1 Mpikaniri mwenga Waisraeli! Leru mwapakwegera kuloka lushemba Yoridani kugenda kutola kwa makakala isi nkulu na wantu wakuwi wawera na makakala nentu kuliku mwenga, miji mikulu yawalikala iwera na vibambaza vitalipa mpaka kulyera. 2 Wantu yawawera mumiji ayi watalipa na wawera na makakala, wantu awa walawa mushiyuwuku sha Anaki. Mwenga ntambu yamuvimana na ntambu yampikaniriti wantu pawakosiya, hashi, gaa yakaweza kuwakomanga wantu wa Anaki? 3 Kumbiti muvimani leru kuwera Mtuwa Mlungu gwenu hakawalongoleri. Hakaweri gambira motu mkulu. Hakawagamiziyi woseri na kuwakanka kulongolu kwenu, su mwenga hamuwawingi na kuwagamiziya mala yimu gambira Mtuwa Mlungu ntambu yakalagiliti.

4 Pa Mtuwa Mlungu gwenu kuwawinga wantu walii kulongolu kwa mwenga, mwenga namlonga mumyoyu mwenu, Mtuwa Mlungu katupanana isi ayi toziya twenga twawantu waherepa! Unakaka ndo awu toziya wantu wa isi ilii wawera wakondola Mtuwa Mlungu kawawinga ntambu yamuweriti mwankuwongereka. 5 Muweza kuitola kwa makakala isi yawu kwa toziya ndiri mwenga mwawantu waheri ama yawawera na myoyu iherepa, kumbiti Mtuwa Mlungu gwenu kankuwawinga wantu walii kulongolu kwa mwenga toziya womberi wawera wakondola na mweni kafira kutenda shilii shakawalagiliti wambuyi wetu, Abrahamu na Isaka na Yakubu. 6 Su muvimani kuwera kwa toziya ndiri mwenga mwawaheri, Mtuwa Mlungu gwenu kankuwapanani isi ayi iherepa muihali, toziya mwenga mwawantu yamuwera na ubinta.

7 Namulyaluwa shilii wambuyi wetu shawatenditi kushiwala, shilii shashitenditi Mtuwa Mlungu kawakalalili. Kwanjira lishaka lilii mwenga pamlawiti Misri mpaka lishaka lyamsokiti panu, mwenga viraa mwendereya kumlema Mtuwa Mlungu. 8 Ata aku kulugongu Sinayi, wambuyi wetu watenditi Mtuwa Mlungu kawakalalili na kafiliti kuwagamiziya. 9 Pankweniti kugenda kulugongu kuwanka vibawu vya mabuwi gagasongolituwiti na kulembuwa malagaliru lilongu galii gampananituwiti, neni nilikaliti aku mashaka malongu msheshi, ndiyiti ndiri ama kulanda shintu shoseri shilii. 10 Mtuwa Mlungu kampananiti neni vibawu virii viwili vya mabuwi vyavilembituwiti kwa shyala sha Mlungu, vibawu virii vilembituwiti visoweru vyoseri virii Mtuwa Mlungu vyakawagambiriti kulawa mumotu kulugongu, mwenga pamjojonikiti pasi paluseleru lwa lugongu. 11 Lupeleru mwa mashaka galii malongu msheshi, Mtuwa Mlungu kampananiti neni vibawu vya mabuwi galii mawili gakagalembiti visoweru vya lipatanu. 12 Shakapanu Mtuwa Mlungu kang'ambiriti, guseleli pasi kalongola, toziya wantu waku yaguwalaviyiti Misri wankutenda ukondola mkulu. Womberi wankutenda shilii neni nalagaliriti nawashitenda, su walinyawila weni shinyagu sha kuyeyusha.

13 Su Mtuwa Mlungu kang'ambiriti, neni mona wantu awa wawera na ubinta nentu. 14 Gundeki nuwagamiziyi woseri, kwahera muntu yoseri hakawaholi womberi kuwera waweriti pasipanu. Neni hanikutendi gwenga kuwera tati gwa isi yaimanika na kuwera na makakala nentu kuliku womberi.

15 Su lugongu paluweriti lwakuyaka motu,neni ngalambukiti na kuselera kulawa kulugongu pampapa vibawu virii viwili vya mabuwi vyavilembituwiti malagaliru. 16 Neni ndoliti na kusintuka kuwera mwenga mtenditi vidoda vikulu kwa Mtuwa Mlungu gwenu. Mwenga kalongola wanjiti kutenda shintu shilii Mtuwa Mlungu gwenu kalagaliriti nawatenda. Mulinyawiriti kala shinyagu sha kuyeyusha sha su mushiguwiri. 17 Su vibawu virii vya mabuwi vyaweriti navi na nuvyasiliti pasi, nuvipantiti kulongolu kwenu. 18 Shakapanu ng'onjiti makukama kulongolu kwa Mtuwa Mlungu ntambu yantenditi kwanja kwa mashaka malongu msheshi pashiru na paluwala pota kuliya ama kulanda shintu. Ntenditi hangu toziya ya wambuyi wenu watenditi vidoda kulongolu kwa Mtuwa Mlungu na kutenda kakalali nentu. 19 Neni ntiriti nentu toziya Mtuwa Mlungu kawakalariti nentu mwenga na mekawagamiziyiti nakamu. Kumbiti kayi numluwiti kuwera nakawagamiziya, su kapikaniriti maluwa gangu. 20 Mtuwa Mlungu viraa kamkaliliti Aruni kwa kunyawa shinyagu sha kuyeyusha na kaweriti kala kumlaga Aruni. Kumbiti shaka shilaa shilii nduwiti kwajili ya Aruni nakamlaga viraa na Mtuwa Mlungu kawankuliti maluwa gangu. 21 Neni nushitoliti shinyagu shilii na kushiyeyusha mumotu, nushiponditi ponditi kuwera ubumu na kuguwasila mulushemba lwalunyinyirika kulawa kulugongu lulii.

22 Mwenga viraa mumtenditi Mtuwa Mlungu kakalali kulii Tabera na Masa na Kibiroti Hataava. 23 Na Mtuwa Mlungu pakawalaviyiti Kadeshi Barineya kalongiti, mgendi mwakaitoli kwa makakala isi yanuwapanana. Kumbiti mwenga mumlemiti na mumjimiriti ndiri ama kushijimira shilii shakalagaliriti. 24 Mwenga muwera wabinta kulongolu kwa Mtuwa Mlungu kwanjira panuwamaniti.

25 Su ng'onjiti makukama kulongolu kwa Mtuwa Mlungu mashaka malongu msheshi, toziya Mtuwa Mlungu kalongiti kuwera mekawagamiziyi nakamu. 26 Numluwiti Mtuwa Mlungu panongiti, gwee Mtuwa Mlungu, wantu awa waku mweni, su naguwagamiziya. Wantu awa ndo walii yaguwalopoliti na kuwalaviya kulawa muisi ya Misri kwa makakala gaku makulu. 27 Nagulyaluwa shilii shaguwalagiliti wantumintumi waku Abrahamu na Isaka na Yakubu. Nagulola ubinta wawu na ukondola wawu na vidoda vya wantu awa. 28 Paguwagamiziya wantu awa, wantu wa Misri hawalongi, toziya Mtuwa Mlungu kasinda kuwajega kwingira muisi yakawalagiliti, toziya kawakalalila, su kawajegiti kuwalaga kushiwala. 29 Kumbiti wantu awa waku mweni, guwasyaguliti kuwera waku mweni na guwalaviyiti kulawa Misri kwa makakala gaku na uwezu waku mkulu.