1 Mumgohelili Mtuwa Mlungu gwenu, mvini msambu gwa Pasaka kila shinja, mumwezi yagushemuwa Abibu. Mumwezi agu Mtuwa Mlungu kawakomboliti mwenga pashiru kulawa muisi ya Misri. 2 Su pamfira kuvina msambu agu, mwenga hamgendi pahala palii Mtuwa Mlungu pakapasyaguliti mumguwiri, palii mwenga mlaviyi mwana gwa ng'ombi ama kondolu ama mbuzi kulawa mumifugu yenu kaweri tambiku ya Pasaka. 3 Namuiliya tambiku ayi pamuhera na mabumunda yagalekeluwa simika, kumbiti kwa mashaka saba mliyi mabumunda yagalekeluwa ndiri simika, aga ndo mabumunda ga ntabiku toziya mlawiti Misri kamakam hera. Su mashaka goseri gamulikala hamuliholeri lishaka lilii lyamlawiti Misri. 4 Kwa mashaka saba muntu yoseri nakatula simika ukaya kwakuwi, viraa vinofu vya nkanyama yakalikituluwiti pamihi mulishaka lya kwanja navisigala mpaka mandawira. 5 Namulaviya tambiku ya Pasaka mumiji goseri gulii Mtuwa Mlungu yakawapananiti, 6 kumbiti mlaviyi tambiku ayi pahala Mtuwa Mlungu gwenu pakapasyaguliti mwenga mumguwiri. Mlaviyi tambiku ayi pamihi mshenji paguzyeta gambira shaka shilii shamlawiti Misri. 7 Muviteleki vinofu avi na kuviliya pahala palii Mtuwa Mlungu gwenu pakapasyagula mwenga mumguwiri. Shakapanu mandawira shilawu yakuwi, mwenga hamuwuyi mumalingu genu. 8 Mashaka sita mwenga hamuliyi mabumunda yagalekeluwa ndiri simika na lishaka lya saba mwenga hamjojoniki kumguwira Mtuwa Mlungu, su namtenda lihengu lyoseri mulishaka ali.

9 Muwalangi majuwa saba mwenga pamwanja kubenanga viboga. 10 Shakapanu mvini msambu gwa mabenu kulongolu kwa Mtuwa Mlungu gwenu kwa kumlavilira tambiku gambira tambiku zyamonga ntambu yamtekelerituwiti. 11 Mwenga mnemeleri kulongolu kwa Mtuwa Mlungu gwenu, mwenga pamuhera na wana wenu na wahinga wenu na wantumini wenu na Walawi yawalikala mumji gulii na wantu yawawera ndiri Waisraeli na mshiwa na wakenja walii yawalikala pamuhera na mwenga. Mjegi tambiku azi pahala palii Mtuwa Mlungu pakapasyaguliti mumguwiri. 12 Muliholi kuwera mwenga muweriti wamanda pamuweriiti Misri, su muliloli weri kugajimira malagaliru aga.

13 Pakupeta kala viboga vyenu vyoseri na kuzikama zyabibu zyenu, mvini msambu gwa visasa kwa mashaka saba. 14 Mnemeleri mumsambu agu, mwenga pamuhera na wana wenu wapalu na wahinga wenu na wantumintumi wenu na Walawi na wantu yawawera ndiri Waisraeli na mshiwa na wakenja yawalikala mumiji yenu. 15 Kwa mashaka saba mwenga mnemeleri msambu agu kumgohelera Mtuwa Mlungu gwenu pahala pakasyaguliti mumguwiri. Mwenga mnemeleri toziya Mtuwa Mlungu gwenu hakagatekeleri mabenu genu goseri pamuhera na mahengu genu gamonga gamtenda.

16 Wapalu woseri pakati penu mwenga Waisraeli hawajojoniki kumguwira Mtuwa Mlungu mara ntatu kila shinja pahala palii pakapasyaguliti mumguwiri. Mumsambu gwa mabumunda yagalekeluwa ndiri simika, msambu gwa kubenanga na msambu gwa kuwusiya malingu. Kila mpalu nakagenda mawoku hera kumguwira Mtuwa Mlungu. 17 Kila yumu gwenu hakalaviyi lifupu lyakuyi kulawirana Mtuwa Mlungu ntambu yakamtekeleriti.

18 Hamuwasyaguli watoza pamuhera na wakulu kulawa mumakabila genu mumiji yoseri muisi Mtuwa Mlungu yakagenda kuwapanana, womberi hawawatozi wantu pota kubagula. 19 Mwenga mfiruwa mtozi teratera, namtenda upendelewu kwa muntu yoseri ulii ama kuwanka swinda, toziya swinda itenda yawawera na luhala wasindi kutoza teratera na kupotuziya sitaka lya muntu muheri. 20 Mashaka goseri mtozi teratera, su mwenga hamwingiri na kutola kwa makakala isi Mtuwa Mlungu gwenu yakagenda kuwapanana.

21 Naguyala mtera goseri gulii guweri mpanda ya mlungu mdala Ashera pakwegera na shitalawanda sha kutambikira shamgenda kumnyawira Mtuwa Mlungu gwenu. 22 Viraa namgolusiya mpanda ya mabuwi kuiguwira toziya Mtuwa Mlungu gwenu kaikalalira.