1 Pakalawira mbuyi gwa Mlungu ama mtakulila ndotu pakati penu, kawalagalira na kuwapanana malangaliru ama makangashu, 2 malangiliru ama makangashu pagalawira, shakapanu pakalonga, tuigenderi twakaiguwiri milungu yamonga, milungu yamuimaniti ndiri kwanja, 3 mwenga namuvipikanira visoweru vyawu. Toziya Mtuwa Mlungu gwenu kafira kawoni handa mwenga mumfira nakaka kwa moyu gwenu goseri na kwa rohu yenu yoseri. 4 Mumfati na kumgohelera Mtuwa Mlungu gwenu gweka yakuwi na kugajimira malagaliru gakuyi na kupikanira liziwu lyakuyi, mumtenderi na kulikolerana nayu. 5 Kumbiti mbuyi gwa Mlungu ayu ama yakatakulira ndotu, ulii yakawapotuziya mwenga munjira yakawalagaliriti Mtuwa Mlungu gwenu muigenderi, muntu ayu hakalagwi. Toziya katakuliti makontola kuusu Mtuwa Mlungu gwenu yakawalaviyiti muisi ya Misri pamuweriti muumanda. Su kwa ntambu ayi ndo hamuwusiyi ukondola pakati penu.

6 Payiwera mlongu gwaku gwa kwiwuka ama mwana gwaku mpalu ama muhinga gwaku, ama mdala gwaku yagumfira nentu ama ganja gwaku gwa kulitemana, pakakuzyangazyanga kwa bada pakalonga, Tugendi twakawaguwiri wamilungu wamonga, walii gwenga ama wambuyi wenu wawamaniti ndiri. 7 Wamu wawu hawakuzyangizyangi guwaguwiri wamilungu ya wantu yawalikala pakwegera na mwenga, ama milungu ya wantu yawalikala kutali na gwenga. 8 Nagumjimira kakuzyangizyangi ama kumpikanira ama kumwonera lusungu ama kufifa kwa virii vyakatenda. 9 Su gumlagi muntu ayu! Gwenga haguweri gwa kwanja kumlaga kwa kumgumanga kwa mabuwi, shakapanu wantu wamonga woseri hawafati. 10 Gumgumangi mabuwi mpaka kahowi! Toziya kajeriti kukutenda guleki kumguwira Mtuwa Mlungu gwenu yakawalaviyiti muumanda muisi ya Misri. 11 Su Waisraeli woseri pawapikanira aga, hawatiri, hapeni kuweri na muntu hakatendi ukondola gambira awu.

12 Pamulikala mumiji ilii Mtuwa Mlungu gwenu yakagenda kuwapanana, mwenga memuwezi kupikanira 13 kuwera wantu wamu yawahera mahala pakati penu wankuwalongoziya wantu wawu mumiji yawu, pawalonga, tugendi twakawaguwiri wamilungu wamonga, wamilungu walii yamuimaniti ndiri kwanja. 14 Kwa shitwatira ashi, mwenga hamloliloli kwa bada, handa shitwatira ashi shanakaka na sha kukalalira shitendeka pakati penu, 15 mwenga hamuwalagi wantu woseri mumji gulii. Hamuwalagi nakamu mifugu yawu na muilunguziyi nakamu miji yawu. 16 Shakapanu mjojoniri vintu vyoseri vya wantu yawalikaliti aku na muvilunguziyi kwa motu muluwaga lwa mji gambira tambiku ya kulunguziya nakamu kulongolu kwa Mlungu. Mji agu hausigali lupahera na hapeni gunyawiwi kayi. 17 Namtolamumtenderishiweri shaku, shintu shilii Mtuwa Mlungu kalongiti shyagamiziwi, toziya mwenga pamtenda shilii shantakula, su yomberi hakaleki kuwera na maya kuusu mwenga na hakawawoneri lusungu na kuwatenda mwongereki nentu ntambu yakawalagiliti wambuyi wetu. 18 Mtuwa Mlungu gwenu hakaweri na lusungu handa mwenga pamjimira malagaliru gakuyi goseri ganuwapanana leru na kutenda galii gagamfiriziya.