1 Musa kendereyiti kuwagambira, pamwingira kala na kuhala isi ilii Mtuwa Mlungu gwenu yakawapanana iweri yenu na kulikala aku, 2 mwenga hamtoli kila shambenanga shashiwera sha kwanja kukamala na kugatula mulijamanda na kugajega pahala palii Mtuwa Mlungu gwenu pakapasyaguliti mumguwiri. 3 Hagumgenderi mtambika yakamtenda mahengu mushaka shilii na kumgambira, leru nonga kulongolu kwa Mtuwa Mlungu gwangu kuwera ningira muisi yakawalagiliti wambuyi wetu kuwera hakawapanani.

4 Shakapanu mtambika pakalitola lijamanda lilii kulawa mumawoku mwaku na kulitula pashitalawanda sha kutambikira sha Mtuwa Mlungu gwenu, 5 gwenga hagutakuli visoweru avi kulongolu kwa Mtuwa Mlungu gwenu, mbuyi gwangu kaweriti Mwalamu yakayeritiyeriti aku na aku, shakapanu kaseleriti kugenda Misri na kalikaliti aku gambira muhenga. Mweni pamuhera na kaya yakuwi waweriti watangara ndiri pawalawiti aku, kumbiti womberi waweriti isi nkulu yaiwera na makakala na wantu wavuwa. 6 Wamisri watutenderiti kwa kutukakanika, watutabisiyiti na kutukakanira tutendi mahengu gakamala ga umanda. 7 Shakapanu tumliliriti Mtuwa Mlungu, Mlungu gwa wazewi wetu, mweni katupikaniriti kulila kwa twenga na kuiwona ntabiku yatuweriti nayu, viraa kawoniti mahengu makamala gatuweriti naga. 8 Su Mtuwa Mlungu katulaviyiti aku Misri kwa makakala gakuyi makulu kwa kutenda mawuzawuza ga ntambu yingiyingi na vitwatira vya kulikangasha na kutiriziya pamuhera na malangalira. 9 Katujegiti panu na kutupanana isi ayi yaiwera na mbotu kwa kulima na mahamba ga kuwaliziya mifugu. 10 Su vinu nikujegera Mtuwa Mlungu viboga vya kwanja kukamala vyayaliti muisi ayi yakampananiti.

Shakapanu hagulituli pasi lijamanda lilii kulongolu kwa Mtuwa Mlungu gwenu na kumguwira. 11 Na gwenga hagunemeleri maheri goseri galii Mtuwa Mlungu gwenu, kakupanana gwenga pamuhera na kaya yaku. Su Walawi na wahenga pamuhera na woseri yawalikala pakati penu hawanemeleri pamuhera na gwenga. 12 Kila pa mivinja mitatu, kila yumu gwenu hakalaviyi zaka ya mabenu genu goseri kwajili ya Walawi pamuhera na wahenga na washiwa na wakenja, su womberi wapati shiboga shawafira pawawera mumiji yenu. 13 Shakapanu gwenga hagulongi kulongolu kwa Mtuwa Mlungu gwenu, neni nulilaviya ukaya kwangu lifungu linanagala, niwapanani Walawi na wahenga na washiwa na wakenja, ntambu yagunagaliriti ntendi. Neni ndeka ndiri kujimira ama kulyaluwa malagaliru gaku kuusu kulaviya zaka. 14 Neni ndiyiti ndiri zaka yoseri paweriti nankudaya, nuyilaviyiti ndiri kunja kwa numba yangu neni paweriti muhumba na ndaviyiti ndiri zaka ayi kwa yawahowiti. Nikujimira gwee Mtuwa Mlungu gwangu, ntenda kila shintu shagunagaliriti. 15 Guloli pasi kulawa pahala paku pananagala aku kumpindi, guwatekeleri wantu waku Waisraeli na isi yagutupanana ntambu yaguwalagiliti wambuyi wetu, isi ilii yaiwera na mbotu kwa kulima na yaiwera na manyasi ga kuwaliziya mifugu.

16 Leru Mtuwa Mlungu gwenu kankuwalagalira mwenga kugajimira mashariti na malagizu aga. Namulyaluwa kugajimira kwa moyu gwenu goseri na kwa rohu yenu yoseri. 17 Leru mwenga mtakula maweni kuwera Mtuwa Mlungu ndo Mlungu gwenu na hamulikali ntambu yakafira Mtuwa Mlungu na mwenga hamjimiri mashariti gakuyi na malagaliru gakuyi na malagizu gakuyi na kujimira kutenda kila shintu shakawagambiriti. 18 Su Mtuwa Mlungu katakula nakamu leru kuwera mwenga muwera wantu wakuwi wa gweka ntambu yakawalagiliti na mwenga mfiruwa kujimira malagaliru gakuyi goseri. 19 Mtuwa Mlungu hakawatendi mwenga kuwera isi yaigoheleruwa nentu kuliku isi zyamonga vyakaziumbiti. Mwenga hampananwi ujumi na ligoya na hamumaniki nentu. Mwenga hamuweri wantu wakuwi wa gweka Mtuwa Mlungu gwenu, wantu yawawera wakuwi wananagala ntambu yakalagiliti.