1 Shakapanu tugalambukiti na kugenda mwanja kushiwala kulola uwega wa ku Bahari ya Shamu gambira Mtuwa Mlungu ntambu yakatugambiriti, twenga tuyeritiyeriti pakwegera na lugongu Seiri kwa shaka shitangala.

2 Su Mtuwa Mlungu kang'ambiriti, 3 Mwenga muyerayera muisi ayi ya lugongu kwa shaka shitangara, vinu mgalambuki kugenda kushana. 4 Guwagambiri wantu malagizu aga. Mwapakwegera kupita muisi ya vigongu ya Seiri, isi ya walongu wenu shiyuwuku sha Esawu. Womberi hawawatiri, pamuhera na hangu muliloli weri namuwakomanga. 5 Namuwagaziya womberi toziya hapeni niwapanani semu muisi yawu. Hapeni niwapanani ata pahala padidini pa kutimbanga ligulu. Isi ayi ya vigongu ya Seiri nuwapananiti shiyuwuku sha Esawu iweri yawu. 6 Mwenga muhemeri shiboga kulawa kwawu pamuhera na mashi ga kuranda.

7 Toziya Mtuwa Mlungu gwenu, kakutekelera mukila shintu shagutenditi. Kawalolera weri pamuyeritiyerit mushiwala ashi shikulu. Kaweriti pamuhera na mwenga muvinja ayi malongu msheshi na muweriti na kila shintu shamfiriti.

8 Su twenga twendereyiti na mwanja, tupititi muisi ya walongu wetu shiyuwuku sha Esawu yawalikaliti Seiri, tuilekiti njira yaigenda Araba, njira yailawiti Elati na Ezioni Geberi. Tugalambukiti kugenda njira yaigenda uwega wa kushiwala sha Mowabu. 9 Mtuwa Mlungu kang'ambiriti, naguwagaziya wantu wa Mowabu, ama nagulikomanga ngondu nawu toziya hapeni niwapanani semu yoseri muisi yawu. Muisi ya Ari nuwapananiti womberi wa shiyuwuku sha Lutu iweri yawu.

10 Pamakashu wantu yawaweriti na makakala na watalipa ng'anji gambira Waanaki walikaliti muisi ya Ari. 11 Gambira Waanaki ntambu yawawera, wantu awa wamanikaniti kuwera Warefai, kumbiti Wamowabu wawashemiti Waemi. 12 Kwanja Wahori walikaliti Seiri, kumbiti shiyuwuku sha Esawu shiwawingiti na kuwagamiziya. Shakapanu shiyuwuku sha Esawu shilikaliti muisi ilii. Waisraeli watenditi ntambu iraa ilii kuwawinga wantu wa Kanaani, Mtuwa Mlungu pakawapananiti iweri isi yawu.

13 Musa kendereyiti kutakula, Shakapanu Mtuwa Mlungu katugambiriti, Muwuki vinu, mloki lushemba Zeredi. Su twenga tulokiti lushemba Zeredi. 14 Gapititi mivinja malongu matatu na nani kwanjira tulawiti Kadeshi Barineya mpaka kuloka lushemba lwa Zeredi. Shaka shilii shiyuwuku sha wapalu yawawera na umuli gwa kugenda kulikomanga ngondu wagamiziwituwiti gambira Mtuwa Mlungu ntambu yakalirapiriti kuwera mewagamiziwi. 15 Mtuwa Mlungu kendereyiti kuwazibu na kuwalaga womberi mpaka pawahowiti woseri.

16 Su wantu wa shileri shilii pawahowiti kala, 17 Mtuwa Mlungu kang'ambiriti, 18 leru hamloki mumbaka wa Wamowabu kwa kupitira isi ya Ari. 19 Mwenga pamwingira muisi ya Waamoni, shiyuwuku sha Lutu, namuwagaziya ama kulikomanga ngondu nawu, hapeni niwapanani semu muisi yawu toziya niwapanani isi iweri uhala wawu.

