1 Mwenga mwawana wa Mtuwa Mlungu gwenu. Namulihanja hanja munshimba ama kumoga shikubuli toziya ya wantu yawahowiti ntambu yawadaya wamonga. 2 Mwenga mwawantu wananagala kwa Mtuwa Mlungu gwenu, pakati pa wantu woseri pasipanu, mweni kawasyaguliti muweri wantu wakuwi wa gweka.

3 Namuliya shintu shoseri shashiwatenda mjimiluwi ndiri kumguwira Mtuwa Mlungu. 4 Muweza kuwaliya wankanyama awa: wang'ombi na wakondolu na wambuzi, 5 wankanyama washemuwa vinjapuri na paa na kongoni na mbala na pofu na kondolu gwa kulugongu, 6 na kila nkanyama yakawera na kwatu zyazibagulika pakati na yakawuziya mumlomu shilii shakaliyiti na kushiliya kayi, su awa muweza kuwaliya. 7 Kumbiti namliya nkanyama yoseri ulii kwatu zyakuwi zibagulika ndiri pakati na kawuziya ndiri mumlomu shilii shakaliyiti. Namumliya ngamiya na sungura na pimbi, toziya wankanyama awa wawuziya mumlomu shilii shawaliyiti na kushiliya kayi kumbiti kwatu zyawi zibagulika ndiri pakati. Wankanyama awa paguwaliya hawakutendi gujimiluwi ndiri mukumguwira Mlungu. 8 Viraa namuliya mtumbi, tembera kwatu zyakuwi zibagulika pakati kumbiti kawuziya ndiri mumlomu shilii shakaliyiti kala na kushiliya kayi. Namuliya wankanyama awa toziya jimiluwi ndiri mukumguwira Mlungu, su namuliya vinofu vyawu ama kushinkula mizoga yawu.

9 Mwenga muweza kuliya ntambu zoseri za wasomba yawawera na makalakatu na malakalaka. 10 Kumbiti mwenga namuliya shiwumbi shoseri shashilikala mumashi, shilii shashiwera ndiri na makalakatu ama malakalaka, toziya paguliya hapeni gujimiluwi mukumguwira Mtuwa Mlungu.

11 Mwenga muweza kuwaliya wampongu yawajimiluwa kulongolu kwa Mtuwa Mlungu. 12 Kumbiti namuwaliya wampongu awa. Mpongu tai na furukombe na kapungu, 13 shimbowi na kipanga na ntambu zoseri za kipanga, 14 na ntambu zoseri za kunguru, 15 na mpongu mbuni na lisisigila na tipitipi na ntambu zoseri za lisisigila, 16 na lisisigila mdidika na mnandi na lisisigira mkulu, 17 mumbi na mwari na mderi, 18 kolongo na ntambu zoseri za koikoi na hudihudi na popo.

19 Namuwaliya wang'ongolu woseri yawavuma pawagenda, yawawera na mbapatiru na yawawera na magulu msheshi, womberi wawera wakalaliru kwa mwenga. 20 Kumbiti wang'ongolu wamu yawawera na mbapatiru na yawajimilika, muweza kuwaliya.

21 Namuliya vinofu vya nkanyama yoseri yakahowiti mweni. Mwenga muweza kumpanana muhenga yakalikala mumiji yenu su kaliyi, ama muweza kumshuwuzila muntu gwa isi yamonga toziya mwenga muwera wananagala kwa Mtuwa Mlungu gwenu.

Namuteleka vinofu vya mwana gwa mbuzi mumaweri ga mawu gakuyi.

22 Mtuli gweka zaka za mabenu goseri mumalambu kila shinja. 23 Shakapanu mugajegi mabenu aga pahala palii Mtuwa Mlungu gwenu pakapasyaguliti mwenga mumguwiri. Kulii mwenga hamuliyi kulongolu kwakuwi, zaka za viboga vyenu na divayi na lipaki lyenu lya mizyetuni na vinofu vya nkanyama yakawera shipanta njira kulawa mumifugu yenu ya wang'ombi na wakondolu na wambuzi. Mtendi hangu su mulifundi kumgohelera Mtuwa Mlungu gwenu mashaka goseri. 24 Handa pahala palii Mtuwa Mlungu pakapasyaguliti mwenga mguwiri papawera patali kulawa ukaya kwenu, mwenga hapeni muwezi kujega zaka za mabenu genu galii Mtuwa Mlungu gakawatekeleriti. Su mwenga mtendi hangu, 25 muzishuwuzi zaka za vintu avi mpati mpiya, su mtoli mpiya azi na muzijegi pahala palii pakumguwira Mtuwa Mlungu pakapasyagula. 26 Mpiya azi hamuwezi kuhemela shoseri shamfira, hamuhemeri vinofu vya ng'ombi na vinofu vya kondolu ama mbuzi na divayi ama ugimbi, mwenga pamuhera na kaya zyenu hamuviliyi vintu avi na kunemelera palii kulongolu kwa Mtuwa Mlungu gwenu.

27 Namuwalyaluwa wantu wa Lawi yawalikala pakati penu, womberi wahera lifungu lyoseri ama uhala wa isi. 28 Mulupeleru lwa kila shinja sha tatu, mwenga mjegi semu yimu muvintu lilongu vya mabenu genu na kugatula mumiji yenu. 29 Viboga avi haviweri vya wantu wa Lawi, toziya womberi wahera lifungu lyoseri pakati penu, wahenga na mshiwa na wakenja yawalikala mumiji yenu. Womberi walekeluwa kwiza kutola viboga vyawafira pavituluwa. Mtendi hangu su Mtuwa Mlungu gwenu kawatekeleri mumahengu genu goseri gamtenda.