1 Avi ndo visoweru vya lipatanu lilii Mtuwa Mlungu lyakamlagaliriti Musa kulitenda na Waisraeli muisi ya Wamowabu, kwa kwongera Mtuwa Mlungu kwanja katenditi lipatanu nawa kulugongu Holebu.

2 Musa kawashemiti pamuhera Waisraeli woseri na kawagambiriti, mwoniti maweni Mtuwa ntambu yakamtendiriti mfalumi gwa Misri na wakulu wakuyi na wantumintumi wakuyi pamuhera na isi yoseri. 3 Maweni mwenga mwoniti makomangu ga kutiriziya na mawuzawuza makulu na malangalira makulu Mtuwa gakagatenditi. 4 Kumbiti mpaka leru, Mtuwa Mlungu hakeni wapananani mahala ga kuvimana na masu ga kuwona na makutu ga kupikanira! 5 Kwa mivinja arobaini, Mtuwa kawalongoziyiti kushiwala, nguwu zyenu zyamvaliti zisakaliti ndiri, viraa vilwatu vyenu visakaliti ndiri mumagulu mwenu. 6 Mwenga mliyiti ndiri mabumunda ama kulanda divayi ama shiloweru shoseri shilii, su mwenga mpati kuvimana kuwera Mtuwa ndo Mlungu gwenu. 7 Na pamsokiti pahala panu, mfalumi Sihoni gwa aku Heshiboni na mfalumi Ogu gwa aku Bashani, wiziti kulikomanga nkondu na twenga, kumbiti tuwakomangiti na kuwakanka. 8 Tuitoliti isi yawu na tuibaguliti na kugapanana makabila ga Rubeni na Gadi na nusu tulipananiti likabila lya Manasi. 9 Hangu mwenga muweri waminika kulijimira lipatanu ali, su mpati kufanikiwa mumahengu genu goseri.

10 Leru mwawoseri mwenga mgoloka kulongolu pa Mtuwa Mlungu gwenu. Wakulu wa makabila na wazewi wenu na wakulu wenu na wapalu woseri, 11 wadala wenu na wana wenu na wahenga yawalikala pakati penu, walii yawasakulira mbawu na kuwatekera mashi. 12 Mwenga mgoloka panu leru su Mtuwa Mlungu katendi lipatanu na mwenga, na mwenga mlijimili lipatanu lyakuyi, 13 handa hakawalanguziyi nakaka leru kuwera mwenga muwera wantu wakuyi na mweni kawera Mlungu gwenu, ntambu yakawalapiriti mwenga pamuhera na wambuyi wetu Abrahamu na Isaka na Yakobu. 14 Nankutenda ndiri na mwenga gweka yenu hera, lipatanu ali pamuhera na kulirapa, 15 kumbiti ntenda lipatanu ali pamuhera na walii yawawera pamuhera na twenga leru kulongolu kwa Mtuwa Mlungu gwenu, viraa ntenda pamuhera na shiyuwuku shenu hasheniyuwuki.

16 Mliholi ntambu yatulikaliti muisi ya Misri na ntambu yatugenditi mwanja muisi zyamonga. 17 Mwenga mwoniti vinyagu vyawu vya kukalaziya vya wamilungu yaisongolituwiti kwa mitera na mabuwi na vityelemikiwiti malembiziwu ga madini ga feza na zahabu. 18 Mulikali weri, kwahera mpalu ama mdala ama lukolu ama likabila lyoseri lilii pakati penu yakagoloka panu leru na hakagalambuki kumleka Mtuwa Mlungu gwenu na kugenda kuwaguwira wamilungu wa isi zyamonga. Shitwatira ashi hashiweri gambira lushigira lwa shimeru shashikula pakati penu na kulera usungu pamuhera na mabwajubwaju gakalipa. 19 Mloli weri kuwera kwahera muntu yoseri panu leru yakapikanira malapiru aga na shakapanu kalitakulila mweni mumoyu kuwera hakaweri salama, ata ubinta pagwendereya kwakuwi. Ntambu ayi yaiwagamiziyi woseri, waheri na wakontola. 20 Mtuwa Mlungu hapeni kamlekiziyi muntu gambira ayu, maya ga Mtuwa Mlungu na weya yakuwi havimyakiri muntu ayu, pangiru zoseri zyazilembituwi mushitabu ashi hazimwizili na Mtuwa Mlungu hakamwagamiziyi nakamu muntu ayu. 21 Mtuwa hakamtuli gweka muntu ayu kulawa pakati pa makabila goseri ga Israeli, kapatuwi na madoda kugenderana na pangiru zoseri za lipatanu lyalilembitwi mushitabu ashi.

22 Muviyiwuku vyavizaku, walera wenu pamuhera na wahenga kulawa isi ya kutali hawawoni ntambu Mtuwa Mlungu kayijegeriti isi ayi madoda na ntabiku. 23 Isi yoseri hayilunguziwi na mabuhi ga madini ga baruti na munu, hailunguli na hapeni kuweri na shintu shashiyaluwa mumalambu, viraa magugu hapeni gameri. Isi yenu hayiweri gambira miji ya sodoma na Gomora. Adima na Seboimu, miji ilii Mtuwa Mlungu ntambu yakayagamiziyiti kwa maya gakuyi. 24 Wantu wa isi zimonga hawakosiyi, iwera hashi Mtuwa Mlungu isi ayi kayitenda ntambu ayi? Kwa ntambu gaa kaweriti na maya makulu? 25 Na lyankula haliweri hangu, toziya wantu wa Mtuwa walilekiti lipatanu lyawalituliti na Mlungu gwa wambuyi wawu shaka pakawalaviyiti muisi ya Misri, 26 womberi wagenditi kuitendera na kuwaguwira wamlungu wamonga, wamlungu walii waimaniti ndiri kwanja, viraa Mtuwa Mlungu kawagambiriti ndiri wayiguwiri. 27 Su Mtuwa Mlungu kaweriti na maya nentu kwa wantu wa isi ayi na katenditi pangiru zoseri zilii zyazilembitwi mushitabu ashi ziwapati. 28 Mtuwa Mlungu kawatupuliti kulawa muisi yawu kwa maya na nkalaliru nentu, kawawasiti muisi yamonga ntambu yawawera aku leru.

29 Vitwatira vya bada ndo vya Mtuwa Mlungu gwenu, kumbiti galii gagagubutulitwi ndo gatwenga pamuhera na shiyiwuku shetu mashaka goseri, su tuvitendi visoweru vyoseri vya malagaliru aga.