1 Su Musa pakaweriti na wakulu wa Israeli, kawagambiriti wantu hangu, "Mjimiri malagaliru goseri ganuwapanana leru. 2 Lishaka lilii pamloka lushemba Yoridani na kwingira muisi ilii Mtuwa Mlungu gwenu yakawapanana, mwenga hamgolosiyi mabuwi makulu na kugatyeremeka. 3 Pamabuwi galii mwenga hamlembi visoweru vyoseri vya malagaliru goseri aga, pamwingira muisi yaiwera na mbotu kulima na manyasi maherepa ga kuliziya mifugu, isi ilii Mtuwa Mlungu gwa wambuyi wetu kawalagiliti. 4 Pamuhera kumwambu kulushemba lwa Yoridani, hamgolosiyi mabuwi viraa palugongu Ebali, ntambu yanuwalagaliriti leru na mugatyeremeka. 5 Aku hamumnyawiri Mtuwa Mlungu gwenu, shitalawanda sha kutambikira pahala panu papawera na mabuwi galii gasongoluwa ndiri. 6 Shitalawanda sha kutambikira shoseri shilii shamumnyawira Mtuwa Mlungu gwenu, hashinyawiwi kwa mabuwi yagasongoluwa ndiri. Pashitalawanda ashi, mwenga hamumlaviliri Mtuwa Mlungu, tambiku ya kulunguziwa nakamu. 7 Hamumlaviliri tambiku za ponga na kuziliya palaa palii na kunemelera kulongolu kwa Mtuwa Mlungu gwenu. 8 Mwenga hamlembi pota kufifa visoweru vyoseri vya malagaliru aga pamabuwi galii gamgatyeremikiti."
9 Su Musa pamuhera na watambika wa shiyuwuku sha Walawi, wawagambiriti wantu woseri wa Israeli, "Mnyamaliri! Mumpikiniri neni mwenga wantu wa Israeli. Leru mwenga muwera wantu wakuwi Mtuwa Mlungu gwenu. 10 Mwenga mushijimiri shilii shakawagambira na mjimiri mashariti gakuyi gooseri na malagizu gakuyi yanuwapanana leru."
11 Mulishaka lilaa lilii Musa kawalagaliriti wantu na kulonga, 12 pamloka kala lushemba lwa Yoridani, makabila aga ga Simiyoni na Lawi na Yuda na Isakari na Yosefu na Benjamini, hagagoloki palugongu lwa Gerizimu kubwera matekeleru. 13 Viraa makabila ga Rubeni na Gadi na Asheri na Zebuluni na Dani na Nafutari, hagagoloki palugongu lwa Ebali kubwera pangiru. 14 Walawi hawawagambiri wantu woseri wa Israeli kwa liziwu likulu.
15 Mtuwa Mlungu kampangiri muntu yoseri yakanyawa shinyagu sha mabuwi ama shinyagu sha mbawu ama shinyagu sha kuyeyusha na kushigolosiya kwa bada kushiguwira. Vintu avi viwera vikalaliru kulongolu kwa Mtuwa Mlungu gwenu.
Wantu woseri walongi, yina haa!
16 Mtuwa Mlungu kampangiri muntu yoseri yakamzalawu tati gwakuwi ama mawu gwakuwi.
Wantu woseri walongi, yina haa!
17 Mtuwa Mlungu kampangiri muntu yoseri yakawusiya shimaniziwu sha mbaka sha wapakwegera gwakuwi.
Wantu woseri walongi, yina haa!
18 Mtuwa Mlungu kampangiri muntu yoseri yakamlongoziya lwisi kagendi uwega wingi na kulii pakafiriti kugenda.
Wantu woseri walongi, yina haa!
19 Mtuwa Mlungu kampangiri muntu yoseri yakapotuziya kuwapanana galii gagafiruwa kwa muhenga ama mshiwa ama mkenja.
Wantu woseri walongi, yina haa!
20 Mtuwa Mlungu kampangiri mpalu yoseri yakagonja na yumu ya wadala wa tati gwakuwi, toziya kankumsoniziya tati gwakuwi.
Wantu woseri walongi, yina haa!
21 Mtuwa Mlungu kampangiri muntu yoseri yakagonja na nkanyama yoseri ulii.
Wantu woseri walongi, yina haa!
22 Mtuwa Mlungu kampangiri muntu yoseri yakagonja na dada gwakuwi, dada gwakuwi yakayuwuka kwa mawu gwakuwi mweni ama dada yakayuwukiti kwa mawu gwa kambu.
Wantu woseri walongi, yina haa!
23 Mtuwa Mlungu kampangiri muntu yoseri yakagonja na nahonga gwakuwi.
Wantu woseri walongi. Yina haa!
24 Mtuwa Mlungu muntu yoseri yakamlaga muntu kwa bada.
Wantu woseri walongi, yina haa!
25 Mtuwa Mlungu kampangiri muntu yoseri yakaluwiti swinda su kalagi muntu yakahera likosa.
Wantu woseri walongi, yina haa!
26 Mtuwa Mlungu kampangiri muntu yoseri yakavijimira ndiri visoweru vya malagaliru Mlungu na kuvitenda.
Wantu woseri hawalongi, yina haa!
/images/a/Tcg2NiV7ce24OT6kCIQGR)
/images/a/-h5KPk8ct3kLpCpYm9-g6)