1 Aga ndo malagaliru na mashariti na malagizu galii Mtuwa Mlungu gwenu kanagaliriti nuwafundi, su mugajimiri muisi yamgenda kwingira na kuhala. 2 Gwenga pamuhera na shiyuwuku shaku mfiruwa kumgohelera Mtuwa Mlungu gwenu shaka shoseri shamulikala. Handa pamujimira mashariti na malagaliru gakuyi, mwenga hamunemeleli mumakaliru gavuwa. 3 Su mwenga Waisraeli, mpikaniri weri na mgajimili aga, su kila shintu hashiweri weri kwa mwenga pamulikala na hamwongereki nentu muisi yaiwera na mbotu kwa walimi na kuliziya mifugu gambira Mtuwa Mlungu ntambu yakawalagiliti wambuyi wetu.

4 Su mpikaniri mwenga Waisraeli! Mtuwa Mlungu hera ndo Mlungu gwenu. 5 Mumfiri Mtuwa Mlungu gwenu kwa myoyu yenu yoseri na kwa rohu yenu yoseri na makakala genu goseri. 6 Namugalyaluwa malagaliru aga yanuwapanana leru. 7 Muwafundi aga wana wenu kayi na kayi. Hamuwatambiri aga ukaya kwenu ama pamgenda mwanja ama pamgenda kugonja ama pamwimuka. 8 Mugalembi malagaliru aga muvintola na mutawi mumawoku mwenu na muviwunju vya sheni zyenu kuwera liholuziwu. 9 Mugalembi viraa muvizingiti vya magomi ga numba zyenu pamuhera na mumagomi makulu genu.

10 Mtuwa Mlungu gwenu kawalagiliti wambuyi wenu Abrahamu na Isaka na Yakubu kuwera hakawapanani mwenga isi ilii yaiwera kala na miji mikulu na iherepa, miji ilii mwenga muinyawiti ndiri. 11 Viraa kalagiliti kuwera numba zyaziwera mumiji ilii hazimemi vintu viherepa, kwahera muntu yakavituliti, hamteki mashi mumanegu galii mwenga mugabawiti ndiri na hamuliyi mabwajubwaju mumalambu ga mizyabibu na mizyetuni ilii mwenga muiyaliti ndiri. Su Mtuwa Mlungu pakawajega kwingira muisi ilii mwenga pamuhera na shiboga shamfira, 12 mulikali weri namumlyaluwa Mtuwa Mlungu yakawalaviyiti Misri kulii kwamuweriti wamanda. 13 Mumgohelili Mtuwa Mlungu gwenu, mumtenderi gweka yakuwi na gutuli lapiru lyaku kupitira litawu lyakuyi. 14 Namuwaguwira wamilungu wamonga, wamilungu ya wantu yawawera pakwegera na mwenga. 15 Handa pamuwaguwira wamilungu wamonga, maya ga Mtuwa Mlungu hagawiziri mwenga gambira motu na hagawagamiziyi nakamu pasipanu.

16 Namumjera Mtuwa Mlungu gwenu ntambu yamtenditi kulii Masa. 17 Nakaka mumashaka goseri mugajimili malagaliru goseri na amuli na malagizu na mashariti galii gampananituwiti. 18 Mtendi galii gagamfiriziya Mtuwa Mlungu, su goseri gamtenda hagaweri gaherepa kwa mwenga. Shakapanu hamwingiri kuhala isi ilii iherepa Mtuwa Mlungu yakawalagiliti wambuyi wetu. 19 Mwenga humuwawingi wangondu wenu woseri gambira Mtuwa Mlungu ntambu yakalagiliti.

20 Mumashaka gagizaku, wana wenu pawawakosiya, iwera hashi Mtuwa Mlungu gwenu katulagalila twenga tujimili malagaliru na malagizu na mashariti goseri aga? 21 Mwenga hamuwawankuli hangu, twenga tuweriti wamanda wa Farao, mfalumi gwa Misri, Mtuwa Mlungu katulaviyiti Misri kwa makakala gakuyi makulu. 22 Twenga twaweni tumwoniti pakatenda mawuzawuza ga ntambu yingiyingi na katenditi vitwatira vya kutiliziya kwa wantu wa Misri na mfalumi gwa Misri pamuhera na wakulu wakuwi. 23 Katulaviyiti kulawa Misri, katujega panu na kutupanana isi ayi ntambu yakalagiliti kuwera mekawapanani wambuyi wetu. 24 Su Mtuwa Mlungu katulagaliriti kugajimira malagaliru goseri na kumguwira kwa mota yatwenga, su kapati kutulolera mashaka goseri ntambu yaiwera leru. 25 Shintu shashifaa kwa twenga ndo kujimila kila shintu Mtuwa Mlungu shakatulagaliriti.