1 Mtuwa Mlungu gwenu hakawajegi kwingira muisi ilii yamgenda kuitola kwa makakala, mweni hakaviwingi vipinga vivuwa vya wantu walawi muisi ilii. Pamwingira Mtuwa Mlungu hakawawingi kulawa kulongolu kwenu, Wahiti na Wagirigashi na Waamoni na Wakanaani na Waperizi na Wahivi na Wayebusi, azi isi saba nkulu na zyaziwera na makakala nentu kuliku mwenga. 2 Mtuwa Mlungu pakawatenda mwenga muwakanki womberi, mwenga mfiruwa muwalagi wantu woseri. Namtenda mapatanu na womberi ama kuwawonera lusungu. 3 Namuyugana na womberi, namuwalekeziwa wahinga wenu kuyuguwa na wantu awa ama wana wantemba wenu kuyuga wahinga wa wantu awa. 4 Toziya pamtenda hangu, wantu walii hawawatendi wana wenu kuleka kumguwira Mtuwa Mlungu na kuwaguwira wamilungu wamonga. Maya ga Mtuwa Mlungu hagawiziri mwenga na kuwagamiziya kamkamu. 5 Ntambu ayi ndo yamgenda kutenda kwa wantu walii. Mpatangi vitalawanda vyawu vya kutambikira na mbomolangi mpanda zawu za mabuwi zyazityekutuwituwiti kwa mlungu gwawu Baali, viraa mbomolangi vinyagu vya mpanda zawu za Ashera na muvilunguziyi nakamu vinyagu vyawu mumotu. 6 Toziya mwenga mwawananagala kwa Mtuwa Mlungu gwenu. Mtuwa Mlungu gwenu kawasyaguliti mwenga kulawa pakati pa wantu woseri yawawera pasipanu kuwera wantu wakuwi wa gweka.

7 Mtuwa Mlungu kawafiriti ndiri mwenga na kuwasyagula toziya mwenga mwawantu wavuwa kuliku wantu wamonga, kumbiti mwenga muweriti watangara ndiri kuliku wantu wa isi zyamonga pasipanu. 8 Toziya Mtuwa Mlungu kawafiriti mwenga na kafiliti kutenda shilii shakawalagiliti wambuyi wetu kuwera hakawalopoli kwa makakala gakuyi makulu na kuwatenda muweri walekelu kulawa muumanda wa Farao mfalumi gwa Misri. 9 Su muvimani kuwera Mtuwa Mlungu gwenu ndo Mlungu mwaminika, kalitenda lipatanu lyakuyi lya ufiru kwa maelufu ga wantu wa vileri virii yawamfira mweni na kutenda shilii shakatulagaliriti. 10 Kumbiti Mtuwa Mlungu hapeni kaleki kuwazibu na kuwagamiziya walii yawamlema. 11 Su mwenga mfiruwa kugajimila malagaliru na mashariti na malagizu goseri galii ganuwapanana mwenga leru.

12 Handa pampikanira malagizu aga na kugajimila kwa uwaminika, Mtuwa Mlungu gwenu hakalitendi lipatanu lyakuyi kwenu ntambu yakawalagiliti kwa shirapu kwa wambuyi wetu. 13 Hakawafiri mwenga na kuwatekelera na hakawapanani mwenga wana wavuwa. Viraa hakagatekeleri malambu genu gaweri na mabenu na divayi na lipaki lya mizyetuni, viraa hakawatekeleri kwa kuwapanana wang'ombi na wakondolu wavuwa muisi yakawalagiliti wambuyi wetu kuwera hakawapanani mwenga. 14 Hamtekeleluwi kuliku wantu wamonga woseri pasipanu. Pakati penu hapeni kuweri na wapalu ama wadala yawahera wana ama mifugu yenu yaiwera mpendi. 15 Mtuwa Mlungu hakawaloleri weri kulawa mumalweli goseri. Mwenga hapeni muweri na malweli goseri ga kutiriziya ntambu yagawapatiti wambuyi wetu aku Misri, kumbiti malweli aga hagawapati wangondu wetu. 16 Muvyagamiziyi vipinga vyoseri vya wantu virii Mtuwa Mlungu pakawatenda mwenga muwakanki, namuwawonera lusungu. Namuwaguwira milungu yawu, tembera shitwatira ashi hashiweri ligomeziwu kwa mwenga.

17 Namuligambira maweni, wantu awa wavuwa kuliku twenga, hatuwezi hashi kuwawinga muisi ayi? 18 Namuwatira, muliholi Mtuwa Mlungu gwenu ntambu yakamtenditi mfalumi pamuhera na wantu woseri wa Misri. 19 Muholi malweli ga kutiriziya galii wambuyi wetu wawoniti Mtuwa Mlungu ntambu yakawakomiti wantu wa Misri, na ntambu ya mawuzawuza na makangashu na uwezu mkulu yakautenditi Mtuwa Mlungu gwenu na kwa makakala makulu yakawalaviyiti wambuyi wenu kulawa Misri. Mtuwa Mlungu gwenu hakatendi ntambu iraa ayi kwa wantu woseri vinu yamuwatira. 20 Mtuwa Mlungu gwenu hakatendi womberi washashatiki, na hawagamiri walii yawasigala wakomu na kutuga kulififa kulawa kwa mwenga. 21 Su namuwatira toziya Mtuwa Mlungu gwenu kapamuhera na mwenga. Mweni ndo Mlungu mkulu na yakatiriziya. 22 Mtuwa Mlungu gwenu hakawawingi wantu wa isi ntambu mwenga yamwongereka shididinishididini. Hapeni muwezi kuwagamiziya wantu woseri kwa mala yimu, toziya pamtenda hangu walanga ya wankanyama wa kuntundu haiyongereki kwa mwenga na kuwagaziya. 23 Mtuwa Mlungu hakatendi muwakanki wangondu wenu na kuwatenda washashatiki mpaka pawagamira. 24 Viraa hakatendi mwenga muwakanki wafalumi wawu. Mwenga hamuwalagi na wantu hawawalyaluwi. Kwahera muntu yoseri hakawezi kuwalewelera mwenga, mwenga hamuwagamiziyi woseri. 25 Muvilunguziyi vinyagu vyawu vya kusongola vya milungu yawu. Namuwera na matamata kutola madini ga feza ama zahabu, pamtola vintu avi kuwera vyamwenga, vintu avi haviweri magomeziwu kwa mwenga, toziya vintu avi viwera vikalaliru kulongolu kwa Mtuwa Mlungu. 26 Namujega ukaya kwenu shinyagu shoseri, toziya pamvijega vintu avi ukaya kwenu, Mlungu hakawapangili mwenga ntambu yakawapangiliti womberi. Mwenga mfiruwa muvilemi na kuvikalalira nentu toziya vintu avi Mtuwa Mlungu kavipangiliti.