1 Mwenga pamgenda mungondu kulikomanga na wangondu wenu, pamuwawona farasi na mbutuka za kukweguwa na farasi na lishonta likulu kuliku shonta lyenu, mwenga namtira. Toziya Mtuwa Mlungu gwenu yakawalaviyiti kulawa Misri hakaweri pamuhera na mwenga. 2 Pamberi pa kwanja kulikomanga ngondu, mtambika hakizi kulongolu na kuligambira shonta, 3 wapalu wa Israeli mpikaniri! Leru mwenga mwankugenda kulikomanga ngondu. Namuwatira wangondu wenu, viraa namfuwa moyu ama kushashatika kulongolu kwawu. 4 Toziya Mtuwa Mlungu gwenu hakagendi pamuhera na mwenga kulikomanga ngondu na wangondu wenu, su kwajili yenu Mtuwa Mlungu hakawapanani mwenga ukanka.

5 Shakapanu wakulu wa shonta hawavigambiri vipinga vya shonta, handa kwana muntu yoseri kanyawa numba ya syayi na kaityeka ndiri, su kawuyi ukaya nakahowa mungondu na muntu yumonga kayityekuwi numba yaku. 6 Kwana muntu yoseri yakayaliti mizyabibu na kaliyiti ndiri mabwajubwaju gakuyi ga kwanja kulera? Handa kwanayu, su kawuyi ukaya nakahowa mungondu na muntu yumonga hakabenangi mabwajubwaju gakuyi na kunemelera divayi yakuwi. 7 Hashi kwana muntu yoseri yakamuhetiti mdala kumbiti kamuyuga ndiri? Handa kapanu, su kawuyi ukaya nakiza kuhowa mungondu, nakiza mpalu yumonga kumuyuga muheta gwaku.

8 Shakapanu wakulu awa wa shonta hawendereyi kuwakosiya wantu, hashi, kwana muntu panu yakafuwiti moyu? Handa kwanayu, su kawuyi ukaya nakiza kuwatenda wayaguwi wafuwi moyu viraa gambira mweni ntambu yakafuwiti moyu. 9 Wakulu wa shonta pawatakula kala na mashonta yawu, su womberi hawawasyaguli wakulu wa vipinga vya shonta hawawalongoziyi wantu.

10 Mwenga pamsoka pakwegera na mji kuukangira, mwenga muwakosiyi wenikaya wa mji gulii handa pawawera kala kujisalimisha. 11 Handa wenikaya wa mji gulii pawafira ponga na kujisalimisha kwa mwenga, su wantu woseri yawawera kulii hawawatenderi mwenga na kutenda mahengu kwa kulazimishwa. 12 Kumbiti wenikaya wa mji gulii pawafira ndiri ponga kwa mwenga, pawasyagula kulikomanga ngondu na mwenga, su mwenga hamuuzyengeti mji gulii. 13 Shakapanu Mtuwa Mlungu gwenu pakawatenda mwenga muukangiri mji gulii, mwenga hamuwalagi kwa ligumba wapalu woseri, 14 kumbiti wadala woseri pamuhera na wananguta na wang'ombi na vyoseri vyaviweramu mumji. Mwenga hamtoli mifugu pamuhera na vintu vyoseri vyaviwera vya wangondu wenu, virii Mtuwa Mlungu vyakawapanani mwenga. 15 Hangu ndo ntambu yamgenda kuitendera miji yoseri yaiwera patali na isi yamgenda kulikala.

16 Kumbiti mwenga pamuikangira miji ilii muisi Mtuwa Mlungu yakagenda kuwapanana, mwagamiziyi kila shintu shashilikala. 17 Mwenga muwagamiziyi wantu woseri: Wahiti na Waamori na Wakanaani na Waperizi na Wahivi na Wayebusi gambira Mtuwa Mlungu gwenu ntambu yakawalagaliriti. 18 Handa mwenga pamuwalaga ndiri, womberi hawawafundi mafundu ga vitiba vya ukondola kwa kuwaguwira wamilungu wawu na kuwatenda mwenga mtendi vidoda kulongolu kwa Mtuwa Mlungu gwenu.

19 Pamuuzyengeta mji kwa shaka shitangara pamulikomanga ngondu, mwenga namuyidumula mitera ya mabwajubwaju. Mwenga mlekeziwa kuliya mabwajubwaju gakuyi kulawa mumitera ayi, kumbiti namuyiharabisiya mitera ayi toziya mitera ayi iwera ndiri wangondu wenu. 20 Mwenga mlekeziwa kuidumula mitera yamonga na mbawu zyakuwi muweza kunyawa vintu pamuhera na mikweneru kuwatenda mwenga muwezi kukwena muvibambaza kuukangira mji.