1 Musa kendereyiti kuyowera na Waisraeli woseri, 2 kawagambiriti, vinu neni wera na vinja miya na ishilini, weza ndiri kuwalongoziya mwenga. Mtuwa Mlungu kang'ambiriti kuwera hapeni ndoki lushemba Yoridani. 3 Mtuwa Mlungu gwenu, hakawalongoleri na kuwagamiziya wantu woseri yawalikala muisi za aku, su mwenga muhali isi yawu. Yoshuwa hakaweri mlongoziya gwenu handa Mtuwa Mlungu ntambu yakanagaliriti kala. 4 Mtuwa hakawagamiziyi walii ntambu yakawagamiziyiti Sihoni na Ogu wafalumi wa Waamori na wantu wawu. 5 Mtuwa Mlungu hakawatendi mwenga muwakanki wantu wa isi zilii, hamuwatendi ntambu yaniwalagaliliti 6 Muweri wagagamala na makakala, namuwatira womberi toziya Mtuwa Mlungu gwenu kankugenda pamuhera na mwenga. Mweni hakawatangi na hapeni kawaleki.

7 Shakapanu Musa kamshemiti Yoshuwa, kamgambiriti kulongolu kwa wantu woseri wa Israeli, gugangamali na moyu mkulu, toziya gwenga haguwalongoziyi wantu awa kugenda kuitola kwa makakala isi ilii Mtuwa Mlungu yakawalagiliti wambuyi wetu. 8 Mtuwa Mlungu mweni hakawalongoziyi na kuwera pamuhera na mwenga, mweni hakawatangi na hapeni kawaleki.

9 Su Musa kagalembiti malagaliru aga mushitabu na kuwapanana watambika wa lukolu lwa Lawi, walii yawaweriti na lihengu lya kupapa Lisanduku lya Lipatanu lya Mtuwa, pamuhera na wakulu woseri wa Israeli. 10 Shakapanu Musa kawalagaliriti, kila shinja sha saba hashiweri shinja sha kuwalekeziya wantu woseri uwanda, mushisomi shitabu ashi kwa liziwu likulu mumsambu gwa visasa. 11 Mushisomi shitabu ashi sha lagiru kwa wantu wa Israeli pawiza kumguwira Mtuwa Mlungu gwenu pahala palii pakapasyaguliti wamguwiri. 12 Muwajojoniri wantu woseri. Wapalu na wadala na wana na wahenga yawalikala mumiji yenu, su kila muntu kapikaniri visoweru avi kulifunda kumgohelera Mtuwa Mlungu gwenu na kulilola weri kujimira visoweru vya lagiru ali. 13 Kwa kutenda hangu, shiyiwuku shenu shilii hashenipikaniri malagaliru aga ga Mtuwa Mlungu gwenu su wapati kupikanira na kulifunda kumgohelera Mtuwa Mlungu gwenu, mushaka shoseri shamulikala muisi yamgenda kuitola kwa makakala kumwambu kwa lushemba Yoridani.

14 "Shakapanu Mtuwa Mlungu kamgambiriti Musa, lishaka lyaku lya kuhowa lyapakwegera. Gumshemi Yoshuwa, mwizi pamuhera Muliringu Linanagala numpanani malagaliru. Su Musa na Yoshuwa wagenditi Muliringu Linanagala," 15 Mtuwa Mlungu kawalawiriti womberi kulii mumpanda ya lihundi lyaligolokiti paligomi lya Liringi Linanagala.

16 "Mtuwa Mlungu kamgambiriti Musa, gwapakwegera kuhowa na paguhowa kala, wantu hawaleki kuwera waminika kwaneni na hawaleki kujimira lipatanu lyantenditi pamuhera nawa." 17 Pagalawira aga, neni haweri na maya nentu kwawu, haniwaleki kuwera pamuhera na womberi na hawagamiziwi. Ukontola uvuwa na ntabiku haziwiziri ata wavimani kuwera madoda aga gawapata toziya Mlungu gwawu kapamuhera nawu ndiri. 18 Nakaka hapeni niwatangi toziya watenda vitwatira vikontola na kwanja kuwaguwira wamlungu wamonga.

19 Vinu gulembi lwimbu alu, guwafundi wantu wa Israeli su haluweri ukapitawu wa neni kwa womberi. 20 Panuwajega muisi yaiwera na mbotu kulima na mahamba gaherepa ga waliziya mifugu, ntambu yanuwalagiliti wambuyi wawu kuwera haniwapanani, womberi hawaliyi na kwikuta na kunenepa. Kumbiti hawawagalambukili wamlungu wamonga na kuwaguwira. Su hawanemi neni na kulilema kulijimira Lipatanu lyangu lyantenditi nawa. 21 Madoda gavuwa na ntabiku hazilawiri kwa womberi. Pakulawira aga, viyiwuku vyawu haviliholi lwimbu alu na haluweri mkapitawu kwa weni hapeni walyaluwi. Ata vinu haneni wajegeli kwingira muisi ilii yanililagiliti kuwapanana, nigamana maholu gawalihola kutenda pawalikala kulii.

22 Su lishaka liraali Musa kalembiti lwimbu alu na kawafunditi wantu woseri wa Israeli kuluwimba.

23 "Shakapanu Mtuwa Mlungu kamalagaliriti Yoshuwa mwana gwa Nuni, gugangamali na guweri na moyu mkulu, toziya haguwalongoziyi Waisraeli kugenda muisi yanuwalagiliti kuwapanana, su neni haweri pamuhera na gwenga."

24 Musa pakamaliliti kulemba shitabu sha lagiru ali Mtuwa Mlungu gakamlagaliriti, 25 kawagambiriti Walawi yawaweriti na lihengu lya kupapa Lisandiku lya Lipatanu lya Mtuwa Mlungu, 26 Mtoli shitabu ashi sha lagaru na mushituli pakwegera na Lisandiku lya Lipatanu lya Mtuwa Mlungu gwenu, su shiweri ukapitawu kwa mwenga. 27 Nankutakula aga toziya nivimana kuwera wantu awa wawera na ubinta nentu. Paiwera wamlemiti Mtuwa Mlungu neni pawera mkomu, hayiweri hashi pahowa kala? 28 Muwajojoniri kulongolu kwaneni wazewi woseri pamuhera na wakulu woseri wa makabila genu, su kuwagambira visoweru vya lwimbu alu, kumpindi na pasipanu ziweri kapitawu kwa womberi. 29 Toziya nivimana kuwera pahowa kala nakaka mwenga hamuweri wakontola na hamgalambuki na kulema kutenda goseri ganuwalagaliriti mtendi. Na mushaka shashiza aku, Mtuwa hakawakalaliri nentu kulawirana na vitwatira vyenu vya ukontola.

30 Shakapanu Musa kalwimbiti lwimbu alu uganu waisraeli woseri pawapikanira.