1 Pa Mtuwa Mlungu gwenu kuwagamiziya wantu walii isi yawu yang'enda kuwapanana mwenga, na pakuwawusiya kala mumiji yawu na mwenga kwanja kulikala munumba zawu, 2 mwenga hamtuli gweka miji mitatu ya kutugira muisi yakagenda kuwapanana Mtuwa Mlungu gwenu mulikali. 3 Mbaguli miji mitatu muisi ilii, su kila muntu yakamlaga muntu gwingi kawezi kutugira mulumu lwa miji ilii. 4 Handa muntu yoseri pakamlaga muyaguwi pota kulihola, su kaweza kutugira mji gumu pa miji ilii kugalopola makaliru gakuyi kulii. 5 Kwa mfanu, muntu yakagenda na muyaguwi kuntundu kusola mbawu, yomberi pakawera kankukata mbawu, liwagu palisolopoka na kumkota muntu ulii na kumlaga, su muntu ulii hakawezi kutugira mumji gumu pa miji ilii kagalopoli makaliru gakuyi. 6 Handa utali wa mji gwa pakwegera kutugira paguwera kutali, mlongu gwa muntu ulii yakahowiti hakawezi kumtugusiya muntu ulii yakamlagiti muyaguwi na hakamlagi, tembera yomberi kapananituwiti ndiri lagaliru lya kulaga na walii waweriti ndiri wangondu kwanja. 7 Hangu ndo ntambu yanuwalagalira mtuli gweka miji mitatu.

8 Handa Mtuwa Mlungu gwenu pakawongera mbwega za isi yenu ntambu yakawalagiliti wambuyi wetu, na hakawapanani isi yoseri ilii yakawalagiliti wambuyi wetu, su mwenga mwongeri miji yamonga mitatu ya kutugira. 9 Mwenga pamuhera waminika kugajimira malagaliru goseri ganuwapanana, mashaka goseri pamuhera waminika na kugajimila mafundu gakuyi, Mtuwa Mlungu hakawapanani isi ayi. 10 Mtuli gweka miji ayi, su muntu yakahera na likosa pakiza kulaguwa muisi yenu ilii Mtuwa Mlungu gwenu yakagenda kuwapanana mulikali, mwenga hapeni muweri na ukondola.

11 Kumbiti muntu yoseri pakamkalalira mngondu gwakuwi, pakamnyatira na kumkangira na kumlaga, shakapanu pakatugira mji gumu mumiji ayi, 12 su wazewi wa mji gulii yakalikaliti muntu ulii yakalagiti, hawawajegi wantu wamlaviyi muntu ulii yakalagiti kulawa mumji gulii yakatugiriti na kumjega kwa mlongu gwa muntu yakalaguwiti, su kamuwuziliri kwa kumlaga. 13 Nagumwonera lusungu muntu ulii yakalagiti. Mwenga hamumaliri ukondola kulawa mu Israeli, su mwenga pamtenda hangu, vitwatira vyenu vyoseri havigendi weri.

14 Mwenga pamwingira muisi ilii Mtuwa Mlungu yakagenda kuwapanana muikali, namuwusiya mabuwi ga mbaka za wapakwegera wenu, mabuwi ga mbaka gagatuliwituwiti kala pamakashu na Mtuwa Mlungu gwenu.

15 Ukapitawu wa muntu yumu gutosha ndiri kumtoza muntu kaweri na likosa ama ukondola wa likosa lyoseri lilii lyakatenditi. Kumbiti ukapitawu wa wantu wawili ama watatu hera ndo gupikaniruwi. 16 Handa muntu yoseri pakajera kulaviya ukapitawu wa upayira kumstaki muntu yoseri, 17 su mkapitawu ayu pamuhera na muntu yawamstaki hawagendi pahala pa kumguwira Mtuwa Mlungu pakapasyaguliti na hawayoweri na watambika pamuhera na watoza yawatenda lihengu mushaka shilii. 18 Watoza hawalori weri sitaka lilii na payiwoneka ukapitawu yaulaviwa uwera ukapitawu wa upayira na yumu gwa wantu walii kamstaki muyaguwi kwa upayira, 19 su mwenga hamumtenderi muntu ulii ntambu yakafiriti kumtendera muyaguwi. Kwa kutenda hangu mwenga hamumalili ukondola pa Israeli. 20 Wantu wamonga hawapikaniri shitwatira ashi na hawatiri, su ukondola wa ntambu ayi hapeni ulawiri kayi pakati penu Waisraeli. 21 Mwenga namuwawonera lusungu wantu wa ntambu ayi. Lilagaliru haliweri kuwera muntu yakamlaga muyaguwi na mweni hakalagwi viraa na yoseri yakamtenduwa muyaguwi lisu na mweni hawamtenduwi lisu viraa, yoseri yakamtenduwa linu myaguwi na mweni hawamtenduwi linu viraa na yoseri yakamdumula liwoku muyaguwi na mweni hawamdumuli liwoku viraa, na yoseri yakalidumula ligulu lya muyaguwi na mweni hawamdumuli ligulu lyakuyi viraa.