20 Isi ayi imanikana viraa handa isi ya Warefayi. Pamakashu Warefayi walikaliti amu, Waamoni wawashemiti womberi Wazamzumi. 21 Wazamzumi waweriti wantu wavuwa na yawawera na makakala na watalipa nentu gambira Waanaki. Kumbiti Mtuwa Mlungu kawagamiziyiti, su Waamori waweziti kulikala muisi yawu. 22 Mtuwa Mlungu katenditi ntambu yakawatendiriti Waedomu shiyuwuku sha Esawu, shilii shalikaliti Seiri. Kawagamiziyiti Wahori shaka Waedomu pawasokiti kulii na waitoliti isi yawu na wanjiti kulikala kulii. Shiyuwuku sha Esawu shankulikala kulii mpaka leru. 23 Shintu shilaa shilii shilawiriti kwa Waavi, walii yawalikaliti mushisiwa shashiwera mumbwega mwa bahari ya Meditereniya uwega wa kusika wa Gaza. Wantu yawalawiti mushisiwa sha Kireti yawashemituwiti Wakafitori, wawagamiziyiti Waavi na kulikala muisi ilii badala yawu.

24 Musa kendereyiti kulonga, shakapanu Mtuwa Mlungu kalongiti, vinu mwanji mwanja! Mloki lularanda lwa Arinoni. Neni hanuwatangi kumkanka Sihoni mfalumi gwa Waamori wa aku Heshiboni na neni haniwapanani mwenga isi yakuwi. Mwakamkangali mfalumi ayu na kuitola kwa makakala isi yakuwi. 25 Kwanjira leru hanyanji kuwatenda wantu kila pahala wawatiri mwenga. Womberi pawavipikanira visoweru vyenu, su hawashashatiki kwa lyoga.

26 Musa kawagambiriti Waisraeli, shakapanu neni ntumiti wajumbi kulawa kushiwala Kedemoti wagendi kwa mfalumi Sihoni gwa aku Heshiboni pawawera na visoweru avi vya ponga wakamgambiri, 27 gutulekeziyi kupiti muisi yaku, hatupiti munjira nkulu pota na kugalambuka kumliwu ama kumshigi. 28 Gutushuwuziri shiboga pamuhera na mashi ga kuranda. Twenga shatuluwa gutulekeziyi kupita muisi yaku, 29 tuloki lushemba Yoridani na kwingira muisi ilii Mtuwa Mlungu gwenu yakagenda kutupanana. Shiyuwuku sha Esawu shashilikala Seiri na shiyuwuku sha Mowabu shashilikala Ari, womberi watulekeziyiti viraa kupita muisi zawu.

30 Kumbiti mfalumi Sihoni gwa aku Heshiboni katulekeziyiti ndiri tupiti muisi yakuwi, toziya Mtuwa Mlungu kamtenditi mfalumi pamuhera na wantu wakuwi waweri na mtiti na moyu gukamala, su tuwakanki na kutola isi yawu ilii yatuikolamlima mpaka vinu.

31 Sakapanu Mtuwa Mlungu kang'ambiriti, guloli, nanja kumtenda mfalumi Sihoni pamuhera na isi yakuwi mumkanki. Mwanji kuitola kwa makakala isi yakuwi na kulikala. 32 Su mfalumi Sihoni pamuhera na shonta lyakuyi pakatwiziriti kulikomanga ngondu na twenga mumji gwa Jahazi, 33 Mtuwa Mlungu gwenu, katupananiti uwezu wa kuwakanka womberi, su twenga tumlagiti Sihoni na wana wakuwi pamuhera na wantu wakuwi woseri. 34 Twenga tuikangaliti miji yakuwi yoseri na kuyagamiziya nakamu yoseri, tuwalagiti wapalu na wadala pamuhera na wana, tumlekiti ndiri muntu yoseri kalikali. 35 Tutoliti vintu vyaviweriti mumiji ilii yatuikangaliti, viraa tutoliti na mifugu yawu. 36 Kulawa Aroeri mji yaguwera mumbega mwa lularanda lwa Arinoni na mji yauwera muliranda ali mpaka Gileyadi, kuweriti ndiri na mji yaguweriti vibambaza vitalipa na makakala kwa twenga kutukanka. Mtuwa Mlungu katutenditi twenga tuikanki miji yoseri. 37 Kumbiti tusegeriti ndiri isi ya Waamoni na mumbwega mwa lushemba Yaboki na mumiji ya isi ya vigongu na semu yoseri ilii Mtuwa Mlungu gwenu yakatuleweriti kugenda.