1 Ayi ndo tekelela yeni Musa, muntu gwa Mlungu, kawatekeliti Waisraeli pamberi pa kuhowa kwakuyi.

2 Kalongiti,

"Mtuwa Mlungu kiziti kulawa lugongu Sinayi,

katulawiriti kulawa lugongu Seyiri,

kayilangaliriti kulawa lugongu Parani."

Kalawiriti pakati pa maelufu ga wantumintumi wa kumpindi,

na motu gwaguwakiti muliwoku lyakuyi lya kumliwu.

3 Nakaka Mtuwa Mlungu kawafiriti wantu wakuyi

na kawaloleraga wananagala wakuyi woseri.

Su wananagala wakuyi wazigendiriti njira zakuyi

na kugajimira malagiru gakuyi.

4 Musa katugambiriti tuyijimiri lagiru,

maisi getu ndo luhanja lwa luhala.

5 Mtuwa Mlungu kawera mfalumi kwa Israeli,

shaka wakulu wawu pawaliwoniti,

na makabila goseri pagajojonikiti.

6 Musa kalongiti kwa likabila lya Rubeni.

Rubeni kalikali, nakahowa

na wantu wakuyi nawawera wadidika.

7 "Kwa likabila lya Yuda Musa kalongiti,

gwee Mtuwa Mlungu gupikanili kulira kwa likabila lya Yuda pawaluwa utanga,

gumwuziyi kayi kwa wantu walii wamonga.

Gulikomangili kwa mawoku gaku kwajili yakuyi,

gulitangi likabila vya Yuda kwajili ya wankondu wakuyi."

8 "Toziya ya Lawi, Musa kalongiti.

Tumimu yaku na Urimu waku gumpananiti,

muntu uliya yakaweriti mwaminika kwa gwenga.

Gumjeriti aku Masa

na kusindana na yomberi kumashi ga Meriba."

9 Kawagambiliti watati wakuyi na wamawu wakuyi

Walawi wamuwiti kuwaleka wazewi wawu,

wawalyaluwiti walongu wawu,

wawamana ndiri ata wana wawu,

toziya watenditi malagaliru gaku,

na kugajimira mapatanu gaku.

10 Na wawafundi wiwuka wa Yakobu malagalira gaku

na wawafundi wantu wa Israeli lagiru gaku.

Walawi watumiziyi ubani kulongolu kwaku,

na hawalaviyi tambiku ya kulunguziya nakamu pashitalawanda shaku sha kutambikira.

11 Gwee Mtuwa gugatekeleri makakala gawu,

gugajimili mahengu ga mawoku gawu,

guwagamiziyi nakamu wankondu wawu,

nakuwaleka wagoloki kayi.

12 Kwa likabila lya Benjamini, kalongiti.

"Ali ndo likabila lyakalifira na kulilolera Mtuwa,

na kulilolera paluwala poseri,

womberi walikala pasi pa ulolera wakuyi.

Hakalikali mumawoku gakuyi na kumlolela.

13 Kwa likabila lya Yusufu kalongiti,

Mtuwa kayitekeleri isi yakuyi kwa

manyeminyemi kulawa kumpindi

na kawatekeleri kwa mashi kulawa pasipanu."

14 Isi yawu itekelerwi kwa mshenji yagutenda mabwajubwaju gawuli,

kwa ulunda wa mabwajubwaju gaherepa kila shipindi,

15 kwa mabenu gaherepa ga migongu migona

na mabenu gavuwa ga migongu migona.

16 Isi yawu imemi goseri yagawera maheri,

itekererwi kwa uheri wa Mtuwa Mlungu,

ulii yakalawiriti mushiputira shashilungula.

Matekeleru aga gawizili wantu wa likabila lya Yosefu,

toziya yomberi kaweriti mkulu muwamu mwa walongu wakuwi.

17 Yosefu kaweriti na makakala handa ng'ombi shipalu,

magoli gakuyi handa ganyati.

Na kwa magoli aga hakagakomi maisi,

ata yagawera upeleru wa pasipanu,

hangu ndo ntambu yaviwela vipinga elufu lilongu vya Efulaimu,

hangu ndo ntambu yagawera maelufu ga Manasi.

18 "Kwa likabila lya Zabuloni na Isakari kalongiti,

Zabuloni mfanikiwi mumahengu genu ga kutenda biyashara mubahari,

na Isakari ulunda wenu wongereki mukaya zyenu."

19 Hawawashemeri wantu kumigongu yawu,

na aku wantu hawalaviyi tambiku zyazifiruwa.

Toziya womberi hawapati ulunda wawu kulawa kubahari

na hanja zawu mumuhanga gwa kumpwani.

20 "Kwa likabila lya Gadi kalongiti,

Kakwiswi Mlungu yakampananiti Gadi semu nkulu.

Gadi kanyatira gambira simba

yakapanyula liwoku ama shipalakasa sha mtuwi.

21 Womberi walisyaguliriti isi ina mbotu kwajili yawu,

pahala papatulitwi gweka kwajili ya wakulu.

Wakulu wa wantu pawajojonikiti,

womberi wagajimiriti malagaliru galii Mtuwa Mlungu gakawapananiti Waisraeli.

22 Kwa likabila lya Dani kalongiti,

Dani ndo mwana gwa simba

yakaguluka kulawa isi ya Bashani.

23 Kwa likabila lya Nafutali kalongiti,

gwee Nafutali,

yamumemiti matekeleru ga Mtuwa,

isi yenu yakusika kulitanda Galilaya.

24 Kwa likabila lya Asheri kalongiti,

Asheri katekelerwi kuliku wana wa Yakobu.

Na gupananwi upendelewu pamuhera na walongu waku woseri,

na isi yaku iweri na ulunda wa lipaki lya mitera ya mizyetuni.

25 Miji yenu ilolerwi kwa magomi makulu ga shuma na shaba,

na mashaka goseri gulikali kwa uponeru.

26 Musa kamaliriti kwa kulonga,

Mwee wantu Israeli, kwahera mlungu gambira Mlungu gwaku,

yomberi kapita kulyera kwiza kukutanga,

na yomberi kakwiza kulawa kumahundi muukwisa wakuyi.

27 Mlungu gwa mashaka goseri ndo utugira wenu,

makakala gakuyi gawoneka pasipanu mashaka goseri.

Kawawingiti wankondu kulongolu kwenu,

na kawalagaliriti muwagamiziyi woseri.

28 Su wantu Waisraeli hawalikali kwa ponga,

shiyiwuku sha Yakobu gweka yawu,

muisi yaimemiti viboga nduu pamuhera na divayi,

isi ilii lyera lyakuyi litulusiya mangami.

29 Mtekelerwa mwenga Waisraeli.

Gaa yakawera gambira mwenga,

wantu yamlopoziyituwiti na Mtuwa Mlungu?

Mweni ndo mlolera na utanga wenu,

na ligumba lyaliwajegera ukanka!

Wankondu wenu hawizi pawananaga kulongolu kwenu,

na mwenga hamuwatimbangi."