1 "Musa kawashemiti pamuhera Waisraeli, su kawagambiriti, mwenga Waisraeli, mpikaniri malagaliru na malagizu galii gantakula leru kulongolu kwenu. Mulifundi aga na mugajimili." 2 Mtuwa Mlungu gwenu katuliti lipatanu pamuhera na twenga kuligongu Sinayi. 3 Katuliti ndiri hera lipatanu ali na wambuyi wetu, kumbiti kalituliti ali viraa kwa twenga yatulikala leru. 4 Mwenga mumpikaniriti Mtuwa Mlungu, pakayoweriti na mwenga kulii kulugongu pakati pa motu. 5 Shaka shilii neni weriti mjumbi pakati penu na Mtuwa Mlungu, kuwagambira shilii shakatakuliti Mlungu, toziya mwenga mgutiriti motu gulii na mkweniti ndiri kugenda kulugongu.

Mtuwa Mlungu kalongiti hangu, 6 neni ndo Mtuwa Mlungu gwaku yanukulaviyiti kulawa muisi ya Misri, kulii guweriti mmanda.

7 Nagumguwira Mlungu yumonga, kumbiti gunguwiri neni hera.

8 Nagulisongoluwa gamweni shinyagu shoseri shashilanguziya kuwera mlungu, ama mfanu gwa shintu shoseri shashiwera kumpindi ama shashiwera pasipanu, ama shashiwera mumashi pasi pa pasipanu. 9 Nagushisuntamalira shinyagu shoseri ama kuvitedera, toziya neni Mtuwa Mlungu gwaku, nfira gunguwiri neni gweka yangu. Nankuwazibu wana kwa vidoda vya watati wawu wa shileri sha tatu na shileri sha msheshi sha walii yawanemiti. 10 Kumbiti nankulanguziya ufiru gwangu kwa maelufu ga vileri kwa walii yawanfira neni na kugajimira malagalliru gangu.

11 Nagulitendera litawu lyangu kwa lengu lya ukondola, toziya neni Mtuwa Mlungu gwaku hanuwazibu woseri walii yawalitendera litawu lyangu kwa ntambu ya ukondola.

12 Nagulyaluwa kuwera lishaka lya Kwoyera. Gulityeki lishaka ali kuwera linanagala ntambu yanuwalagaliriti mwenga. 13 Mumashaka sita gutendi mahengu na kuvitenda vitwatira vyaku vyoseri, 14 kumbiti lishaka lya saba mukila lijuwa haliweri lishaka lya Kwoyera, lishaka ali lituluwa kwajili ya neni Mtuwa Mlungu gwenu. Mulishaka ali nagutenda lihengu lyoseri gwenga ama mwana mpalu gwaku ama muhinga gwaku ama ntumintumi gwaku mpalu ama mdala nawatenda mahengu. Nagumtenda kwa makakala mfugu gwaku katendi mahengu, viraa nagumgambira muhenga yakalikala muisi yaku katendi mahengu. Guwalekeziyi wamanda waku kwoyera mulishaka ali ntambu yamtenda mwenga. 15 Nagulyaluwa kuwera gwenga guweriti mmanda paguweriti muisi Misri, neni Mtuwa Mlungu gwaku nukulaviyiti kulawa kulii kwa makakala gangu makulu nentu. Kwa toziya ayi neni Mtuwa Mlungu gwaku nukulagalira kwoyera mulishaka lya saba mukila lijuwa.

16 Gumgohelili tati gwaku pamuhera na mawu gwaku, gambira neni Mtuwa Mlungu gwaku ntambu yanukulagaliriti, gugajimili aga su hagulikali mashaka gatangala na kuwera na mota muisi ilii yang'enda kukupanana.

17 "Nagulaga,"

18 "Naguhumba,"

19 "Nagwiwa,"

20 "Nagulaviya ukapitawu wa upayira kuusu muntu yoseri."

21 "Naguwera na mata kwa mdala gwa wapakwegera gwaku, viraa naguwera na mata kwa shoseri shilii shashiwera mnumba ya wapakwegera gwaku, ama mulirambu lyakuyi ama mmanda gwakuwi mpalu ama mdala, ama ng'ombi gwakuwi ama punda gwakuwi ama shintu shoseri shilii shakawera nashi wapakwegera gwaku.

22 Aga ndo malagaliru galii Mtuwa Mlungu gakawalagaliriti wambuyi wetu. Womberi pawajojonikiti paluseleru lwa lugongu, Mlungu kayoweriti kwa liziwu likulu kulawa pakati pa motu, mulihundi lititi na ntiti totoru lyaligubikiti lugongu. Kawagambiriti malagaliru aga hera pota kwongera gingi, shakapanu kagalembiti muvibawu viwili vya mabuwi gasongoluwiti, su kanupiti.

23 Wazewi wetu pawapikaniriti liziwu lya Mtuwa Mlungu kulawa pakati pa ntiti ilii palugongu lwaluweriti lyankuyaka motu, wakulu woseri wa makabila getu pamuhera na wazewi waniziriti neni. 24 Womberi walongiti, Mtuwa Mlungu gwenu, katugubutulila ulangala na ukulu wakuwi, tupikanira liziwu lyakuyi kulawa pakati pa motu gulii. Leru tuyambula kuwera iwezekana kwa twenga wantu kwendeleya kulikala ata Mlungu pakayowera na twenga. 25 Kumbiti twenga tutira na hatuhowi handa patupikanira Mtuwa Mlungu pakayowera kayi na twenga, motu gwakuwi yagutiliziya hagutulagi. 26 Hashi, kwana muntu yoseri yakaweziti kumpikanira Mlungu yakawera na makakala goseri pakayowera kulawa pakati pa motu ntambu yatumpikaniriti twenga shakapanu kendereyi kulikala? 27 Su gwenga Musa gukweni kugenda kuligongu na gupikanili kila shintu Mtuwa Mlungu shakagenda kutakula. Shakapanu gwizi kutugambira kila shintu shakalongiti, su twenga hatupikaniri shilii shakataluliti na hatujimili na kushitenda."

28 "Mtuwa Mlungu kawapikaniriti pamung'ambiriti na kang'ambiriti, mpikanira virii wantu vyawakugambiriti ndo vya nakaka. 29 Womberi mewaliholi kuwera na maholu aga ga kungohela na kugajimila malagaliru gangu mashaka goseri, vitwatira vyawu vyoseri meviherepi kwawu na kwa wana wawu mashaka goseri. 30 Guseleri pasi gwakawagambiri womberi wawuyi mumalingu gawu. 31 Shakapanu gwenga Musa guwuyi panu na kuwera pakwegera na neni, neni hanikupanani gwenga malagaliru goseri na mashariti na malagizu galii, gwenga haguwafundi womberi hawagajimili muisi yang'enda kuwapanana wahali."

32 Su mwenga mulikali weri mukila shintu Mtuwa Mlungu ntambu yakawalagaliriti, mushijimiri kila shintu shamgambirituwiti. 33 Mugajimiri goseri Mtuwa Mlungu gakatakuliti, su kila shintu hashiherepi kwaku na hagwendereyi kulikala muisi yamgenda kuhala.