yawakonka na wazewi wana nvilisa.

26 Nongiti, haniwagamiziyi womberi nakamu,

su wantu nawawahola kayi pasi panu.

27 Kumbiti hapeni niwalekeziyi wankondu wawu walitumbi

kuwera womberi wawakanka wantu wangu,

neni namweni ndo yaniwagamiziyiti,

na neni Mlungu wera ndiri mumirandu ayi

28 Israeli iwera isi yahera mahala,

wantu wakuyi wahera luhala mngati mwawu.

29 Handa mewaweri na luhala mewavimani iwera hashi wasinditi,

mewavimani upeleru wawu hauweri hashi.

30 Muntu yumu kaweza hashi kuwakanka wantu elufu yimu,

ama wantu wawili waweza hashi kuwakanka wantu elufu lilongu?

Ayi ndo toziya Litalawu lyawu liwasa.

Toziya Mtuwa kawaleka

31 Ata wankondu wawu wavimana kuwera,

litalawu lyawu lyahera likakala handa litalawu lyetu.

32 Wankondu wawu handa mizyabibu yaiyalitwi Sodom na Gomora,

zyabibu zakuyi ndo zyabibu zyaziwera na usungu na zikalipa,

33 Divayi yawu iwera gambira usungu wa njoka,

34 Mtuwa Mlungu kalonga, nilihola kuwera shilii shaniwatendiriti wankondu wawu,

su nankuhepera shaka shifaa sha kuwakomanga womberi.

35 Mbuziliru ndo ya neni,

neni hambuziliri

shaka magulu gawu pagatyerebuka,

toziya lishaka lyawu lya kwagamira lisoka,

upeleru wawu wapakwegera nentu.

36 Mtuwa Mlungu kawateteya wantu wakuyi tembera wana likosa

na kuwawonera lusungu wantumintumi wakuyi,

shaka pakawona makakala gawu gapera

kwahera yakasigaliti mtatiluwa ama muntu mlekeru.

37 Shakapanu Mtuwa Mlungu hakawakosiyi wantu wakuyi,

Wakoshi wamlungu wamonga yamlitumbiriti?

38 Wakoshi wamlungu yawaliyiti malaviwu genu

na divayi na tambiku zyenu za kulanda?

Su wimuki wawatangi,

mleki wamlungu ayi iweri walolera wenu!

39 Mloli kuwera neni namweni ndo Mlungu

kwahera gwingi kumbiti neni hera.

Neni ndaga na kutula ukomu,

ntenda na kulopoziya

na kwahera muntu yakaweza kundewelera.

40 Nyasula liwoku lyangu kumpindi na kulilapa toziya neni na Mlungu yanilikala mashaka goseri,

41 handa pamumona nankukuwa ligumba lyangu lyaling'eleng'eta,

na kutalipisiya liwoku kutoza,

haniwawuziliri wankondu wangu,

haniwakomangi walii yawankalalira.

42 Misali yangu hayisumiziyi mwazi gwa wankondu,

ligumba lyangu haliwalagi woseri yawampingira neni.

Hapeni nimleki ata yumu yakalikomanga na neni,

ata yawatenduwa pamuhera pa walii watatilwa na wanamakakala hawahowi.

43 Mnemeleri, mwe maisi pamuhera na wantu wakuyi,

kwakuyi hakawuzilili kwa mwazi wa wantumintumi wakuyi.

Hakawuziliri wankondu wakuyi

na kutenda ukoluniziya kwa isi na wantu wakuyi.

44 Musa pamuhera na Yoshuwa mwana gwa Nuni, wimbiti lwimbu alu, su Waisraeli woseri walupikiniri.

45 Musa pakamaliliti kuwafunda wantu wa Israeli mafundu goseri aga. 46 "Kawagambiriti, namlyaluwa mafundu goseri ganuwafunditi leru. Muwafundi kayi wana wenu, su womberi wagafati na waweri waminika kugajimira mafundu goseri ga Mtuwa Mlungu. 47 Toziya mafundu aga hera ndiri kumbiti ndo ukomu wenu, kwa mafundu aga mwenga hamulikali makaliru gatangara muisi yamgenda kuikangara kumwambu mwa lushemba Yoridani."

48 Lishaka liraali, Mtuwa Mlungu Kamgambiriti Musa, 49 gukweni mumfatanu gwa lugongu alu lwa Abarimu mulugongu lya Nebo, muisi ya Mowabu, pakwegera na mji gwa Yeriku, gwakailoli isi ya Kanaani yang'enda kuwapanana Waisraeli wahali. 50 Shakapanu haguhowi kulaaku kulugongu na haguweri na wambuyi waku gambira kaka gwaku Aruni ntambu yakahowiti mulugongu Hori na kuwera pamuhera na wambuyi wakuyi, 51 toziya mwawoseri wawili mlekiti kuwera waminika kwaneni pamuweriti kulongolu kwa Waisraeli mwenga pamuweriti kumashi ga Meriba, pakwegera na mji gwa Kadeshi, mushiwala sha Sini, na toziya muupanana ndiri ligoya unanagala wangu muwamu mwa Waisraeli. 52 Su haguyiwoni isi ilii kwa kutali, kumbiti hapeni gwingili muisi ilii yang'enda kuwapanana Waisraeli.